Degé Kangyur volume 1, F.30.a

བསགས་པ་ཀུན་གྱི་མཐའ་ཟད་ཅིང་། མཐོན་པོ་རྣམས་ནི་མཐའ་ལྟུང་འགྱུར། །​ཕྲད་པའི་མཐའ་ནི་འབྲལ་བ་སྟེ། །​གསོན་པའི་མཐའ་ནི་འཆི་བ་ཡིན། །​ཞེས་བྱ་བ་ཡིན་པས་དུས་ཀྱི་ཆོས་དང་ལྡན་པར་གྱུར་ཏོ། །​དེ་དེ་རྣམས་ཀྱི་གོས་སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་གི་ཕྱོགས་བརྒྱན་ཏེ་དུར་ཁྲོད་དུ་བསྐྱལ་ནས་བསྲེགས་ཏེ། དེའི་འོག་ཏུ་མྱ་ངན་བསང་བདག་བྱས་ནས་འཁོད་དོ། །​གསེར་གླིང་ནས་བྲམ་ཟེའི་ཁྱེའུ་རལ་པ་གསེར་འདྲ་ཞེས་བྱ་བ་ཞིག་མཐར་གྱིས་རྒྱལ་པོའི་ཁབ་ཏུ་ཕྱིན་ནས་དེ་དེ་རྣམས་ཀྱི་འདུག་གནས་སུ་ཞུགས་པ་དང་ཉེ་རྒྱལ་གྱིས་སྨྲས་པ། བྲམ་ཟེའི་ཁྱེའུ་ཁྱོད་དེ་བར་ག་ལས་འོངས། དེས་སྨྲས་པ། གསེར་གླིང་ནས་སོ། །​བྲམ་ཟེའི་ཁྱེའུ་ཁྱོད་ཀྱིས་གསེར་གླིང་ན་ངོ་མཚར་དང་རྨད་དུ་བྱུང་བའི་ཆོས་ཅུང་ཟད་ཅི་མཐོང་། དེས་སྨྲས་པ། བདག་གིས་ངོ་མཚར་དང་རྨད་དུ་བྱུང་བའི་ཆོས་ཆེན་པོ་མ་མཐོང་སྟེ། འདི་ལྟར་བདག་གིས་གསེར་གླིང་ན་ངོ་མཚར་དང་རྨད་དུ་བྱུང་བའི་ཆོས་ཅུང་ཟད་ཅི་མཐོང་བ་དེ་ཉོན་ཅིག །​གསེར་གླིང་ན་རྒྱལ་པོ་གསེར་བདག་ཅེས་བྱ་བ་དུས་ལ་བབ་པ་དེའི་ཆུང་མ་མེའི་ཕུང་པོར་མཆོངས་སོ། །​དུས་གང་གི་ཚེ། དུས་མང་གེ་མོ་ཞིག་གི་ཚེའོ། །​ཟླ་བ་གང་ལ། ཟླ་བ་མང་གེ་མོ་ཞིག་ལའོ། །​ཉི་མ་གང་ལ། ཉི་མ་མང་གེ་མོ་ཞིག་ལའོ། །​དེས་དྲིས་པ་གླེགས་བུ་ལ་བྲིས་པ་བལྟས་ན་ཇི་ཙམ་ན་ཐམས་ཅད་དེ་ཁོ་ན་བཞིན་དུ་མཐོང་ནས་ཉེ་རྒྱལ་གྱིས་པང་ནས་སྐྱེས་ལ་སྨྲས་པ། མཁན་པོས་སློབ་དཔོན་གྱི་དཔེ་མཁྱུད་བྱས་ཏེ། དེས་ཤིན་ཏུ་བདུད་རྩི་རྙེད་ན་བདག་ཅག་ལ་བདུད་རྩིའི་བགོ་བཤའ་མ་བྱས་ཏེ། འདི་ལྟར་ལྷའི་མིག་གིས་ཡུལ་གཞན་ན་འདུག་པའི་གཟུགས་དག་མཐོང་བ་དང་། ལྷའི་རྣ་བས་སྒྲ་ཡིད་དུ་འོང་བ་དག་ཐོས་པ་ལས་ན། དེས་བདུད་རྩི་མ་རྙེད་དོ་ཞེས་བྱ་བ་ནི་ཆོས་མེད་དོ། །​པང་ནས་སྐྱེས་ཀྱིས་བསམས་པ། ཉེ་རྒྱལ་འདི་ནི་ཤེས་རབ་ཅན་ཡིན་པས་འདིས་ཀྱང་བདུད་རྩི་རྙེད་ན་བདག་ལ་མི་རྗོད་པ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ་སྙམ་ནས་དེས་སྨྲས་པ། ཉེ་རྒྱལ་ཚུར་ཤོག་ཁྲིམས་སུ་བྱ་བ་བཅས། བདག་ཅག་གཉིས་ལས་གང་གིས་དང་པོར་བདུད་རྩི་རྙེད་པ་དེས་ཕན་ཚུན་བསྙད་པར་བྱའོ་ཞེས་དེ་གཉིས་ཀྱིས་ཁྲིམས་སུ་བྱ་བ་དེ་ལྟ་བུ་བཅས་ཏེ་ལྗོངས་རྒྱུར་དོང་ངོ་།



The English translation of this folio by 84000 - Translating the words of the Buddha can be found at:
https://read.84000.co/translation/toh1-1.html?part=UT22084-001-001-29098#UT22084-001-001-29098