།སེམས་ཅན་དེ་དག་གིས་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཅིང་དེ་དག་ཐམས་ཅད་ཀྱང་དེ་བཞིན་གཤེགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་དཔག་ཏུ་མེད་པ་དག་གི་དོན་མཛད་དེ་ཡོངས་སུ་མྱ་ངན་ལས་འདས་སོ། །བྱང་ཆུབ་སེམས་དཔའ་མཆོག་གི་བློ་གྲོས་དེས་དེ་བཞིན་གཤེགས་པ་དེ་དག་ཐམས་ཅད་འབྱུང་བ་དག་བཞུགས་པ་དང་། ཡོངས་སུ་མྱ་ངན་ལས་འདས་པ་དག་གི་ཆོས་རྣམ་པ་གསུམ་ཡོངས་སུ་བཟུང་ངོ་། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་མཆོག་གི་བློ་གྲོས་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་མཆོག་གི་བློ་གྲོས་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་སེམས་ཅན་ངོ་བོ་ཉིད་མེད་པར་ངེས་པར་རིག་པར་བྱའོ། །མཽད་གལ་གྱི་བུ་ངས་མ་རིག་པ་ཤེས་པར་བྱ་བའི་དོན་དུ་སྔོན་ཞེས་བྱ་བ་ནས། བདག་གིས་ཇི་ལྟར་མངོན་པར་འདུ་བྱ་སྙམ་པའི་བར་སྔ་མ་བཞིན་དུ་སྦྱར་རོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་དྲང་སྲོང་རིག་བྱེད་ཤེས་པ་ཞེས་བྱ་བ་རིག་བྱེད་ཐམས་ཅད་ཤེས་པ། བསྟན་བཅོས་ཀྱི་ཕ་རོལ་ཏུ་ཕྱིན་པ། དོན་ཐམས་ཅད་རིག་པ། རྫུ་འཕྲུལ་ཆེ་ཞིང་གཟི་བརྗིད་ཆེ་ལ་མཐུ་ཆེ་བ། ཕྱི་རོལ་གྱི་ལམ་གྱིས་འདོད་ཆགས་དང་བྲལ་བ་ཞིག་བྱུང་སྟེ། དེའི་ཚེའི་ཚད་ལོ་སྟོང་ཕྲག་དགུ་བཅུར་གྱུར་ཏོ། །དེས་ལོ་སྟོང་ཕྲག་བརྒྱད་ཅུར་ནམས་ཀྱང་གློས་མ་ཕབ་ཅིང་། ནམས་ཀྱང་རྨུགས་པ་དང་གཉིད་མ་ལོག་སྟེ། གཞན་དུ་ན་སྡུག་བསྔལ་འདི་ག་ལས་བྱུང་ཞེས་དེ་ལྟར་སེམས་ཀྱིས་སེམས་སོ། །དེ་འདི་སྙམ་དུ་སེམས་ཏེ། མི་ཤེས་པའི་དབང་ལས་གཞན་མ་ཡིན་ཏེ། མི་ཤེས་པ་ནི་འཁོར་བའི་རྒྱུན་ཆགས་པར་འགྱུར་ལ། ཤེས་ཤིང་མཐོང་བ་ནི་འཁོར་བ་ལྡོག་པར་འགྱུར་རོ་སྙམ་མོ། །དེ་དེ་ལྟར་ཚུལ་བཞིན་ཡིད་ལ་བྱེད་པས་སོ་སོར་རྟོག་པ་ན་གནས་གཙང་མའི་རིས་ཀྱི་ལྷ་བྱེ་བ་ཕྲག་བརྒྱད་ཅུ་དག་སྟེང་གི་བར་སྣང་ལ་འཁོད་ནས་ཆེད་དུ་རྗོད་པ་འདི་ལ་ལན་གསུམ་དུ་ཆེད་དུ་བརྗོད་དོ། །ཀྱེ་མ་སེང་གེ་སེང་གེ་ཆེ།