།དེ་རྣམས་ཆས་ནས་རྒྱལ་པོ་མེ་ལོང་གདོང་གང་ན་བ་དེར་དོང་སྟེ་ཕྱིན་ནས་དབྱུག་གུ་ཅན་གྱིས་རྒྱལ་པོ་ལ་རྒྱལ་བ་དང་ཚེ་སྤེལ་བ་དག་བྱས་ནས་ཕྱོགས་གཅིག་ཏུ་འདུག་གོ། །གཞན་དག་གིས་ཀྱང་རྐང་པ་གཉིས་ལ་མགོ་བོས་ཕྱག་བྱས་ཏེ་འཁོད་པ་དང་། རྒྱལ་པོས་དབྱུག་གུ་ཅན་ལ་དྲིས་པ་ཁྱོད་ཅི་ལ་འོངས་ལྷ་བདག་ནི་ཁྲིད་དོ་ཅི་ཞིག་གི་ཕྱིར། དབྱུག་གུ་ཅན་གྱིས་ཁྱིམ་བདག་དང་ཅི་ཞིག་ལས་རྩོད་པ་དེ་ཐམས་ཅད་སྨྲས་སོ། །རྒྱལ་པོས་ཁྱིམ་བདག་ལ་དྲིས་པ། ཁྱོད་ཀྱིས་གླང་མཐོང་ངམ་མཐོང་ལགས་སོ། །དབྱུག་གུ་ཅན་ཁྱོད་ཀྱིས་གླང་ཕུགས་སུ་བསྐྲད་དམ། ལྷ་བསྐྲད་ལགས་སོ། །རྒྱལ་པོས་སྨྲས་པ། གང་གི་ཕྱིར་གོ་བར་མ་བྱས་པས་དབྱུག་གུ་ཅན་འདིའི་ལྕེ་ཆོད་ཅིག །གང་གི་ཕྱིར་འདི་ཡང་གླང་མ་བཏགས་པས་མིག་ཕྱུང་ཤིག །ཁྱིམ་བདག་གིས་སྨྲས་པ། རྣམ་པ་གཅིག་ཏུ་བདག་གི་གླང་སྟོར། རྣམ་པ་གཉིས་སུ་བདག་གི་མིག་དབྱུང་བ་བས་དབྱུག་གུ་ཅན་རྒྱལ་མི་བསྔོའོ། །མི་དེས་སྨྲས་པ་ལྷ་དབྱུག་གུ་ཅན་འདིས་བདག་གི་རྟ་རྒོད་མ་ཞིག་བཀུམ་མོ། །ཇི་ལྟར་བསད། དེས་རྒྱས་པར་སྨྲས་པ་དང་། རྒྱལ་པོས་སྨྲས་པ། གང་གི་ཕྱིར་ཇི་ལྟར་ནུས་པ་དེ་བཞིན་དུ་ཁོག་ཤིག །ཅེས་སྨྲས་པས་མི་འདིའི་ལྕེ་ཆོད་ཅིག །གང་གི་ཕྱིར་རྡོ་བས་མི་སྣུན་པར་གཞན་གྱིས་དགག་མི་ནུས་པ་མེད་པས་དབྱུག་གུ་ཅན་འདི་ཡང་ལག་པ་ཆོད་ཅིག །མི་དེས་སྨྲས་པ་རྣམ་པ་གཅིག་ཏུ་བདག་གི་རྟ་རྒོད་མ་བཀུམ། རྣམ་པ་གཉིས་སུ་བདག་གི་ལྕེ་བཅད་པ་བས་དབྱུག་གུ་ཅན་རྒྱལ་མི་བསྔོའོ། །ཐ་ག་པའི་ཆུང་མས་རྒྱས་པར་སྨྲས་པ་དང་རྒྱལ་པོས་སྨྲས་པ། འདི་ཉིད་ཁྱོད་ཀྱི་ཁྱིམ་ཐབ་ཏུ་ཁྱེར་ཅིག །དེས་སྨྲས་པ་རྣམ་པ་གཅིག་ཏུ་ནི་འདིས་བདག་གི་སྡུམ་ཐབ་བཀུམ། རྣམ་པ་གཉིས་སུ་འདི་སྡུམ་ཐབ་ཏུ་འགྱུར་བ་བས་དབྱུག་གུ་ཅན་རྒྱལ་མི་བསྔོའོ། །ཤིང་མཁན་གྱིས་རྒྱས་པར་སྨྲས་པ་དང་། རྒྱལ་པོས་སྨྲས་པ་གང་གི་ཕྱིར་སྟེའུ་ཆུའི་དབུས་སུ་བོར་ནས་ཚིག་སྨྲས་པས་ཤིང་མཁན་འདི་ལྕེ་ཆོད་ཅིག །དབྱུག་གུ་ཅན་འདི་ཡང་ཆུའི་གཏིང་ཟབ་པར་མཐོང་བཞིན་དུ་ཤིང་མཁན་ལ་འདྲི་བས་མིག་དབྱུང་ངོ་།