།དེ་བཙས་པ་ན་དེའི་ཉེ་དུ་དག་ལྷགས་ཤིང་འདུས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུའི་མིང་ཅིར་གདགས་ཞེས་དེའི་མིང་འདོགས་པར་བྱེད་དེ། ཁྱེའུ་འདི་ནི་ཆུའི་ནང་དུ་བཙས་པ་ཡིན་པས་ཁྱེའུ་ཆུ་སྐྱེས་ཞེས་བྱ་བར་བཏགས་སོ། །གཞོན་ནུ་ཆུ་སྐྱེས་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང་ཞོ་དང་མར་དང་། ཞུན་མར་དང་། མར་གྱི་ཉིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་ནས་གཞོན་ནུ་ཆུ་སྐྱེས་འདི་སྙམ་དུ་སེམས་ཏེ། གང་ནས་ཤི་འཕོས་སྙམ་ན་སེམས་ཅན་དམྱལ་བ་ནས་སོ། །ལས་ཅི་ཞིག་བྱས་ན། དེས་ན་སེམས་ཅན་དམྱལ་བར་སྐྱེས་སྙམ་ན། རྒྱལ་ཚབ་ལོ་དྲུག་བཅུ་བྱས་པས་སོ། །ད་ལྟ་གང་དུ་སྐྱེས་སྙམ་ན། མིའི་རྒྱལ་པོའི་རིགས་སུ་སྐྱེས་ཏེ། གལ་ཏེ་སླར་ཡང་རྒྱལ་སྲིད་བྱས་ན་སླར་ཡང་སེམས་ཅན་དམྱལ་བར་གཞོལ་བར་འགྱུར་བས་མ་ལ་བདག་གིས་ཅི་ནས་ཀྱང་ཐབས་ཤིག་བྱའོ་སྙམ་ནས་དེས་འཕྱེ་བོར་རྫུས་ཏེ་འདུག་གོ། །གང་གི་ཉི་མ་ལ་གཞོན་ནུ་ཆུ་སྐྱེས་བཙས་པ་དེ་ཉིད་ཀྱི་ཉིན་པར་བློན་པོ་ལྔ་བརྒྱའི་བུ་ཡང་བཙས་སོ། །དེ་ནས་ཉིན་རེ་ཞིང་གཞོན་ནུ་རྣམས་རྒྱལ་པོ་ཚངས་སྦྱིན་བལྟ་བའི་ཕྱིར་འོང་ངོ་། །དེ་ནས་དུས་གཞན་ཞིག་ན་གཞོན་ནུ་དེ་རྣམས་མཆོང་བ་དང་རྒྱུག་ནུས་པར་གྱུར་ཏོ། །དེ་ནས་རྒྱལ་པོ་ཚངས་སྦྱིན་འདི་སྙམ་དུ་སེམས་ཏེ། གལ་ཏེ་གཞོན་ནུ་ཆུ་སྐྱེས་འཕྱེ་བོར་མ་གྱུར་ན་དེ་ཡང་ད་ཙམ་མཆོང་བ་དང་རྒྱུག་ནུས་པར་གྱུར་པ་ཞིག་འོན་ཀྱང་བདག་གིས་འདི་འཕྱེ་བོར་གྱུར་པ་བཞིན་རྒྱལ་སྲིད་ཀྱི་དབང་ཕྱུག་ལ་གཞག་གོ་སྙམ་མོ། །དེ་ནས་གཞོན་ནུ་ཆུ་སྐྱེས་འདི་སྙམ་དུ་སེམས་ཏེ། རྒྱལ་པོ་འདི་ནི་དོན་མེད་པ་ལ་གཙིགས་ཆེར་འཛིན་པས་མ་ལ་བདག་ལྐུགས་པ་ཉིད་དུ་རྫུའོ་སྙམ་ནས་དེས་ཐབས་བྱ་བར་ལྐུགས་པ་ཉིད་དུ་རྫུས་ཏེ་འདུག་གོ། །དེ་ནས་དུས་གཞན་ཞིག་ན་གཞོན་ནུ་དེ་རྣམས་སྨྲ་ཤེས་པར་གྱུར་ཏོ།