དྲ་བ་ཅན་ནི་བྲམ་ཟེ་ཞིག་ཚོང་འདུས་ན་འཚོང་ཞིང་མཆིས་ལགས་སོ། །དེས་བསྒོ་བ། ཤེས་ལྡན་དག་དེང་ལ་ཁྲིད་དེ་ཤོག་ཤིག །དེ་གཉིས་ཁྲིད་དེ་འོངས་པ་དང་། རྒྱལ་པོས་སྲང་ལ་བཅལ་ཏེ་མཉམ་དུ་གསེར་གྱིས་བླུས་སོ། །རྒྱལ་པོ་དེས་བློན་པོ་རྣམས་ལ་བསྒོ་བ། ཤེས་ལྡན་དག་གང་ཞིག་ཁྱེའུ་དང་བུ་མོ་ཡང་ཡོངས་སུ་གཏོང་བར་བྱེད་པ་དེ་ལ་གཞན་ཡོངས་སུ་གཏོང་བར་མི་བྱ་བ་ཅི་ཡོད། གཞོན་ནུ་དེ་ཁུག་ཤིག་དང་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་གཞུག་གོ། །བློན་པོ་རྣམས་ཀྱིས་དེ་དཀའ་ཐུབ་ཀྱི་ནགས་ནས་བཀུག་སྟེ། དེ་རྒྱལ་པོའི་རྒྱལ་སྲིད་ཀྱི་དབང་ཕྱུག་ལ་བཞག་ནས་དེས་གྲོང་ཁྱེར་གྱི་སྒོ་བཞིར་མཆོད་སྦྱིན་གྱི་གནས་ཀྱི་ཁང་པ་བརྩིགས་ནས་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་སྦྱིན་པ་དག་བྱིན། བསོད་ནམས་དག་བྱས་ཏེ་དེ་བདག་ཉིད་ཀྱི་མཆོད་སྦྱིན་གྱི་ཕུན་སུམ་ཚོགས་པ་མཐོང་ནས་ཚིགས་སུ་བཅད་དེ་སྨྲས་པ། བྱང་ཆུབ་བསོད་ནམས་དོན་གཉེར་བས། །དགེ་སྦྱོང་རྣམས་དང་བྲམ་ཟེ་དང་། །དམངས་རིགས་གདོལ་པ་གཡུང་པོ་ལ། །འཇིགས་པ་མེད་པར་སྦྱིན་པ་བྱིན། །གསེར་དང་དངུལ་དང་བ་ལང་དང་། །རྟ་དང་ནོར་བུ་རྒྱན་རྣམས་དང་། །དེ་བཞིན་ལས་དག་བྱེད་པའི་བྲན། །ཚུལ་ཁྲིམས་ལྡན་པ་རྣམས་ལ་སྦྱིན། །ཆགས་པ་མེད་པའི་སེམས་ཀྱིས་ནི། །བུ་དང་བུ་མོ་ཡོངས་བཏང་བས། །འཇིག་རྟེན་འདི་དང་ཕ་རོལ་ཏུ། །མི་ཡིས་དག་པ་འཐོབ་པར་འགྱུར། །རྒྱལ་པོ་ཆེན་པོ་དེའི་ཚེ་དེའི་དུས་ན་རྒྱལ་པོ་ཐམས་ཅད་སྒྲོལ་ཞེས་བྱ་བར་གྱུར་པ་གང་གིས་བུ་དང་ཆུང་མ་ཡོངས་སུ་བཏང་བ་དེ་གཞན་ཞིག་ཡིན་སྙམ་ན། ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ང་ཉིད་དེའི་ཚེ་དེའི་དུས་ན་རྒྱལ་པོ་ཐམས་ཅད་སྒྲོལ་ཞེས་བྱ་བ་དེར་གྱུར་ཏེ། ངས་དེ་ན་བུ་དང་ཆུང་མ་ཡོངས་སུ་བཏང་ངོ་། །རྒྱལ་པོ་ཆེན་པོ་ངས་བུ་དང་ཆུང་མ་ཡོངས་སུ་བཏང་བ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་སྦྱིན་པ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་སྦྱིན་པ་དག་བྱིན།