ཚལ་གཞན་ཞིག་ན་ཁུ་བྱུག་སྒྲ་འབྱིན་པ་ཞིག་མཐོང་ངོ་། །མཐོང་ནས་ཀྱང་ཁུ་བྱུག་དེ་ལ་ཡང་སྨྲས་པ། ཀྱེ་མ་ཁུ་བྱུག་ཚལ་མཆོག་ལྗོན་ཤིང་ལ་གནས་པ། །འདབ་ཆགས་ཚོགས་ཀྱི་རྒྱལ་པོ་བུད་མེད་ཡིད་འཕྲོག་པ། །ཨུཏྤལ་སྔོན་པོ་ལྟ་བུར་དྲི་མེད་མཛེས་པའི་མིག །བདག་གི་ཡིད་འཕྲོག་ཅེས་བྱ་ཁྱོད་ཀྱིས་མཐོང་གྱུར་ཏམ། །ཕྱོགས་དེ་ནས་ཀྱང་སོང་བ་དང་། ཤིང་མྱ་ངན་འཚང་ཞེས་བྱ་བ་མེ་ཏོག་ཐམས་ཅད་རྒྱས་པ་ཞིག་མཐོང་ནས། མིང་གི་རྣམ་གྲངས་བཀྲ་ཤིས་ཞེས་བརྗོད་པ། །ལྗོན་པ་རྣམས་ཀྱི་རྒྱལ་པོ་ཆེར་གྱུར་ལ། །ཡིད་འཕྲོག་མྱ་ངན་གྱིས་ནི་བློང་བ་དག །ཐལ་མོ་སྦྱོར་ན་ཁྱོད་ཀྱིས་མྱ་ངན་སོངས། །དེ་དེ་ལྟར་ཡིད་བློང་བཞིན་རིམ་གྱིས་དྲང་སྲོང་དེའི་བསྟི་གནས་སུ་ཕྱིན་ནས་དེས་དྲང་སྲོང་དེ་ལ་དུལ་བ་དང་བཅས་པས་ཕྱག་བྱས་ནས་སྨྲས་པ། བཟོད་འཕགས་གོས་སུ་ཤིང་ཤུན་དང་ནི་གཡང་གཞི་མནབས། །རྩ་བ་མྱུ་གུ་སྐྱུ་རུ་བིལ་བ་ཀ་པིད་གསོལ། །དྲང་སྲོང་མགོས་བཏུད་ཕྱག་འཚལ་བདག་གི་ཡིད་འཕྲོག་མ། །ཁྱོད་ཀྱིས་གཟིགས་སམ་ཁྱོད་ནི་བདག་ལ་མྱུར་དུ་གསུངས། །དེ་ནས་དྲང་སྲོང་དེས་གཞོན་ནུ་ནོར་བཟངས་ལ་བྱོན་པ་ལེགས་སོ་ཞེས་བྱས་པ་དང་། སྟན་བཏིང་བ་བྱ་བ་ལ་སོགས་པ་སྔར་བྱ་བའི་ཡང་དག་པར་དགའ་བ་བྱས་ནས་སྨྲས་པ། སྨིན་མ་འཇམ་པའི་སྨིན་མཚུངས་མཐོན་མཐིང་བཞིན་ལེགས་མཐོང་ན་དགའ་བའི་གཟུགས་འཆང་བ། །བཞིན་རས་ཟླ་བ་ཉ་འདྲ་ཨུཏྤལ་སྔོན་པོ་ལྟ་བུའི་མིག་དེ་བདག་གིས་མཐོང་། །དཔོན་ཁྱོད་བག་རྐྱང་བཞུགས་ཏེ་རྩ་བ་འབྲས་བུ་སྣ་ཚོགས་གསོལ་བར་མཛོད་ཅིག་དང་། །སླད་ཀྱིས་བདེ་བླག་བྱོན་འགྱུར་འདི་ལ་བདག་གི་ཡིད་ལ་ཐེ་ཚོམ་ཡོང་མ་མཆིས། །སྨིན་མ་བཟང་མོས་འདི་སྐད་ཚིག་སྨྲས་ཏེ། །གཞོན་ནུ་ཁྱོད་ལ་སྲེད་པས་བདག་མི་བདེ། །ནགས་ཁྲོད་གནས་པའང་སྡུག་བསྔལ་ཆེན་པོ་སྟེ། །གཤེགས་པར་གྱུར་ན་ངེས་པར་བདག་མཐོང་ངོ་། །དེས་སོར་གདུབ་རྒྱན་འདི་བྱིན་ནས་སྨྲས་པ། ལམ་ཡང་ལ་བགྲོད་དཀའ་བས་ཉོན་མོངས་པར་འགྱུར་གྱིས་སླར་ལོག་ཤིག །གལ་ཏེ་བཟློག་ཀྱང་འདུག་ཏུ་མ་བཏུབ་ན་དེ་ལ་ལམ་བསྟན་པའི་རིགས་སོ། །