དེའི་མཆིད་ནས་ཤིང་ལོ་མ་སྔོ་ཞིང་སྣུམ་པ་གཞན་དག་མཆིས་བཞིན་དུ་དེ་ལ་བདག་དགའ་བར་མི་འགྱུར་གྱི། འདི་ལ་བདག་མཆིས་ན་བདེ་བ་ཅི་ལས་གྱུར་ཅེས་གྱིས་ཤིག །དེ་རྣམས་ཆས་པ་ལས་རི་དགས་ཞིག་གིས་དབྱུག་གུ་ཅན་མཐོང་ནས་དེས་སྨྲས་པ། དབྱུག་གུ་ཅན་གང་དུ་འགྲོ། ཁོ་བོ་ནི་གང་དུ་ཡང་མི་འགྲོ་ན་འདི་དག་གིས་ཁོ་བོ་ཁྲིད་དོ། །གང་དུ། མེ་ལོང་གདོང་གི་དྲུང་དུའོ། །ཁོ་བོའི་ཕྲིན་ཡང་ཁྱེར་ལ་གནས་གཞན་དག་ན་གསིང་མ་དང་རྩྭ་སྔོན་པོ་དག་མཆིས་བཞིན་དུ་བདག་དེ་དག་ལ་མ་དད་པ་ལ་རྒྱུ་ཅི་ཞིག་མཆིས་ཞེས་གྱིས་ཤིག །དེ་རྣམས་ཆས་པ་དང་ཇི་ཙམ་ན་སྲེག་པ་ཞིག་གིས་མཐོང་ནས་སྨྲས་པ། གང་དུ་འདོང་ཞེས་བྱ་བ་ནས། འོ་ན་ཁོ་བོའི་ཕྲིན་ཡང་ཁྱེར་ཅིག་ཅེས་བྱ་བའི་བར་གོང་མ་བཞིན་དུ་སྟེ། བདག་ཕྱོགས་གཅིག་ཏུ་ནི་སྲེག་པའི་སྐད་འབྱིན་ལ། ཕྱོགས་གཞན་དུ་ནི་སྐད་གཞན་འབྱིན་པ། འདི་ལ་རྒྱུ་ཅི་ཞིག་མཆིས་ཞེས་གྱིས་ཤིག། །།འདུལ་བ་གཞི། བམ་པོ་བཞི་བཅུ་རྩ་བཞི་པ། ཕྱོགས་གཞན་ཞིག་ན་སྦྲུལ་ཞིག་གིས་མཐོང་ནས་ཞེས་བྱ་བ་ནས་འོ་ན་ཁོ་བོའི་ཕྲིན་ཡང་ཁྱེར་ཅིག་ཅེས་བྱ་བའི་བར་གོང་མ་བཞིན་དུ་སྟེ། བདག་ཕུག་ནས་ནི་བདེ་བར་འབྱུང་ལ་སླར་ནི་སྡུག་བསྔལ་གྱིས་འཇུག་པ་འདི་ལ་རྒྱུ་ཅི་ཞིག་མཆིས་ཞེས་གྱིས་ཤིག །སྦྲུལ་ཞིག་དང་ནེའུ་ལེ་གཉིས་ཕན་ཚུན་མི་མཐུན་ཞིང་འཐབ་པར་བྱེད་པ་ཞེས་བྱ་བ་ནས་འོ་ན་བདག་ཅག་གི་ཕྲིན་ཡང་ཁྱེར་ཅིག་ཅེས་བྱ་བའི་བར་གོང་མ་བཞིན་དུ་སྟེ། བདག་ཅག་ཉིན་པར་གཅིག་གིས་གཅིག་མཐོང་ནས་ཐབ་མོ་བགྱིད་ཀྱི་དགའ་བར་མི་འགྱུར་བ་འདི་ལ་རྒྱུ་ཅི་ཞིག་མཆིས་ཞེས་གྱིས་ཤིག །བག་སར་གཞོན་ནུ་མ་ཞིག་གིས་ཞེས་བྱ་བ་ནས་དེས་སྨྲས་པ། འོ་ན་བདག་གི་ཕྲིན་ཡང་ཁྱེར་ཅིག་ཅེས་བྱ་བའི་བར་གོང་མ་བཞིན་དུ་སྟེ། གང་གི་ཚེ་བདག་ཕའི་ཁྱིམ་ན་མཆིས་པ་དེའི་ཚེ་ནི་གྱོས་པོའི་ཁྱིམ་འཚལ་ལ། གང་གི་ཚེ་གྱོས་པོའི་ཁྱིམ་ན་མཆིས་པ་དེའི་ཚེ་ན་ཕའི་ཁྱིམ་འཚལ་བ་འདི་ལ་རྒྱུ་ཅི་ཞིག་མཆིས་ཞེས་གྱིས་ཤིག །དེ་རྣམས་ཆས་ནས་རྒྱལ་པོ་མེ་ལོང་གདོང་གང་ན་བ་དེར་དོང་སྟེ་ཕྱིན་ནས་དབྱུག་གུ་ཅན་གྱིས་རྒྱལ་པོ་ལ་རྒྱལ་བ་དང་ཚེ་སྤེལ་བ་དག་བྱས་ནས་ཕྱོགས་གཅིག་ཏུ་འདུག་གོ།