།གང་གི་ཚེ་བདག་དེ་དགའ་བའི་འདོད་ཆགས་དང་བྲལ་བ་ནས་དེ་བཞིན་དུ་སྦྱར་ཏེ། བསམ་གཏན་གསུམ་པའི་བར་ཉེ་བར་རྫོགས་པར་བྱས་ཏེ། གནས་པ་དེ་ཙམ་གྱིས་བདག་དེ་མཐོང་བའི་ཆོས་ལ་མྱ་ངན་ལས་འདས་པའི་མཆོག་ཐོབ་པར་འགྱུར་རོ། །དེ་ལ་གཞན་དག་འདི་སྐད་སྨྲ་སྟེ། བདག་དེ་དེ་ཙམ་གྱིས་མཐོང་བའི་ཆོས་ལ་མྱ་ངན་ལས་འདས་པའི་མཆོག་ཐོབ་པར་མི་འགྱུར་རོ། །གང་གི་ཚེ་བདག་དེ་བདེ་བ་ཡང་སྤངས། སྡུག་བསྔལ་ཡང་སྤངས་པ་ནས་བསམ་གཏན་བཞི་པའི་བར་ཉེ་བར་རྫོགས་པར་བྱས་ཏེ། གནས་པ་དེ་ཙམ་གྱིས་བདག་དེ་མཐོང་བའི་ཆོས་ལ་མྱ་ངན་ལས་འདས་པའི་མཆོག་ཐོབ་པར་འགྱུར་ཏེ། ལྔ་པོ་འདི་དག་ནི་མཐོང་བའི་ཆོས་ལ་མྱ་ངན་ལས་འདས་པར་སྨྲ་བ་ཡིན་ནོ།། །།བམ་པོ་ཉི་ཤུ་རྩ་ལྔ་པ་སྟེ་ཐ་མ། དེ་ལ་ཆད་པར་སྨྲ་བ་བདུན་གང་ཞེ་ན། འདི་ལ་ཁ་ཅིག་དག་འདི་སྐད་སྨྲ་འདི་ལྟར་ལྟ་བ་ཡོད་དེ། གང་གི་ཚེ་བདག་གཟུགས་ཅན་དེ་འབྱུང་བ་ཆེན་པོ་བཞི་ལས་གྱུར་པ་ཆད་པར་འགྱུར། རྣམ་པར་འཇིག་པར་འགྱུར། མི་འགྲུབ་པར་འགྱུར་ཏེ། དེ་ཙམ་གྱིས་བདག་དེ་ཡང་དག་པར་ཆད་པར་འགྱུར་རོ། །གང་གི་ཚེ་བདག་དེ་ལྷའི་འདོད་པའི་ཡོན་ཏན་དག་ལ་ཡོངས་སུ་སྤྱད་ནས་ཆད་པར་འགྱུར། རྣམ་པར་འཇིག་པར་འགྱུར། མི་འགྲུབ་པར་འགྱུར་ཏེ། དེ་ཙམ་གྱིས་བདག་དེ་ཡང་དག་པར་ཆད་པར་འགྱུར་རོ། །དེ་ལ་གཞན་དག་འདི་སྐད་སྨྲ་སྟེ། བདག་དེ་དེ་ཙམ་གྱིས་ཡང་དག་པར་ཆད་པར་མི་འགྱུར་རོ། །གང་གི་ཚེ་བདག་གཟུགས་ཅན་དེ་འཇིག་རྟེན་ཕ་རོལ་ནས་ཤི་ནས་མིའི་བཟང་པོ་ཡོངས་སུ་སྤྱད་དེ་ཆད་པར་འགྱུར། རྣམ་པར་འཇིག་པར་འགྱུར། མི་འགྲུབ་པར་འགྱུར་ཏེ། བདག་དེ་ཡང་དག་པར་ཆད་པར་འགྱུར་རོ། །དེ་བཞིན་དུ་སྦྱར་ཏེ། དེ་ལ་གཞན་དག་འདི་སྐད་སྨྲ་སྟེ། བདག་དེ་དེ་ཙམ་གྱིས་ཡང་དག་པར་ཆད་པར་མི་འགྱུར་རོ། །གང་གི་ཚེ་བདག་གཟུགས་ཅན་མ་ཡིན་པ་དེ་འཇིག་རྟེན་ཕ་རོལ་ནས་ཤི་ནས་ནམ་མཁའ་ལ་འདུ་ཤེས་སྐྱེ་མཆེད་དུ་ཉེ་བར་སོང་སྟེ་ཆད་པར་འགྱུར། རྣམ་པར་འཇིག་པར་འགྱུར། མི་འགྲུབ་པར་འགྱུར་ཏེ། དེ་ཙམ་གྱིས་ཞེས་བྱ་བ་ནས་དེ་བཞིན་དུ་སྦྱར་རོ། །དེ་ལ་གཞན་དག་འདི་སྐད་སྨྲ་སྟེ། བདག་དེ་དེ་ཙམ་གྱིས་ཡང་དག་པར་ཆད་པར་མི་འགྱུར་རོ། །