བུ་རམ་ཤིང་དང་བ་ལང་དང་། མ་ཧེ་ཕུན་སུམ་ཚོགས་པ་ན་ཆོས་ཀྱི་རྒྱལ་པོ་ཆོས་དང་ལྡན་པ་དང་། ཆོས་བཞིན་གྱིས་རྒྱལ་སྲིད་བྱེད་དུ་འཇུག་གོ། །གྲོང་ཁྱེར་དེ་ན་ཡང་མཚོ་ཆེན་པོ་ཨུཏྤ་ལ་དང་པད་མ་དང་ཀུ་མུ་ད་དང་། པད་མ་དཀར་པོས་གང་བ། ངང་པ་དང་ངུར་པ་དང་བྱ་ཀཱ་རཎྜ་བས་མཛེས་པར་བྱས་པ་ཡིད་དུ་འོང་བ་ཡོད་དོ། །མཚོ་དེ་ན་ཀླུའི་བུ་སྐྱེ་བ་སྣ་ཚོགས་པ་ཞེས་བྱ་བ་གནས་ཏེ། དེས་དུས་དུས་སུ་ཆར་གྱི་རྒྱུན་ལེགས་པར་ཕབ་པས་ས་གཞི་ལྷག་པར་ལོ་ཐོག་ཕུན་སུམ་ཚོགས་པར་གྱུར་ཏོ། །ཡུལ་ཡང་བཟའ་བ་དང་བཏུང་བ་ཤིན་ཏུ་མོད་ལ། འཇིག་རྟེན་ཡང་སྦྱིན་པ་དང་། མཆོད་པ་དང་བསྙེན་བཀུར་དང་ལྡན་པས་དགེ་སྦྱོང་དང་། བྲམ་ཟེ་དང་བཀྲེན་པ་དང་ཕོངས་པ་རྣམས་ལ་ཁ་ཟས་སྦྱིན་པར་བྱེད་དོ། །ལྷོ་ཕྱོགས་ཀྱི་ལྔ་ལེན་པའི་རྒྱལ་པོ་ནི་ཆོས་མ་ཡིན་པ་ལ་ལྷག་པར་གནས་པ། གཏུམ་པ། གཟུ་ལུམས་ཅན། སྤྲོ་ཐུང་བ་ཞིག་པས་ཆོས་མ་ཡིན་པས་རྒྱལ་སྲིད་བྱེད་ཅིང་ཆད་པ་དང་། རྡེག་པ་དང་། འཚོག་པ་དང་། གསོད་པ་དང་། འཛིན་པ་དང་། འཆིང་བ་དང་། སུ་མི་འདོད་དང་། ཁོང་སྒྲིལ་དང་། གནོད་པ་སྣ་ཚོགས་ཀྱིས་ཡུལ་ན་གནས་པའི་སྐྱེ་བོ་རྣམས་ལ་རྟག་ཏུ་སྐྲག་པར་བྱེད་དོ། །དེས་ཆོས་མ་ཡིན་པ་ལ་ལྷག་པར་གནས་པས་དེས་ལྷ་ཡང་དུས་དུས་སུ་ཆར་གྱི་རྒྱུན་ལེགས་པར་མི་འབེབས་སོ། །དེས་ན་སྐྱེ་བོའི་ཚོགས་དེ་འཇིགས་པ་དང་། ཡི་ཆད་པས་རང་གི་སྲོག་ལ་ཡང་མི་ལྟ་བར་ཡུལ་ཡོངས་སུ་སྤངས་ཏེ་བྱང་ཕྱོགས་ཀྱི་ལྔ་ལེན་པའི་རྒྱལ་པོའི་ཡུལ་དུ་དོང་ནས་གནས་སོ། །ཇི་ཙམ་དུས་གཞན་ཞིག་ན་ལྷོ་ཕྱོགས་ཀྱི་ལྔ་ལེན་པའི་རྒྱལ་པོ་རི་དགས་འཆོར་བའི་ཚུལ་དུ་བྱས་ནས་ཡུལ་རྣམས་བརྟག་པའི་ཕྱིར་བྱུང་བ་དང་། གྲོང་རྡལ་དང་གྲོང་ཁྱེར་གང་ཡིན་པ་དག་ནི་སྟོངས་པར་གྱུར་ཅིང་། སྐྱེད་མོས་ཚལ་དང་ལྷ་ཁང་རྣམས་ནི་ཞིག་རལ་དུ་གྱུར་པར་མཐོང་ངོ་། །མཐོང་ནས་ཀྱང་བློན་པོ་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་གྲོང་རྡལ་དང་གྲོང་ཁྱེར་འདི་སྟོངས་པར་གྱུར་ཅིང་། སྐྱེད་མོས་ཚལ་དང་ལྷ་ཁང་རྣམས་ནི་ཞིག་རལ་དུ་གྱུར།