རྡུལ་ཕྲན་ཁྱོད་གལ་ཏེ་ཡབ་འདས་ནས་ཡབ་ཀྱི་རྒྱལ་སྲིད་ཀྱི་དབང་ཕྱུག་ལ་བཞག་ན། ཅི་ནས་ཀྱང་བདག་ཅག་ལ་ལོངས་སྤྱོད་དག་ལས་ལོངས་སྤྱོད་ཀྱི་བགོ་བཤའ་མཛོད་ཅེས་གྱིས་ཤིག །མཁན་པོ་བཀའ་བཞིན་འཚལ་ཞེས་རྒྱལ་པོའི་འཁོར་རྒྱལ་རིགས་དྲུག་གིས་བྲམ་ཟེ་གནག་ལྷས་སྐྱེས་ལས་མཉན་ནས་གཞོན་ནུ་རྡུལ་ཕྲན་གང་ན་བ་དེར་དོང་སྟེ་ཕྱིན་པ་དང་། གཞོན་ནུ་རྡུལ་ཕྲན་ལ་རྒྱལ་བ་དང་ཚེ་སྤེལ་བ་དག་བྱས་ནས་གཞོན་ནུ་རྡུལ་ཕྲན་ལ་འདི་སྐད་ཅེས་སྨྲས་སོ། །ཇི་ལྟར་རྡུལ་ཕྲན་ཁྱོད་བདེ་ན་དེ་བཞིན་དུ་བདག་ཅག་བདེ་ཞིང་། ཇི་ལྟར་རྡུལ་ཕྲན་ཁྱོད་སྡུག་བསྔལ་ན་དེ་བཞིན་དུ་བདག་ཅག་སྡུག་བསྔལ་བར་འགྱུར་ལ། རྒྱལ་པོའི་འཁོར་རྒྱལ་རིགས་དྲུག་ནི་རྡུལ་ཕྲན་ཁྱོད་ཀྱི་གྲོགས་པོ་དང་། སྙིང་དུ་སྡུག་པ་དང་། ནེའུ་ཟླ་ལགས་ཀྱིས། རྡུལ་ཕྲན་ཁྱོད་གལ་ཏེ་ཡབ་འདས་ནས་རྒྱལ་སྲིད་ཀྱི་དབང་ཕྱུག་ལ་བཞག་ན་ཅི་ནས་ཀྱང་བདག་ཅག་ལ་ལོངས་སྤྱོད་དག་ལས་ལོངས་སྤྱོད་ཀྱི་བགོ་བཤའ་མཛོད་ཅིག །དེ་བཞིན་དུ་བྱའོ་ཞེས་གཞོན་ནུ་རྡུལ་ཕྲན་གྱིས་མཉན་ཏོ། །དེ་ནས་དུས་གཞན་ཞིག་ན་རྒྱལ་པོ་ཕྱོགས་བདག་དུས་ལས་འདས་ཏེ་ཤི་བར་གྱུར་ནས་བློན་པོའི་ཚོགས་རྣམས་དང་། སྣ་ཆེན་པོ་ལ་གཏོགས་པ་རྣམས་དང་། རྒྱལ་ཁྲིམས་འདོན་པ་རྣམས་དང་། གསང་ཚིག་གིས་ལྷན་ཅིག་འཚོ་བ་རྣམས་ཀྱིས་གཞོན་ནུ་རྡུལ་ཕྲན་ཕའི་རྒྱལ་སྲིད་ཀྱི་དབང་ཕྱུག་ལ་བཞག་ཅིང་། དེ་རྒྱལ་སྲིད་ལ་དབང་བསྐུར་བའི་ཕྱིར་དབང་བསྐུར་རོ། །དེ་ནས་གཞོན་ནུ་རྡུལ་ཕྲན་གྱི་མིང་གཞོན་ནུ་རྡུལ་ཕྲན་ཞེས་བྱ་བ་གང་ཡིན་པ་དེ་ནུབ་ཅིང་། རྒྱལ་པོ་རྡུལ་ཕྲན་ཞེས་བྱ་བར་གྲགས་སོ། །དེ་ནས་རྒྱལ་པོ་རྡུལ་ཕྲན་གྱིས་བྲམ་ཟེ་གནག་ལྷས་སྐྱེས་ཕོ་ཉས་བཀུག་ནས་འདི་སྐད་ཅེས་སྨྲས་སོ། །མཁན་པོས་ངའི་ཡབ་ལ་ཇི་ལྟར་རྗེས་སུ་སྟོན་པ་དེ་ལྟར་ང་ལ་ད་ཕྱིན་ཆད་རྗེས་སུ་བསྟན་པར་བྱ་བར་སོམས་ཤིག །བཀའ་བཞིན་འཚལ་ཞེས་བྲམ་ཟེ་གནག་ལྷས་སྐྱེས་ཀྱིས་མཉན་ཏོ། །དེ་ནས་བྲམ་ཟེ་གནག་ལྷས་སྐྱེས་ཀྱིས་རྒྱལ་པོའི་འཁོར་རྒྱལ་རིགས་དྲུག་ཕོ་ཉས་བཀུག་སྟེ་འདི་སྐད་ཅེས་སྨྲས་སོ།