།དེ་ནས་དུས་གཞན་ཞིག་ན་གཞོན་ནུ་དེ་རྣམས་སྨྲ་ཤེས་པར་གྱུར་ཏོ། །དེ་ནས་རྒྱལ་པོ་ཚངས་སྦྱིན་འདི་སྙམ་དུ་སེམས་ཏེ། གལ་ཏེ་གཞོན་ནུ་ཆུ་སྐྱེས་ལྐུགས་པར་མ་གྱུར་དང་། དེ་ཡང་ད་ཙམ་སྨྲ་ཤེས་པར་གྱུར་པ་ཞིག་སྙམ་མོ་དེའི་མིང་གཞོན་ནུ་ཆུ་སྐྱེས་བྱ་བ་དེ་ནུབ་པར་གྱུར་ཅིང་། གཞོན་ནུ་ལྐུགས་འཕྱེ་གཞོན་ནུ་ལྐུགས་འཕྱེ་ཞེས་བྱ་བར་གྲགས་སོ། །དེ་ནས་དུས་གཞན་ཞིག་ན་རྒྱལ་པོ་ཚངས་སྦྱིན་ལག་པ་ལ་འགྲམ་པ་གཏད་ནས་སེམས་ཁོང་དུ་ཆུད་ཅིང་འདུག་པ་དང་། བློན་པོ་རྣམས་ཀྱིས་སྨྲས་པ། ལྷ་ཅིའི་སླད་དུ་ཕྱག་ལ་ཞལ་གཏད་ནས་ཐུགས་མི་དགྱེས་ཤིང་བཞུགས། རྒྱལ་པོས་སྨྲས་པ། ད་ལྟར་རྒྱལ་སྲིད་ཀྱི་དབང་ཕྱུག་འདི་འདྲ་བ་ཐོབ་ན་བུ་ཕོ་ཡང་མེད། བུ་མོ་ཡང་མེད་པས་ང་ཤི་ན་གདུང་རྒྱུད་ཆད་པར་འགྱུར་ལ། བུ་གཅིག་ཡོད་པ་གང་ཡིན་པ་དེ་ཡང་ལྐུགས་ཤིང་འཕྱེ་བོར་གྱུར་ན་ད་ང་ཉིད་ཅིའི་ཕྱིར་སེམས་ཁོང་དུ་ཆུད་པར་མི་འགྱུར། བློན་པོ་དག་གིས་སྨན་པ་རྣམས་བསྡུས་ཏེ་སྨན་པ་རྣམས་ཀྱིས་བལྟས་ནས་སྨྲས་པ། ལྷ་གཞོན་ནུ་འདི་ནི་དབང་པོ་གསལ་ཞིང་འདི་ལ་ནད་ཀྱི་རིགས་ཅུང་ཟད་ཀྱང་མ་མཆིས་པར་མཐོང་ན། འོན་ཀྱང་སྐྲག་པ་ཞིག་མཛོད་ཅིག །དེ་ནས་རྒྱལ་པོ་ཚངས་སྦྱིན་གྱིས་གཤེད་མ་པ་བཀུག་ནས་གསང་སྟེ་བསྒོ་བ། ངའི་གཞོན་ནུ་ལྐུགས་འཕྱེ་སྐྱེ་བོའི་ཚོགས་ཆེན་པོའི་མངོན་སུམ་དུ་སྤོང་གིས་ཁྱེད་ཅག་གིས་མ་གསད་ཅིག །ལྷ་བཀའ་བཞིན་འཚལ་ཞེས་དེ་ནས་གཤེད་མ་པའི་མི་རྣམས་ཀྱིས་རྒྱལ་པོ་ཚངས་སྦྱིན་ལས་མཉན་ནས་གཞོན་ནུ་ལྐུགས་འཕྱེ་ཤིང་རྟར་བཅུག་སྟེ། བཱ་རཱ་ཎ་སཱིའི་དབུས་ཐོག་ཐག་ཁྲིད་པ་དང་། དེ་ནས་གཞོན་ནུ་ལྐུགས་འཕྱེས་བཱ་རཱ་ཎ་སཱི་འབྱོར་ཅིང་རྒྱས་པ་མཐོང་ནས་འདི་སྐད་ཅེས་སྨྲས་སོ། །ཅི་བཱ་རཱ་ཎ་སཱི་འདི་སྟོང་པ་ཡིན་ནམ། འོན་ཏེ་གནས་པ་ཞིག་ཡོད། གཤེད་མ་པའི་མི་རྣམས་ཀྱིས་གཞོན་ནུ་ལྐུགས་འཕྱེ་རྒྱལ་པོ་ལ་ཕུལ་ནས། ལྷ་གཞོན་ནུ་འདིས་ནི་འདི་སྐད་ཀྱི་ཚིག་སྨྲས་སོ། །དེ་ནས་རྒྱལ་པོ་ཚངས་སྦྱིན་གྱིས་གཞོན་ནུ་ལྐུགས་འཕྱེ་པང་དུ་བླངས་ནས་འདི་སྐད་ཅེས་སྨྲས་སོ། །སུ་ཞིག་གསད། སུ་ཞིག་གཏག །སུ་ཞིག་སྲོག་དང་དབྲལ། སུ་ལ་ཅི་ཞིག་སྦྱིན།