ངན་འགྲོར་སྐྱེས་པ་མཐོང་ནས། དེ་འདི་སྙམ་དུ་སེམས་ཏེ། གང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འགྲོ་བའི་ཆོས་དེ་གང་ཡིན་སྙམ་པ་དང་། གང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འགྲོ་བ་དེ་འདི་ཡིན་ཞེས་མ་དམིགས་སོ། །དེ་འདི་སྙམ་དུ་སེམས་ཏེ། ཆོས་འདི་དག་གི་རང་གི་ངོ་བོ་ནི་ཆུ་ཟླ་ལྟ་བུ་སྟེ། འདི་ལྟ་སྟེ་དཔེར་ན་ཆུའི་ནང་དུ་ཟླ་བ་སོང་བ་དང་། ཆུ་ཟླའི་དཀྱིལ་འཁོར་དུ་རྣམ་པར་རིག་པ་ཡང་སྣང་ངོ་། །དེ་བཞིན་དུ་ཆོས་འདི་དག་ཐམས་ཅད་ཀྱང་ཆུ་ཟླ་དང་འདྲ་སྟེ། ཆོས་རྣམས་ཀྱི་འཕོ་བ་ཡང་མེད་ལ། འཇིག་རྟེན་ཕ་རོལ་ཏུ་རྣམ་པར་རིག་པར་ཡང་སྣང་སྟེ། གང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བའི་ལས་འདི་ན་ཆུང་ཟད་ཀྱང་མེད་དོ་སྙམ་མོ། །དེའི་ཚེ་སྐྱེ་བོ་དག་ཆུ་ཟླ་ལྟ་བུའི་ཆོས་ཐམས་ཅད་ལ་བཙུད་ཅིང་རབ་ཏུ་བཀོད་དོ། །དེའི་སྐྱེ་བོ་དེ་དག་ཆུ་ཟླ་ལྟ་བུའི་ཆོས་ཐམས་ཅད་རྟོགས་ནས། ཕྱིར་མི་ལྡོག་པའི་ཆོས་ལ་རབ་ཏུ་གནས་སོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་གཙོ་བོ་བློ་གྲོས་དྲང་པོ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་གཙོ་བོ་བློ་གྲོས་དྲང་པོ་ཞེས་བྱ་བར་གྱུར་ཏོ། །ངས་སེམས་ཅན་ཁྲི་ཕྲག་དཔག་ཏུ་མེད་པ་དག་ཕྱིར་མི་ལྡོག་པ་ཉིད་ལ་རབ་ཏུ་བཙུད་དོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་སངས་རྒྱས་ཀྱི་ཞིང་ཡོངས་སུ་དག་པར་བྱས། སེམས་ཅན་དཔག་ཏུ་མེད་པ་དག་གི་དོན་བྱས་ནས་སེམས་ཅན་དཔག་ཏུ་མེད་པ་དག་ཕྱིར་མི་ལྡོག་པ་ཉིད་ལ་རབ་ཏུ་བཙུད་དོ། །ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་ཆོས་ཐམས་ཅད་ཆུ་ཟླའི་ངོ་བོ་ལྟ་བུར་མོས་པར་བྱའོ། །ཆོས་ཐམས་ཅད་ཆུ་ཟླའི་ངོ་བོ་ལྟ་བུར་མོས་པའི་བྱང་ཆུབ་སེམས་དཔའ་ནི་མྱུར་དུ་ཕྱིར་མི་ལྡོག་པའི་ས་ཐོབ་པར་འགྱུར་རོ། །མཽད་གལ་གྱི་བུ་ངས་ཕྱི་མའི་མཐའ་ཤེས་པ་ཀུན་འབྱུང་བ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་དཔག་ཏུ་མེད་པ་དག་མངོན་པར་འདུས་བྱས་པ་ནས་དེ་བཞིན་སྦྱར་རོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཚེ་ཕ་རོལ་གྱི་ཡང་ཆེས་ཕ་རོལ་ན་རྒྱལ་པོ་དྲང་སྲོང་ལྷ་བཟང་ཞེས་བྱ་བ་རྫུ་འཕྲུལ་ཆེ་ཞིང་གཟི་བརྗིད་ཆེ་ལ་མཐུ་ཆེ་བ་ཕྱི་རོལ་གྱི་ལམ་གྱིས་འདོད་པ་དག་གི་འདོད་ཆགས་དང་བྲལ་བ་ལྔ་མངོན་པར་ཤེས་པ་ཞིག་བྱུང་ངོ་།