།ལུས་ཐམས་ཅད་ཡང་དག་པར་མྱོང་ནས་དབུགས་ཕྱུང་ན་ཡང་ལུས་ཐམས་ཅད་ཡང་དག་པར་མྱོང་ནས་དབུགས་ཕྱུང་ངོ་སྙམ་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ལུས་ཀྱི་འདུ་བྱེད་ཤིན་ཏུ་སྦྱངས་ནས་དབུགས་བརྔུབས་པ་དང་། ལུས་ཀྱི་འདུ་བྱེད་ཤིན་ཏུ་སྦྱངས་ནས་དབུགས་ཕྱུང་ན་ཡང་དབུགས་ཕྱུང་ངོ་དབུགས་བརྔུབས་སོ་སྙམ་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ་ཞེས་བྱ་བ་ནས། འགོག་པར་རྗེས་སུ་ལྟ་ཞིང་དབུགས་ཕྱུང་ངོ་སྙམ་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་དེ་ལ་ང་འདི་སྙམ་དུ་སེམས་ཏེ། བདག་གིས་གནས་པ་རགས་པ་མངོན་པར་འདུས་བྱས་ཤིང་བསམས་ཀྱིས་མ་ལ་བདག་གིས་གནས་པ་དེ་ཉིད་ལས་ཡང་དག་པར་འདས་ཏེ་བོར་ནས་ཆེས་ཕྲ་བ་འདིས་ལན་མང་དུ་གནས་པར་བྱའོ་སྙམ་ནས། ངས་གནས་པ་དེ་ཉིད་ལས་ཡང་དག་པར་འདའ་བར་བྱ་བའི་ཕྱིར་བོར་ནས་གནས་པ་ཆེས་ཕྲ་བ་འདིས་ལན་མང་དུ་གནས་སོ། །དེ་ནས་ལྷ་གསུམ་ཞིག་ང་གང་ན་བ་དེར་འོངས་ཏེ་ཕྱིན་ནས་ལྷ་གཅིག་ནི་འདི་སྐད་ཅེས། དགེ་སྦྱོང་གཽ་ཏ་མ་ནོངས་སོ་ཞེས་ཟེར་རོ། །གཉིས་པ་ནི་འདི་སྐད་ཅེས་འདི་ནོངས་པ་ནི་མ་ཡིན་ཏེ། འོན་ཀྱང་ནོངས་པར་མཛད་པ་ཡིན་ནོ་ཞེས་ཟེར་རོ། །ལྷ་གསུམ་པ་ནི་འདི་སྐད་ཅེས་ནོངས་པ་ཡང་མ་ཡིན་ནོངས་པར་མཛད་པ་ཡང་མ་ཡིན་ཏེ། འོན་ཀྱང་དགྲ་བཅོམ་པ་རྣམས་ཀྱི་གནས་པ་ནི་འདི་ལྟ་བུར་ཞི་བ་ཁོ་ན་ཡིན་ནོ་ཞེས་ཟེར་རོ། །དགེ་སློང་དག་གང་ཡང་དག་པར་སྨྲ་བ་ན་འཕགས་པའི་གནས་པ་དང་། ལྷའི་གནས་པ་དང་། ཚངས་པའི་གནས་པ་དང་། མི་སློབ་པའི་གནས་པ་ཞེས་བྱ་བར་སྨྲ་བར་འགྱུར་བ་གང་ཡིན་པ་དེ་ནི་དེ་བཞིན་གཤེགས་པའི་གནས་པ་ཡིན་ཏེ། སློབ་པའི་གང་ཟག་རྣམས་མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་ཞུགས་པ་ཡིན། མི་སློབ་པའི་གང་ཟག་རྣམས་མཐོང་བའི་ཆོས་ཁོ་ན་ལ་བདེ་བར་གནས་པར་བྱ་བའི་ཕྱིར་ཞུགས་པ་ཡིན་ནོ། །དེ་ཡང་དག་པར་སྨྲ་བ་ན་དབུགས་རྔུབ་པ་དང་། དབུགས་འབྱུང་བའི་དྲན་པས་གནས་པ་སྨྲ་བར་འགྱུར་རོ།