ཁྱོད་གཅིག་པུ་གྲོགས་མེད་པ་ལུས་གདོན་མི་ཟ་བར་འགྱུར་གྱིས་ཐོང་། གཞོན་ནུས་སྨྲས་པ། དྲང་སྲོང་ཆེན་པོ་བདག་ནི་གདོན་མི་ཟ་བར་མཆིའོ། །ཅིའི་སླད་དུ་ཞེ་ན། མཁའ་ལ་ཟླ་བ་རྒྱུ་བ་གྲོགས་ཤིག་ག་ལས་མཆིས། །མཆེ་བའི་མཐུ་སྟོབས་ལྡན་པའི་རི་དགས་གཙོ་བོ་དང་། །མེ་ཡིས་ནགས་སྲེག་པ་ན་གྲོགས་ཤིག་ག་ལས་མཆིས། །བདག་ལྟ་བུ་ལ་གྲོགས་པོ་མཐུ་ལྡན་ཅི་ཞིག་འཚལ། །ཀྱེ་ཅི་རྒྱ་མཚོ་ཆེ་ཆུར་འཇུག་པར་མི་བགྱིའམ། །ཅི་ལགས་སྦྲུལ་གྱིས་ཟིན་ཅེས་གསོ་བར་མི་བགྱིའམ། །སེམས་ཅན་སྤུངས་ཅན་གྱིས་བསྟེན་བརྩོན་འགྲུས་ཆེར་བརྩམས་ཏེ། །གལ་ཏེ་འབད་དེ་མ་རུང་འདི་ལ་ཉེས་པ་མེད། །དེ་ནས་གཞོན་ནུ་ནོར་བཟངས་ཡིད་འཕྲོག་མས་བསྟན་པའི་རྣམ་པ་སྣ་ཚོགས་དང་ཆས་ཏེ་རིམ་གྱིས་རི་དང་། ཆུ་བོ་དང་། ཕུག་དང་གཡངས་ལ་སོགས་པར་སྨན་དང་། གསང་སྔགས་དང་། སྨན་དུག་སེལ་གྱི་སྦྱོར་བས་རྒྱལ་བར་བྱས་ནས་མིའམ་ཅིའི་རྒྱལ་པོ་ལྗོན་པའི་གྲོང་ཁྱེར་དང་ཉེ་བ་ཞིག་ཏུ་སོན་པ་དང་། གཞོན་ནུས་གྲོང་ཁྱེར་དཔལ་དང་ལྡན་པ་སྐྱེད་མོས་ཚལ་གྱི་ཚལ་མེ་ཏོག་དང་འབྲས་བུ་སྣ་ཚོགས་དང་ལྡན་པས་མཛེས་པར་བྱས་པ། བྱ་སྣ་ཚོགས་ཀྱིས་བསྟེན་པ། རྫིང་བུ་དང་། མཚེའུ་རིང་པོ་དང་། གྲུ་བཞི་དང་། མིའམ་ཅི་མོ་རྣམས་ཀྱིས་བསྐོར་བ་དེ་ལ་མིའམ་ཅི་མོ་རྣམས་ཆུ་ལེན་དུ་འོངས་པ་མཐོང་ནས། དེས་གཞོན་ནུ་ནོར་བཟངས་ཀྱིས་དེ་རྣམས་ལ་སྨྲས་པ། ཆུ་མང་པོ་འདིས་ཅི་ཞིག་བྱ། དེ་རྣམས་ཀྱིས་སྨྲས་པ། མིའམ་ཅིའི་རྒྱལ་པོ་ལྗོན་པའི་སྲས་མོ་ཡིད་འཕྲོག་མ་ཞེས་བགྱི་བ་ཞིག་མཆིས། དེ་མིའི་ལག་ཏུ་སོན་པར་གྱུར་པས་དེའི་མིའི་དྲི་བཤལ་བ་ལགས་སོ། །གཞོན་ནུ་ནོར་བཟངས་ཀྱིས་དྲིས་པ། ཅི་བུམ་པ་འདི་དག་ཐམས་ཅད་ཀྱིས་དུས་གཅིག་ཏུ་དེའི་སྟེང་ནས་ལྡུགས་སམ། འོན་ཏེ་རིམ་གྱིས། དེ་རྣམས་ཀྱིས་སྨྲས་པ། རིམ་གྱིས་སོ། །དེས་བསམས་པ་ཐབས་འདི་བཟང་སྟེ། སོར་གདུབ་ཀྱི་རྒྱ་འདི་བུམ་པ་གཅིག་གི་ནང་དུ་གཞུག་གོ་སྙམ་ནས། དེས་མིའམ་ཅི་མོ་གཅིག་གི་བུམ་པར་མ་ཚོར་བར་བཅུག་ནས་མི་འམ་ཅི་མོ་དེ་ལ་སྨྲས་པ།