མཽད་གལ་གྱི་བུ་སྔོན་བྱུང་བ་འདས་པའི་དུས་ན་རྒྱལ་པོ་ཟླ་བའི་ལྷ་ཞེས་བྱ་བ་ཞིག་བྱུང་ངོ་། །དེའི་བུ་མོ་ཟླ་བའི་ལྷ་མོ་ཞེས་བྱ་བ་མཁས་ཤིང་ཡིད་གཞུངས་ལ། རྒྱལ་པོའི་བྱ་བ་བྱེད་པ་ཞིག་བྱུང་སྟེ། དེ་ཕ་དེའི་རྒྱལ་སྲིད་རྗེས་སུ་སྐྱོང་ངོ་། །དེ་ནས་རྒྱལ་པོ་ཟླ་བའི་ལྷ་དེས་བུ་མོ་དེ་ལ་སྨྲས་པ། བུ་མོ་རྒྱུ་གང་གིས་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ། ཇི་ལྟར་ན་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འཐོབ་པར་འགྱུར་བ་ཁྱོད་ལ་དྲིའོ། །དེས་དེ་ལ་སྨྲས་པ། དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་ཞིང་ཤིན་ཏུ་མང་དུ་ཐོས་པ་རྣམས་ལ་བསྙེན་བཀུར་བགྱིས་ན་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པར་འགྱུར་ལགས་སོ། །དེ་ཅིའི་སླད་དུ་ཞེ་ན། དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་ཞིང་མང་དུ་ཐོས་པ་གང་དེ་དག་ལ་བསྙེན་བཀུར་བགྱིས་ན་ཤེས་པ་དེ་མངོན་པར་འདུ་བགྱིས་པར་འགྱུར་ཞིང་། ཤེས་པ་དེ་ལ་སློབ་པར་འགྱུར་ལགས་ཏེ། རྒྱུ་དེས་ན་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པར་འགྱུར་ལགས་སོ། །དེ་ནས་རྒྱལ་པོ་ཟླ་བའི་ལྷས་ལུང་བསྟན་པ་དེ་ཐོས་ནས། སློང་བ་པོ་རྣམས་ལ་མགུ་ཞིང་དགའ་ལ་ཡི་རངས་ཏེ། རབ་ཏུ་དགའ་ནས་དད་པ་མི་ཕྱེད་པ་ཐོབ་བོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན། ཟླ་བའི་ལྷ་ཞེས་བྱ་བའི་བུ་མོར་གྱུར་པ་དེ་གཞན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་རྒྱལ་པོ་ཟླ་བའི་ལྷ་ཞེས་བྱ་བའི་བུ་མོར་གྱུར་ཏོ། །དེའི་ཚེ་ཡང་ང་དབང་པོ་ཤེས་པ་ཀུན་འབྱུང་བ་ཤེས་པ་མཁྱེན་པར་གྱུར་ལ། ད་ལྟར་ཡང་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། སེམས་ཅན་རྣམས་ལ་ཡང་ཡང་དག་པར་རབ་ཏུ་བསྟན་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་དབང་པོ་ཤེས་པ་ཀུན་འབྱུང་བ་ཤེས་པ་ལ་བརྩོན་པར་བྱའོ། །མཽད་གལ་གྱི་བུ་ངས་དབང་པོ་ཤེས་པ་འགོག་པ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་རྣམ་པ་དུ་མ་དག་གི་བར་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་ན། དེའི་ཕ་རོལ་གྱི་ཡང་ཆེས་ཕ་རོལ་ན། དྲང་སྲོང་ཀུན་འབྱུང་ཞེས་བྱ་བ་ལྔ་མངོན་པར་ཤེས་པ་ཞིག་བྱུང་ངོ་།