།བྱང་ཆུབ་སེམས་དཔའ་ལྷའི་ཟླ་བ་དེས་སངས་རྒྱས་ཀྱི་ཞིང་བཅུའི་རྡུལ་ཕྲ་མོ་སྙེད་ཀྱི་ཕྱོགས་བཅུའི་འཇིག་རྟེན་གྱི་ཁམས་སུ་བྱང་ཆུབ་སེམས་དཔའ་ཁྲི་ཕྲག་དཔག་ཏུ་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཙུད་ནས་ཡོངས་སུ་མྱ་ངན་ལས་འདས་སོ། །དེའི་ཚེ་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་དྲི་མེད་ཟླ་བ་ཞེས་བྱ་བ་ཞིག་བྱུང་སྟེ། བྱང་ཆུབ་སེམས་དཔའ་ལྷའི་ཟླ་བ་དེས་ཡོངས་སུ་སྨིན་པར་བྱས། ཡོངས་སུ་རྫོགས་པར་བྱས་སོ། །དེ་འདི་སྙམ་དུ་སེམས་སོ། །གང་གི་ཚེ་བྱང་ཆུབ་སེམས་དཔའ་ལྷའི་ཟླ་བ་དེས་སེམས་ཅན་ཁྲི་ཕྲག་དཔག་ཏུ་མེད་པ་དག་བྱང་ཆུབ་ལ་བཙུད། སངས་རྒྱས་ཀྱི་རྒྱུད་ཡང་དག་པར་སྤེལ་ཏོ། །བདག་གིས་ཀྱང་བྱང་ཆུབ་སེམས་དཔའ་དེའི་རྗེས་སུ་བསླབ་པར་བྱ། བདག་གིས་ཀྱང་སངས་རྒྱས་ཀྱི་རྒྱུད་ཡང་དག་པར་སྤེལ་བར་བྱའོ་སྙམ་མོ། །དེས་ཕྱོགས་བཅུའི་འཇིག་རྟེན་དེ་ན་སེམས་ཅན་ཐམས་ཅད་ཀྱི་བསམ་པ་ཤེས་ནས། སེམས་ཅན་རྣམས་ཀྱི་མོས་པ་ཇི་ལྟ་བ་བཞིན་དུ་སྤྲུལ་པ་མངོན་པར་སྤྲུལ་ཏོ། །ལྷ་དག་ལ་མོས་པ་ནི་ལྷའི་སྤྲུལ་པ་མངོན་པར་སྤྲུལ། ཀླུ་དག་ལ་མོས་པ་དང་། གནོད་སྦྱིན་དག་ལ་མོས་པ་དང་། དྲི་ཟ་དག་ལ་མོས་པ་དང་། ལྷ་མ་ཡིན་དག་ལ་མོས་པ་དང་། མིའམ་ཅི་དག་ལ་མོས་པ་དང་། ལྟོ་འཕྱེ་ཆེན་པོ་དག་ལ་མོས་པ་ནི་ལྟོ་འཕྱེ་ཆེན་པོའི་སྤྲུལ་པ་མངོན་པར་སྤྲུལ་ཏོ། །དེ་ལྟར་གང་དང་གང་ལ་མོས་པ་དེ་དང་དེ་དག་གི་རྗེས་སུ་འཐུན་པའི་སྤྲུལ་པ་མངོན་པར་སྤྲུལ་ཏེ། སངས་རྒྱས་ཀྱི་ཞིང་དེར་སེམས་ཅན་ཇི་སྙེད་པ་དེ་དག་ཡུན་མི་རིང་བར་ལ་ལ་ནི་ཉན་ཐོས་ཀྱི་ཐེག་པ། ལ་ལ་ནི་རང་སངས་རྒྱས་ཀྱི་ཐེག་པར་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་ལྟར་སེམས་ཅན་དེ་དག་ཐམས་ཅད་སངས་རྒྱས་ཀྱི་ཞིང་དུ་དགེ་བའི་རྩ་བ་རྣམས་ལ་རབ་ཏུ་བཙུད་དོ། །དེར་ཡང་བྱང་ཆུབ་སེམས་དཔའ་རྣམས་ཀྱིས་དད་པ་བསྐྱེད་དེ། དགེ་བའི་རྩ་བ་དེས་སེམས་ཅན་ཐམས་ཅད་ཀྱི་མོས་པ་སྣ་ཚོགས་ཤེས་པ་ཐོབ་བོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་དྲི་མེད་ཟླ་བ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་དྲི་མེད་ཟླ་བ་ཞེས་བྱ་བར་གྱུར་ཏེ། ངས་སེམས་ཅན་དེ་སྙེད་ཅིག་ཐེག་པ་གསུམ་གྱིས་བཏུལ་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་སེམས་ཅན་ཡོངས་སུ་སྨིན་པར་བྱ་བ་ལ་བརྩོན་པར་བྱའོ།