དེ་ལ་ཆུ་མང་པོས་བཏབ་ནས་བརྟས་ཏེ་སྨྲས་པ། རྗེའི་སྲས་བུས་པ་གཞོན་ནུ་དཀའ་ཐུབ་ཀྱི་ནགས་ནས་བསྐྲུན་པ་བདེ་བའི་བདག་ཉིད་ཅན་དེ་དག་ཁྱོད་ཀྱིས་ཅིའི་སླད་དུ་ཡོངས་སུ་སྤང་། དེ་ནས་བྱང་ཆུབ་སེམས་དཔས་རང་གི་ལུས་ལས་བླ་གོས་ཕུད་དེ་རྒྱགས་སྦྱིན་མ་ལ་སྨྲས་པ། ཅིང་དེ་གཉིས་ལ་བྱམས་པ་མེད་སྙམ་མམ། ངའི་བ་སྤུའི་ཁུང་ཐམས་ཅད་ནས་གས་ཏེ་ཁྲག་བྱུང་བ་ལ་ལྟོས། ལྷ་རྣམས་ཀྱི་དབང་པོ་བརྒྱ་བྱིན་གྱིས་བསམས་པ། བསྐལ་པ་བཟང་པོའི་བྱང་ཆུབ་སེམས་དཔའ་སྦྱིན་པ་ལ་དགའ་བས་གལ་ཏེ་འགའ་ཞིག་གིས་རྒྱགས་སྦྱིན་མ་བླངས་ཏེ་དེ་ལ་བྱིན་ན་གཡོག་བྱེད་པ་མེད་པར་འགྱུར་རོ་སྙམ་དུ་བསམས་ནས། བདག་ཉིད་བྲམ་ཟེའི་ཁྱེའུ་ཞིག་གི་ཆ་བྱད་དུ་སྤྲུལ་ནས་བྱང་ཆུབ་སེམས་དཔའི་མདུན་དུ་འདུག་སྟེ་སྨྲས་པ། གྲོགས་པོ་གཡོག་བྱིན་ཅིག །བྱང་ཆུབ་སེམས་དཔས་སྨྲས་པ། བདག་ལ་གཡོག་ག་ལ་ཡོད། བརྒྱ་བྱིན་གྱིས་སྨྲས་པ། རྒྱགས་སྦྱིན་མ་བྱིན་ཅིག །བྱང་ཆུབ་སེམས་དཔས་རྒྱགས་སྦྱིན་མའི་གདོང་དུ་བརྟག་པར་བརྩམས་པ་དང་། རྒྱགས་སྦྱིན་མས་བྱང་ཆུབ་སེམས་དཔའི་བསམ་པ་ཤེས་ནས་སྨྲས་པ། རྗེའི་སྲས་གལ་ཏེ་ཁྱོད་ཀྱིས་བདག་བཏང་ན་སྩལ་དུ་གསོལ། བྱང་ཆུབ་སེམས་དཔས་སྨྲས་པ། བྲམ་ཟེ་ཁྱོད་ལ་བྱིན་ནོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྲམ་ཟེའི་ཁྱེའུའི་ཆ་བྱད་མི་སྣང་བར་བྱས་ཏེ་རང་གི་ཆ་བྱད་དུ་འདུག་ནས་སྨྲས་པ། དྲང་སྲོང་བདག་གི་རྒྱགས་སྦྱིན་མ་འདི་ཁྱོད་ལ་བཅོལ་གྱིས། ཁྱོད་ཀྱིས་སུ་ལ་ཡང་མ་སྦྱིན་ཅིག །རྒྱགས་སྦྱིན་མས་བརྒྱ་བྱིན་གྱི་རྐང་པ་གཉིས་ལ་མགོ་བོས་གཏུགས་ཏེ་སྨྲས་པ། ཀཽ་ཤི་ཀ་ཅི་ནས་ཀྱང་བུས་པ་གཞོན་ནུ་དེ་གཉིས་བྲན་ཉིད་དུ་མི་འགྱུར་བ་དེ་ལྟར་མཛོད་ཅིག །ལྷ་རྣམས་ཀྱི་དབང་པོ་བརྒྱ་བྱིན་གྱིས་དེ་བཞིན་དུ་བྱའོ་ཞེས་སྨྲས་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བུས་པ་གཞོན་ནུ་ཁྱེར་བའི་བྲམ་ཟེ་ཇི་ལྟར་ཐམས་ཅད་ཀྱི་གྲོང་རྡལ་དུ་འཚོང་བར་བརྩམས་པ་དེ་ལྟར་རྨོངས་པར་བྱས་སོ། །དེ་གཉིས་རྒྱལ་པོའི་ཞོ་ཤས་འཚོ་བ་རྣམས་ཀྱིས་མཐོང་ནས་དེ་རྣམས་རྒྱལ་པོའི་དྲུང་དུ་དོང་སྟེ་སྨྲས་པ། བུས་པ་ནག་པོ་དང་། དྲ་བ་ཅན་ནི་བྲམ་ཟེ་ཞིག་ཚོང་འདུས་ན་འཚོང་ཞིང་མཆིས་ལགས་སོ།