ལམ་ནི་རྙེད་པར་འགྱུར་ལགས་སོ། །སྲིན་མོ་ལྕགས་ཀྱི་མཆུ་ཅན་ཞིག །ཁ་འཛུམས་གདངས་པར་བགྱིད་གཟིགས་ན། །དེ་ཚེ་དེ་ཡི་འཕྲལ་བ་ལ། །ཕུར་པ་དག་གིས་གདབ་པར་མཛོད། །དེ་བཞིན་ཁྲོན་པ་ཀློང་དྲག་འཁྱིལ། །དྲུག་བཅུའི་ཁྲུ་ཅན་ལ་ཁྱོད་མཆོངས། །སྐྲ་མིག་སེང་གེའི་ལྟར་སེར་ཞིང་། །མི་བཟད་བསྙེན་པར་དཀའ་བ་ཡི། །གནོད་སྦྱིན་དང་ནི་སྲིན་པོ་དག །གཞུ་བཀང་སྟེ་ནི་གསང་མཛོད་ལ། །ཆུ་སྲིན་འཛིན་ཁྲིས་གང་བ་ཡི། །ཆུ་བོ་མང་པོ་རྒལ་མཛོད་ཅིག །ནང་ག་ཕྱེ་མ་ལབ་གདུངས་དང་། །སྣ་ཚོགས་ངུད་མོ་དགོད་པ་དང་། །སྦྲུལ་ཅན་འོད་མ་ཅན་གྱི་ཀླུང་། །ནང་ག་ན་ནི་སྲིན་མོ་ཁྲོ། །ཕྱེ་མ་ལབ་ན་མི་མ་ཡིན། །གདུངས་པ་ན་ནི་འཛིན་ཁྲི་མང་། །སྣ་ཚོགས་ཅན་ན་འདོད་སྒྱུར་གཟུགས། །ངུད་མོར་མི་འམ་ཅི་ཡི་བྲན། །དགོད་པ་ན་ནི་མིའམ་ཅིའི། །མནའ་མ་སྦྲུལ་ཅན་སྦྲུལ་མང་ན། །འོད་མ་ཅན་ཀླུང་ཤལ་མ་ལི། །ནང་ག་ན་ནི་བརྟན་པར་བྱ། །ཕྱེ་མ་ལེབ་ལ་རྟུལ་ཕོད་བྱ། །གདུངས་པར་འཛིན་ཁྲི་ཁ་བཅིང་ངོ་། །སྣ་ཚོགས་ཅན་དུ་ཀླུ་སྣ་ཚོགས། །ངུད་མོ་ཅན་དུ་ཡིད་བདེ་བས། །དགོད་བྱེད་དུ་ནི་མི་སྨྲ་བའི། །སྦྱོར་བས་ཀུན་དུ་རྒལ་བར་མཛོད། །སྦྲུལ་ཅན་དུ་ནི་སྦྲུལ་དུག་གི། །སྔགས་ཀྱི་སྦྱོར་དང་འོད་མ་ཅན། །ཀླུང་དུ་མཚོན་རྣོན་གདབ་པ་ཡི། །སྦྱོར་བས་ཀུན་ཏུ་རྒལ་བར་མཛོད། །ཆུ་བོ་རྣམས་རྒལ་ནས་གཅན་པའི་གནས་ན་གནོད་སྦྱིན་ལྔ་བརྒྱ་ཡོད་པ་དེ་རྣམས་ལ་སྲན་ཚུགས་ཏེ་གཞོམ་པར་མཛོད་ཅིག །དེ་ནས་ནི་མིའམ་ཅིའི་རྒྱལ་པོའི་ཕོ་བྲང་མཆིས་སོ་ཞེས་གསུངས་ཤིག །དེ་ནས་གཞོན་ནུ་ནོར་བཟངས་ཀྱིས་ཇི་སྐད་བསྟན་པའི་སྨན་དང་། གསང་སྔགས་དང་། སྨན་དུག་སེལ་གྱི་སྦྱོར་བ་རྣམས་བཙལ་བའི་ཕྱིར་དྲང་སྲོང་དེའི་རྐང་པ་ལ་མགོ་བོས་ཕྱག་བྱས་ནས་སོང་ངོ་། །དེ་ནས་དེས་སྤྲེའུ་མ་གཏོགས་པར་ཇི་སྐད་བསྟན་པ་ཐམས་ཅད་སྟ་གོན་བྱས་ནས། དེ་ནས་དེ་རྣམས་ཁྱེར་ཏེ་ཡང་དྲང་སྲོང་དེའི་དྲུང་དུ་སོང་བ་དང་། དེས་དེ་ལ་སྤྲེའུ་བྱིན་ནས་སྨྲས་པ། གཞོན་ནུ་འབད་པ་འདིས་ཅི་བྱ། ཡིད་འཕྲོག་མ་འདིས་ཅི་ཞིག་དགོས། ཁྱོད་གཅིག་པུ་གྲོགས་མེད་པ་ལུས་གདོན་མི་ཟ་བར་འགྱུར་གྱིས་ཐོང་།