།དེ་ནས་གཞོན་ནུ་འདི་སྙམ་དུ་སེམས་ཏེ། གལ་ཏེ་བདག་སྒོ་ནས་སོང་ན་རྒྱལ་པོའི་སྒོ་སྲུངས་ཀྱི་སྲུང་མ་གཏུམ་པོ་དག་ཡོད་དེ། དེ་རྣམས་ཀྱིས་བདག་ཆད་པས་གཅོད་པའམ། སྲོག་དང་བྲལ་བར་བྱེད་པར་འགྱུར་གྱིས། ཅི་ནས་ཀྱང་མ་ལ་བདག་སྲུང་མ་མེད་པའི་ལམ་ནས་འགྲོའོ་སྙམ་ནས། དེ་མཚན་མོ་ལངས་ཏེ་ཨུཏྤ་ལ་སྔོན་པོའི་ཕྲེང་བས་མགོ་བོ་བཅིངས་པའི་ཕྲེང་བ་རྒྱལ་མཚན་ལ་བཏགས་ནས་གང་ན་སྲུང་མའི་མི་མེད་པ་དེ་ནས་བབས་པ་ན་ཟླ་བ་ཤར་ཏོ། །དེ་ནས་དེས་ཟླ་བ་ལ་བལྟས་ནས་ཡིད་འཕྲོག་མ་དང་བྲལ་བའི་སྨྲེ་སྔགས་འདི་ལྟ་བུ་དག་འདོན་པར་བྱེད་དེ། ཟླ་ཉ་རྒྱུ་སྐར་རྒྱལ་པོ་མཚན་མོ་གསལ་བྱེད་ཀྱེ། །ཁྱོད་ནི་སྣར་མའི་མིག་ཏུ་སྡུག་པ་དེད་དཔོན་བཟང་། །ཅི་ག་བདག་གི་སྡུག་པ་ཨུཏྤ་ལ་ལྟ་བུའི་མིག །ཡིད་འཕྲོག་ཅེས་བགྱི་ཁྱོད་ཀྱིས་ས་སྟེངས་གཟིགས་ལགས་སམ། །ཞེས་སྨྲས་ནས། སྔོན་གྱི་དགའ་བ་ཉམས་སུ་མྱོང་བ་དྲན་ཞིང་སོང་བ་ལས་རི་དགས་མོ་ཞིག་མཐོང་ནས་དེ་ལ་ཡང་སྨྲས་པ། ཀྱེ་མ་རི་དགས་མོ་ཁྱོད་རྩྭ་ཆུ་ལོ་མ་ཟ། །ཁྱོད་ནི་ལེགས་གྱུར་བདེར་སྤྱོད་བདག་ནི་རྔོན་པ་མིན། །རི་དགས་མོ་ལྟར་མིག་དཀྱུས་རིང་བས་གཟུགས་བཟང་བ། །བདག་གི་ཡིད་འཕྲོག་ཅེས་བྱ་ཁྱོད་ཀྱིས་མཐོང་གྱུར་ཏམ། །དེ་དེ་ནས་སོང་སྟེ་ཕྱོགས་གཞན་ཞིག་ཏུ་ཕྱིན་པ་དང་། ཚལ་མེ་ཏོག་དང་འབྲས་བུས་མཛེས་པར་བྱས་པའི་སྙིང་པོ་ལ་བུང་བ་དག་ལོངས་སྤྱོད་པ་མཐོང་ནས་དེ་ནས་བུང་བ་ཞིག་ལ་སྨྲས་པ། སྦྲང་རྩིའི་བུང་བ་རི་བོ་མཐོན་ཏིང་ལྟ་བུའི་མཆོག །སྨྱུག་མའི་སྦུབས་དང་པད་མ་དག་ལ་གནས་འཆའ་བ། །སྐྲ་ཡི་ཚོགས་རིང་ཁ་དོག་བུང་བ་ལྟར་གནག་པ། །བདག་གི་ཡིད་འཕྲོག་ཅེས་བྱ་ཁྱོད་ཀྱིས་མཐོང་གྱུར་ཏམ། །ཕྱོགས་དེ་ནས་ཀྱང་སོང་བ་དང་སྦྲུལ་ཞིག་མཐོང་ངོ་། །མཐོང་ནས་ཀྱང་སྨྲས་པ། ཀྱེ་མའོ་སྦྲུལ་གནག་ཤིང་ལོ་ལྟ་བུར་ལྕེ་གཡོ་ཞིང་། །མིག་དང་ཁ་ཡི་ནང་ནས་དུད་པའི་ཚོགས་འབྱིན་པ། །ཁྱོད་ཀྱི་གདུག་པའི་མེ་དང་འདོད་ཆགས་མེར་མི་མཚུངས། །བདག་གི་ཡིད་འཕྲོག་ཅེས་བྱ་ཁྱོད་ཀྱིས་མཐོང་གྱུར་ཏམ། །དེ་ནས་ཀྱང་ཕྱོགས་གཞན་ཞིག་ཏུ་སོན་པ་དང་། ཚལ་གཞན་ཞིག་ན་ཁུ་བྱུག་སྒྲ་འབྱིན་པ་ཞིག་མཐོང་ངོ་།