།དེ་ནས་བྲམ་ཟེ་གནག་ལྷས་སྐྱེས་ཀྱིས་རྒྱལ་པོའི་འཁོར་རྒྱལ་རིགས་དྲུག་ཕོ་ཉས་བཀུག་སྟེ་འདི་སྐད་ཅེས་སྨྲས་སོ། །ཤེས་ལྡན་དག་ཁྱེད་ཅག་རྒྱལ་པོ་རྡུལ་ཕྲན་གང་ན་བ་དེར་དོང་ལ་ཕྱིན་པ་དང་། རྒྱལ་པོ་རྡུལ་ཕྲན་ལ་རྒྱལ་བ་དང་ཚེ་སྤེལ་བདག་བྱོས་ལ་འདི་སྐད་ཅེས་ལྷ་ལྷ་གཞོན་ནུར་གྱུར་པ་ན་བདག་ཅག་སྤྱན་སྔར་མཆིས་ནས་འདི་སྐད་ཅེས་ཇི་ལྟར་རྡུལ་ཕྲན་ཁྱོད་བདེ་ན་དེ་བཞིན་དུ་བདག་ཅག་བདེ་ཞིང་། ཇི་ལྟར་རྡུལ་ཕྲན་ཁྱོད་སྡུག་བསྔལ་ན་དེ་བཞིན་དུ་བདག་ཅག་སྡུག་བསྔལ་བར་འགྱུར་ལ། རྒྱལ་པོའི་འཁོར་རྒྱལ་རིགས་དྲུག་པོ་ནི་རྡུལ་ཕྲན་ཁྱོད་ཀྱི་གྲོགས་པོ་དང་། སྙིང་དུ་སྡུག་པ་དང་། ནེའུ་ཟླ་ལགས་ཀྱིས། རྡུལ་ཕྲན་ཁྱོད་གལ་ཏེ་ཡབ་འདས་ཏེ་ཡབ་ཀྱི་རྒྱལ་སྲིད་ཀྱི་དབང་ཕྱུག་ལ་བཞག་ན་ཅི་ནས་ཀྱང་བདག་ཅག་ལ་ལོངས་སྤྱོད་དག་ལས་ལོངས་སྤྱོད་ཀྱི་བགོ་བཤའ་མཛོད་ཅིག་ཅེས་གསོལ་པ་དགོངས་སམ་ཞེས་སྨྲོས་ཤིག །གལ་ཏེ་འདི་སྐད་ཅེས་ངས་དྲན་ནོ་ཟེར་ན། ལྷ་ད་ནི་དེའི་དུས་ལ་བབ་ལགས་སོ་ཞེས་སྨྲོས་ཤིག །འོན་ཏེ་དེ་འདི་སྐད་ཅེས་ས་ཆེན་པོ་ནང་ཡངས་ལ་ཕྱི་ཤིང་རྟའི་དབྱིབས་ལྟར་འདུག་པ་འདི་ཆ་བདུན་དུ་འགེད་པ་སུ་ཞིག་ཡོད་ཅེས་ཟེར་ན། ལྷ་གནག་ལྷས་སྐྱེས་མ་ལགས་པ་གཞན་ཡང་མ་མཆིས་སོ་ཞེས་སྨྲོས་ཤིག །མཁན་པོ་བཀའ་བཞིན་འཚལ་ཞེས་རྒྱལ་པོའི་འཁོར་རྒྱལ་རིགས་དྲུག་གིས་བྲམ་ཟེ་གནག་ལྷས་སྐྱེས་ལས་མཉན་ནས། རྒྱལ་པོ་རྡུལ་ཕྲན་གང་ན་བ་དེར་དོང་སྟེ་ཕྱིན་པ་དང་། རྒྱལ་པོ་རྡུལ་ཕྲན་ལ་རྒྱལ་བ་དང་ཚེ་སྤེལ་བ་དག་བྱས་ནས་རྒྱལ་པོ་རྡུལ་ཕྲན་ལ་འདི་སྐད་ཅེས་སྨྲས་སོ། །ལྷ་ལྷ་སྔོན་གཞོན་ནུར་གྱུར་པ་ན་བདག་ཅག་སྤྱན་སྔར་མཆིས་ནས་འདི་སྐད་ཅེས་ཇི་ལྟར་རྡུལ་ཕྲན་ཁྱོད་བདེ་ན་དེ་བཞིན་དུ་བདག་ཅག་བདེ་ཞིང་། ཇི་ལྟར་རྡུལ་ཕྲན་ཁྱོད་སྡུག་བསྔལ་ན་དེ་བཞིན་དུ་བདག་ཅག་སྡུག་བསྔལ་བར་འགྱུར་ལ། བདག་ཅག་རྒྱལ་པོའི་འཁོར་རྒྱལ་རིགས་དྲུག་པོ་ནི་རྡུལ་ཕྲན་ཁྱོད་ཀྱི་གྲོགས་པོ་དང་། སྙིང་དུ་སྡུག་པ་དང་། ནེའུ་ཟླ་ལགས་ཀྱིས། རྡུལ་ཕྲན་ཁྱོད་གལ་ཏེ་ཡབ་འདས་ཏེ་ཡབ་ཀྱི་རྒྱལ་སྲིད་ཀྱི་དབང་ཕྱུག་ལ་བཞག་ན་ཅི་ནས་ཀྱང་བདག་ཅག་ལ་ལོངས་སྤྱོད་དག་ལས་ལོངས་སྤྱོད་ཀྱི་བགོ་བཤའ་མཛོད་ཅིག་ཅེས་གསོལ་པ་དགོངས་ལགས་སམ། ཤེས་ལྡན་དག་ངས་དྲན་ནོ། །ལྷ་ད་ནི་དེའི་དུས་ལ་བབ་ལགས་སོ། །འོ་ན་ས་ཆེན་པོ་ནང་ཡངས་ལ་ཕྱི་ཤིང་རྟའི་དབྱིབས་ལྟར་འདུག་པ་འདི་ཆ་བདུན་དུ་འགེད་པ་སུ་ཞིག་ཡོད།