Degé Kangyur volume 2, F.62.b

།ལོ་མ་བདུན་དང་འཆར་ཀ་དང་། །​མཉན་ཡོད་གདུ་བུ་ས་ཅན་དང་། །​སེང་གེའི་གྲོང་དང་གྲོང་གསར་དང་། །​གྲོང་ཁྱེར་དང་ནི་ཁྲེའུ་བརྩེགས། །​ཕྱི་མ་ནྱ་གྲོ་དྷ་གྲོང་སྟེ། །​གྲོང་ཁྱེར་དེ་དག་བཅུ་གཉིས་གསུངས། །​བཅོམ་ལྡན་འདས་འདོད་པ་མཐུན་པ་ན་འདོད་པ་མཐུན་པའི་ནགས་ཁྲོད་ན་བཞུགས་སོ། །​དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ང་ཟླ་བ་གསུམ་པོ་འདི་ལ་ནང་དུ་ཡང་དག་འཇོག་པར་བཞེད་ཀྱིས། ང་ལ་བསོད་སྙོམས་སྟོབས་པ་དང་། བཅྭ་ལྔ་པའི་གསོ་སྦྱོང་དེ་ཉིད་མ་གཏོགས་པར་དགེ་སློང་སུ་ཡང་མ་འོང་ཤིག །​བཅོམ་ལྡན་འདས་ཟླ་བ་གསུམ་པོ་དེ་ལ་ནང་དུ་ཡང་དག་འཇོག་ལ་ཞུགས་ནས་བསོད་སྙོམས་སྟོབས་པའི་དགེ་སློང་དང་། བཅྭ་ལྔ་པའི་གསོ་སྦྱོང་དེ་ཉིད་མ་གཏོགས་པར་དགེ་སློང་སུ་ཡང་དེར་མི་འགྲོའོ། །​དེ་ནས་བཅོམ་ལྡན་འདས་ཀྱིས་ཟླ་བ་གསུམ་པོ་དེ་ཁོ་ན་འདས་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །​བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ལ་གལ་ཏེ་གཞན་མུ་སྟེགས་ཅན་དང་ཀུན་དུ་རྒྱུ་རྣམས་ཉེ་བར་ལྷགས་ནས་འདི་སྐད་ཅེས་འདྲི་སྟེ། དགེ་སྦྱོང་གཽ་ཏ་མ་གནས་པ་གང་ཞིག་གིས་ཟླ་བ་གསུམ་པོ་འདི་ལ་ནང་དུ་ཡང་དག་བཞག་པར་གྱུར་ཅེས་འདྲི་ན། དེ་སྐད་ཅེས་དྲིས་པ་ལ་དབུགས་རྔུབ་པ་དང་འབྱུང་བས་བཞུགས་སོ་ཞེས་བརྗོད་པར་བྱའོ། །​དེ་ཅིའི་ཕྱིར་ཞེ་ན། དགེ་སློང་དག་ང་ནི་ཟླ་བ་གསུམ་པོ་འདི་ལ་དབུགས་རྔུབ་པ་དང་དབུགས་འབྱུང་བ་དྲན་པའི་གནས་པས་ནང་དུ་ཡང་དག་བཞག་སྟེ། ངས་དྲན་བཞིན་དུ་དབུགས་བརྔུབས་ན་ཡང་དྲན་བཞིན་དུ་བརྔུབས་སོ་སྙམ་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །​དྲན་བཞིན་དུ་དབུགས་ཕྱུང་ན་ཡང་དྲན་བཞིན་དུ་དབུགས་ཕྱུང་ངོ་སྙམ་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །​རིང་པོ་དང་ཐུང་ངུ་དང་། ལུས་ཐམས་ཅད་ཡང་དག་པར་མྱོང་ནས་དབུགས་བརྔུབས་ན་ལུས་ཐམས་ཅད་ཡང་དག་པར་མྱོང་ནས་དབུགས་བརྔུབས་སོ་སྙམ་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །​ལུས་ཐམས་ཅད་ཡང་དག་པར་མྱོང་ནས་དབུགས་ཕྱུང་ན་ཡང་ལུས་ཐམས་ཅད་ཡང་དག་པར་མྱོང་ནས་དབུགས་ཕྱུང་ངོ་སྙམ་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8019#UT22084-001-006-8019