།གང་ཞིག་ལག་ན་མཚོན་ཐོགས་གཡུལ་ངོར་འཇུག །དེ་ནི་དཔའ་བོ་མིན་ཞེས་ཐུབ་རྣམས་གསུང་། །གང་དག་འཇིགས་པ་མེད་པར་སྦྱིན་གཏོང་བ། །དེ་དག་དཔའ་བོ་ཡིན་ཞེས་ཀུན་མཁྱེན་གསུང་། །རྒྱལ་པོ་ཆེན་པོ་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་ནོར་བཟངས་ཞེས་བྱ་བ་གང་གིས་གྲོང་ཁྱེར་བརྒྱད་ཁྲི་བཞི་སྟོང་དུ་མཆོད་སྦྱིན་གྱི་གནས་བརྩིགས་ཏེ་ལོ་མང་པོ་དང་ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་སྦྱིན་པ་དག་བྱིན། བསོད་ནམས་དག་བྱས་པ་དེ་གཞན་ཞིག་ཡིན་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ང་ཉིད་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་ནོར་བཟངས་ཞེས་བྱ་བ་དེར་གྱུར་ཏེ། ང་ཉིད་ཀྱིས་དེ་ན་གྲོང་ཁྱེར་བརྒྱད་ཁྲི་བཞི་སྟོང་དུ་མཆོད་སྦྱིན་གྱི་གནས་བརྩིགས་ཏེ་ལོ་མང་པོ་དང་ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་སྦྱིན་པ་དག་བྱིན། བསོད་ནམས་དག་བྱས་སོ། །རྒྱལ་པོ་ཆེན་པོ་ངས་སྦྱིན་པའམ་སྦྱིན་པའི་བགོ་བཤའ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངའི་སྦྱིན་པ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་སྦྱིན་པ་དག་བྱིན། བསོད་ནམས་དག་བྱས་ཏེ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མ་ཐོབ་པ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བ་ཡུལ་ལྔ་ལེན་པར་རྒྱལ་པོ་གཉིས་བྱུང་སྟེ། བྱང་ཕྱོགས་ཀྱི་ལྔ་ལེན་དང་ལྷོ་ཕྱོགས་ཀྱི་ལྔ་ལེན་པའོ། །དེ་ལ་བྱང་ཕྱོགས་ཀྱི་ལྔ་ལེན་པ་ནོར་ཅན་ཞེས་བྱ་བ་གྲོང་ཁྱེར་གླང་པོའི་ཁྱིམ་ཞེས་བྱ་བ་ན་འབྱོར་པ་དང་རྒྱས་པ་དང་བདེ་བ་དང་། ལོ་ལེགས་པ་སྐྱེ་བོ་དང་མི་མང་པོས་གང་བ་འཐབ་པ་དང་། ཁྲག་ཁྲུག་དང་འགྱེད་པ་དང་ཆོམ་རྐུན་མེད་པ་ནད་རབ་ཏུ་ཞི་བར་གྱུར་པ་འབྲས་སཱ་ལུ་དང་།