བཙུན་པ་བདག་ཅག་ཡི་དགས་རྣམས་ནི་རྣམ་པར་ལྟུང་བའི་ལུས་ཅན་རྣམས་ལགས་ཏེ། སྔོན་གྱི་ལས་ཀྱི་ནོངས་པས་ཆབ་ཀྱང་མི་རྙེད་ལགས་ན་འཚལ་མ་མཐོང་བ་ལྟ་སྨོས་ཀྱང་ཅི་འཚལ། ཁྱོད་ནི་ཐུགས་རྗེ་ཆེན་པོ་མངའ་བ་ལགས་ན་བདག་ཅག་ལ་ཆབ་སྩོལ་ཅིག །བཅོམ་ལྡན་འདས་ཀྱིས་དེ་རྣམས་ལ་ཆུ་བོ་གང་གཱ་བསྟན་ནས། ཆུ་བསིལ་སྐྱེ་བོ་ཀུན་གྱིས་ཉེ་བར་སྤྱད་བྱ་བ། །སྐལ་ལྡན་ཤིང་རྟ་ཀླུང་ཆེན་འདི་ནི་གྲོང་དག་དང་། །ཡུལ་འཁོར་དག་དང་གྲོང་ཁྱེར་ཚིམ་པར་བྱེད་ཅིང་འབབ། །ཞིང་རྣང་སཱ་ལུ་ཀུ་མུ་ད་དང་ཨུཏྤལ་སྐྲུན། །ཡི་དགས་རྣམས་ཀྱིས་གསོལ་པ། ཆུ་བོ་སྐྱེ་བོ་ཀུན་གྱིས་ཉེ་བར་སྤྱད་བགྱི་བ། །སྐལ་ལྡན་ཤིང་རྟ་འབབ་འདི་བདག་ཅག་རྣམས་ལ་སྐམས། །འདི་ནི་ཁྲག་གི་དྲི་མས་གང་ཞིང་ལག་པ་ན། །དབྱུག་པ་དགྲ་སྟར་བཅས་པ་ཐོགས་པས་འདི་བསྲུངས་མཐོང་། །བཅོམ་ལྡན་འདས་ཀྱིས་གང་གཱའི་ལྷ་ལ་བཀའ་སྩལ་པ། ཁྱོད་ནི་གྲོང་དང་ཡུལ་འཁོར་གྲོང་ཁྱེར་ཚིམ་བྱེད་ཅིང་། །ཞིང་རྣང་སཱ་ལུ་ཀུ་མུ་ད་དང་ཨུཏྤལ་སྐྲུན། །ཅི་ཕྱིར་ཡི་དགས་སྐོམ་པས་རབ་ཉེན་ཚིམ་མི་བྱེད། །ཁྱོད་ལ་བྱིས་པའི་སྐྱེ་བོ་སྡུག་བསྔལ་སྙིང་རྗེ་མེད། །གང་གཱའི་ལྷས་གསོལ་པ། བྱིས་པའི་སྐྱེ་བོ་ལ་བདག་འཇིགས་པས་མ་ལགས་ཤིང་། །ཚིག་རྩུབ་སྒྱུས་ཀྱང་མི་མཐུན་ཆབ་གཏོང་མི་བགྱིད་དེ། །ནོངས་བགྱིས་སྒྲིབ་པ་ཆེན་པོས་བསྒྲིབས་པ་འདི་དག་ལ། །ཆུ་བོ་སྐམས་གྱུར་འདི་ལ་བདག་གིས་ཅི་ཞིག་ནོངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཆེན་པོ་ཡི་དགས་རྣམས་ལ་ཆུ་ལུད་ཅིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ཀྱི་ལྟར་མཉན་ནས་ཡི་དགས་རྣམས་ལ་ཆུ་བླུད་པར་བརྩམས་པ་དང་། ཡི་དགས་དེ་རྣམས་ཀྱི་ཁ་ཁབ་ཀྱི་མིག་ཙམ་པོ་དག་བསྐྱེད་པར་མ་ནུས་སོ། །དེ་ནས་བཅོམ་ལྡན་འདས་ཀྱི་རྫུ་འཕྲུལ་གྱིས་དེ་རྣམས་ཀྱི་ཁ་བསྐྱེད་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཆུ་བླུད་པ་དང་། དེ་རྣམས་སྐོམ་པས་ཉེན་པས་མང་དུ་འཐུངས་པས་ལྟོ་རྒྱས་པར་གྱུར་ཏོ། །དེ་ནས་བཅོམ་ལྡན་འདས་ལ་སེམས་དང་བ་བསྐྱེད་ནས་ཤིའོ་ཞེས་བྱ་བ་ནས། བདེན་པ་མཐོང་ནས་རང་གི་གནས་སུ་སོང་ངོ་།