དེ་བཞིན་དུ་དགེ་སྦྱོང་ངམ། བྲམ་ཟེ་གང་ལ་ལ་དག་འཇུག་པ་ན་འཇུག་སྟེ། དེ་དག་ཐམས་ཅད་འཇིག་ཚོགས་ལ་ལྟ་བའི་གཞིར་ལྟ་བར་གྱུར་པ་དྲུག་ཅུ་རྩ་གཉིས་དག་གིས་འཇུག་པར་འཇུག་གོ། །དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་སྐལ་བ་མེད་དོ། །དེ་དག་འཇིག་ཚོགས་ལ་ལྟ་བའི་གཞི་ལྟ་བར་གྱུར་པ་དྲུག་ཅུ་རྩ་གཉིས་དག་སྤངས་པའི་བྱང་ཆུབ་སེམས་དཔའ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ་སྙམ་ནས། དེ་ཏིང་ངེ་འཛིན་དེ་ལས་ལངས་ཏེ། ཇི་ལྟར་རྟོག་པའི་ཆོས་དག་སེམས་ཅན་རྣམས་ཡང་དག་པར་རབ་ཏུ་སྟོན་ཏོ། །དེའི་ལྟ་བར་གྱུར་པ་རྣམ་པར་བཤིག་པ་དེ་དག་ཐོས་ནས། སེམས་ཅན་དཔག་ཏུ་མེད་པ་རྣམས་མི་སྐྱེ་བའི་ཆོས་ལ་བཟོད་པ་སྐྱེས་ཤིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དྲང་སྲོང་ཆོས་རྣམ་པར་སྟོན་པ་ལ་དཔའ་བ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་དྲང་སྲོང་ཆོས་རྣམ་པར་སྟོན་པ་ལ་དཔའ་བ་ཞེས་བྱ་བར་གྱུར་ཏོ། །ངས་ལྟ་བར་གྱུར་པ་རྣམ་པར་བཤིག་པ་དེ་སེམས་ཅན་རྣམ་པ་དུ་མས་ཐོས་ནས་མི་སྐྱེ་བའི་ཆོས་ལ་བཟོད་པ་ཐོབ་བོ། །མཽད་གལ་གྱི་བུ་དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོས་ལྟ་བར་གྱུར་པ་རྟོག་པར་བྱ་བ་ལ་མཁས་པར་བྱའོ། །མཽད་གལ་གྱི་བུ་ངས་ལྟ་བའི་ཟག་པ་ཤེས་པ་ཀུན་འབྱུང་བ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། དེ་བཞིན་དུ་སྦྱར་ཏེ། བདག་གིས་ཇི་ལྟར་ཡང་དག་པར་རབ་ཏུ་བཤད་པར་བྱ་སྙམ་པའི་བར་དུའོ། །མཽད་གལ་གྱི་བུ་སྔོན་བྱུང་བ་འདས་པའི་དུས་ནས། དེའི་ཕ་རོལ་གྱི་ཡང་ཆེས་ཕ་རོལ་ན། དྲང་སྲོང་ཤེས་རབ་རྙོག་པ་མེད་པ་ཞེས་བྱ་བ། རྫུ་འཕྲུལ་ཆེ་བ། མཐུ་ཆེ་བ། ཕྱི་རོལ་གྱི་ལམ་གྱིས་འདོད་པ་རྣམས་ཀྱི་འདོད་ཆགས་དང་བྲལ་བ་ཞིག་བྱུང་ངོ་། །དེ་འདི་སྙམ་དུ་སེམས་ཏེ། གང་ཞིག་ཡོད་ན་ལྟ་བར་གྱུར་པ་ཡང་དག་པར་འབྱུང་བར་འགྱུར། གང་ཞིག་མེད་ན་ལྟ་བར་གྱུར་པ་རྣམས་སྤོང་བར་འགྱུར།