Degé Kangyur volume 2, F.152.b

སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཉ་དང་། ངང་པ་དང་། རུ་སྦལ་འདི་རྣམས་ཀྱིས་ལས་ཅི་ཞིག་བགྱིས་ན་དེས་ན་ངང་པ་དང་། ཉ་དང་། རུ་སྦལ་རྣམས་སུ་སྐྱེས་ལགས། ལས་ཅི་ཞིག་བགྱིས་ན་དེས་ན་ལྷ་རྣམས་སུ་སྐྱེས་ནས་བདེན་པ་མཐོང་བར་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངང་པ་དང་། ཉ་དང་། རུ་སྦལ་འདི་དག་ཉིད་ཀྱིས་ལས་རྣམས་བྱས་ཤིང་བསགས་པ་ཚོགས་རྙེད་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །​དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ་ཞེས་བྱ་བ་ནས། དེ་བཱ་རཱ་ཎ་སཱིའི་གྲོང་ཁྱེར་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ་ཞེས་བྱ་བའི་བར་གོང་མ་བཞིན་དུའོ། །​དེའི་བསྟན་པ་ལ་དེ་རྣམས་རབ་ཏུ་བྱུང་བར་གྱུར་ཏེ། དེ་ན་དགེ་སློང་དེ་རྣམས་ཀྱིས་བསླབ་པའི་གཞི་ཕྲ་མོ་ཕྲ་མོ་རྣམས་དྲལ་བས་ལས་དེའི་རྣམ་པར་སྨིན་པས་ཉ་དང་། ངང་པ་དང་། རུ་སྦལ་རྣམས་སུ་སྐྱེས་པར་གྱུར་ཏོ། །​གང་ཡང་ང་ལ་སེམས་མངོན་པར་དད་པར་བྱས་པ་དེས་ན་ལྷ་རྣམས་སུ་སྐྱེས་པར་གྱུར་ཏོ། །གང་ཡང་ཡང་དག་པར་རྫོགས་པའི་སངས་རྒྱས་འོད་སྲུང་ལས་ཚངས་པར་སྤྱོད་པ་སྤྱད་པ་དེས་ན་བདེན་པ་མཐོང་བར་བྱས་སོ། །​དགེ་སློང་དག་དེ་ལྟ་བས་ན། གཅིག་ཏུ་གནག་པའི་ལས་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་བརྩལ་བར་བྱ་སྟེ། དགེ་སློང་དག་ཁྱེད་ཅག་གིས་དེ་ལྟ་བུ་ལ་བསླབ་པར་བྱའོ། །​ཞེས་དེ་སྐད་ཅེས་བཀའ་སྩལ་ཏོ། །​ཞེས་བྱ་བའི་བར་གོང་མ་བཞིན་དུའོ། །​དེ་ནས་བཅོམ་ལྡན་འདས་ཆུ་བོ་གང་གཱ་རྒལ་བ་དང་ཡི་དགས་སྡོང་དུམ་ཚིག་པ་ལྟ་བུ། ཀེང་རུས་སྒྲེང་བ་ལྟ་བུ། རང་གི་སྐྲས་ལུས་ཡོག་པ། ལྟོ་རི་སུལ་ལྟར་འདུག་པ། ཁ་ཁབ་ཀྱི་མིག་ཙམ་ཡོད་པ་འབར་རབ་ཏུ་འབར། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་པ་ལྔ་བརྒྱ་ཙམ་གྱིས་ཡོངས་སུ་བསྐོར་ནས། དེ་རྣམས་ཀྱིས་ཐལ་མོ་སྦྱར་ཏེ། བཅོམ་ལྡན་འདས་ལ་གསོལ་པ། བཙུན་པ་བདག་ཅག་ཡི་དགས་རྣམས་ནི་རྣམ་པར་



The English translation of this folio by 84000 Translating the words of the Buddha can be found at:
https://read.84000.co/translation/toh1-6.html?part=UT22084-001-006-8199#UT22084-001-006-8199