།རྒྱལ་པོ་ཆེན་པོ་གང་དག་འདི་སྙམ་དུ་བདག་ནི་མིག་ཡིན་ནོ། །མིག་ནི་བདག་གི་ཡིན་ནོ་ཞེས་བྱ་བ་ནས་རྣམ་པར་ཤེས་པའི་ཕུང་པོ་ནི་བདག་གི་ཡིན་ནོ་ཞེས་བྱ་བའི་བར་གོང་མ་བཞིན་དུ་སྟེ། དེ་ལྟར་མི་སེམས་ན། དེ་རྣམས་བདེ་བ་འཐོབ་འགྱུར་ཏེ། །སྤྲིན་གྱི་ཤུགས་ཀྱིས་ཚོང་པ་བཞིན། །སངས་རྒྱས་བསྟན་ལ་བླུན་པོའམ། །གང་དག་དད་པར་མི་བྱེད་པ། །དེ་རྣམས་སྡུག་བསྔལ་འཐོབ་འགྱུར་ཏེ། །སྲིན་མོའི་ནང་དུ་ཚོང་པ་བཞིན། །ཤེས་རབ་ཅན་གྱི་མི་གང་དག །སངས་རྒྱས་བསྟན་ལ་དད་བྱེད་པ། །བདེ་བར་ཕ་རོལ་འགྲོ་འགྱུར་ཏེ། །སྤྲིན་གྱི་ཤུགས་ཀྱིས་ཚོང་པ་བཞིན། །རྒྱལ་པོ་ཆེན་པོ་ཇི་སྙམ་དུ་སེམས། །དེའི་ཚེ་དེའི་དུས་ན་རྟའི་རྒྱལ་པོ་སྤྲིན་གྱི་ཤུགས་ཅན་དུ་གྱུར་པ་དེ་གཞན་ཞིག་ཡིན་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ང་ཉིད་དེའི་ཚེ་དེའི་དུས་ན་རྟའི་རྒྱལ་པོ་སྤྲིན་གྱི་ཤུགས་ཅན་ཞེས་བྱ་བར་གྱུར་ཏོ། །རྒྱལ་པོ་ཆེན་པོ་དེའི་ཚེ་ངས་སེམས་ཅན་རྣམས་ལ་ཕན་པ་བྱས་པ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་སེམས་ཅན་རྣམས་ལ་ཕན་པ་བྱས་པ་དེ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་སེམས་ཅན་རྗེས་སུ་གཟུང་བ་བྱས་པ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བ་ཡུལ་བཱ་རཱ་ཎ་སཱི་དང་ཧ་ཅང་ཡང་མི་རིང་བ་ཞིག་ན་དྲང་སྲོང་བྱམས་པའི་བདག་ཉིད་སྙིང་རྗེ་ཅན་སེམས་ཅན་ལ་འོ་བྱམས་པ་ཞིག་གནས་སོ། །དེའི་བསྟི་གནས་དང་ཧ་ཅང་ཡང་མི་རིང་བ་ཞིག་ན་ཁྱིམ་བདག་ཞིང་པ་གཉིས་ཤིག་ཞིང་རྨེད་པ་ལས་དེ་གཉིས་ཕན་ཚུན་རྩོད་པ་བྱུང་བར་གྱུར་ཏེ། དེ་ན་གཅིག་ཁྲོས་པ་དང་། ཅིག་ཤོས་ཀྱང་སླར་ཁྲོས་སོ། །གཅིག་གིས་བརྒྱབ་པ་དང་། ཅིག་ཤོས་ཀྱིས་ཀྱང་སླར་བརྒྱབ་བོ། །དེ་གཉིས་ཀ་ཡང་དྲང་སྲོང་གི་དྲུང་དུ་དོང་ནས་དྲང་སྲོང་དེ་ལ་གཅིག་གིས་དཔང་བཙུགས་པ་དང་། ཅིག་ཤོས་ཀྱིས་ཀྱང་བཙུགས་སོ། །དེ་གཉིས་རྒྱལ་པོའི་དྲུང་དུ་སོང་བ་དང་། རྒྱལ་པོས་དེ་གཉིས་ལ་སྨྲས་པ། ཁྱེད་གཉིས་ལ་དཔང་སུ་ཡོད།