Degé Kangyur volume 2, F.166.b

དེ་ནས་བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་གྱི་མིང་ནས་སྨོས་ཏེ་ཡོན་བསྔོས་པ་འདི་སྐད་དུ་མཛད་དེ། གླང་པོ་རྟ་དང་ཤིང་རྟ་དཔུང་བུ་ཆུང་། །​ཞོན་ནས་གྲོང་ཁྱེར་ཡུལ་བཅས་འཁོལ་བྱེད་པ། །​ཟན་དྲོན་ལན་ཚྭ་དག་གིས་མ་བཏབ་ཅིང་། །​སྣུམ་བག་མེད་པའི་མ་ཐུ་ནི་ཡིན་པར་ལྟོས། །​དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །​བཙུན་པ་བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་གྱི་ཕོ་བྲང་དུ་གདུགས་ཚོད་ལན་མང་དུ་གསོལ་ནས་མིང་ནས་བརྗོད་དེ་ཡོན་བསྔོ་བ་མཛད་ན། འདི་ལྟ་བུའི་ཡོན་བསྔོ་བ་མཛད་པ་ནི་བདག་གིས་སྔོན་ཆད་ནི་ལན་འགའ་ཡང་མ་ཐོས་ལགས་སོ། །​བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཀོ་ས་ལའི་རྒྱལ་པོ་གསལ་རྒྱལ་གྱི་ནས་ཀྱི་དར་ཐུག་ལན་ཚྭས་མ་བཏབ་པ་ལ་བརྩམས་ཏེ་ལས་ཀྱི་རྒྱུ་བ་ཁྱོད་ཉན་པར་འདོད་དམ། བཅོམ་ལྡན་འདས་ད་དེའི་དུས་ལ་བབ་ལགས་སོ། །བདེ་བར་གཤེགས་པ་ད་དེའི་དུས་ལ་བབ་ལགས་ཏེ། བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་གྱི་ནས་ཀྱི་དར་ཐུག་ལན་ཚྭས་མ་སྩལ་བ་ལས་བརྩམས་ཏེ་ལས་ཀྱི་རྒྱུ་བ་བཤད་པ་བཅོམ་ལྡན་འདས་ལས་དགེ་སློང་རྣམས་ཀྱིས་ཐོས་ནས་འཛིན་པར་འགྱུར་ལགས་སོ། །​དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་སྔོན་བྱུང་བ་རི་འོར་ཞིག་ན་ཁྱིམ་བདག་ཅིག་གནས་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །​དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་གཟུགས་བཟང་བ་མཛེས་པ་བལྟ་ན་སྡུག་པ་ཞེས་བྱ་བ་ནས་བསྐྱེད་བསྲིངས་ཏེ་དེ་ཆེན་པོར་གྱུར་ཏོ་ཞེས་བྱ་བའི་བར་གོང་མ་བཞིན་ནོ། །​ཇི་ཙམ་ན་ཁྱིམ་བདག་དེས་ཆུང་མ་ལ་སྨྲས་པ། བཟང་མོ་བདག་ཅག་གི་བུ་ལོན་དེད་པ་དང་། ནོར་འཕྲོག་པ་སྐྱེས་ཀྱིས་བདག་ཟོང་ཐོགས་ཏེ་ཡུལ་གཞན་དུ་འགྲོའོ། །​དེས་སྨྲས་པ། རྗེའི་སྲས་དེ་བཞིན་མཛོད་ཅིག །​དེས་ཟོང་ཐོགས་ཏེ་ཡུལ་གཞན་ཞིག་ཏུ་སོང་བ་ལས་དེ་དེ་ཉིད་དུ་མ་སྟེས་ཏེ་ཤི་བར་གྱུར་ཏོ། །​དེ་ཆེད་པོ་མི་བདོག་པ་ཞིག་པས་དེའི་ཁྱིམ་གྱི་ནོར་རྣམས་ཟད་པས་དེའི་བུ་ཡང་སྡུག་བསྔལ་བར་གྱུར་པ་དང་། ཁྱིམ་བདག་དེའི་སྟེན་གྲོགས་ཤིག་ཡོད་པ་དེས་དེ་ལ་སྨྲས་པ།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8227#UT22084-001-006-8227