ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བྱང་ཆུབ་སེམས་དཔའ་ཆུ་ལྷ་དེས་སྐྱེ་བོའི་ཚོགས་མང་པོ་དེ་དག་གི་མདུན་དུ་བཅོམ་ལྡན་འདས་དེ་བཞིན་གཤེགས་པ་སྤྱན་མཛེས་དེ་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། སྟོབས་བཅུ་སྒྲ་གྲགས་ལྷ་མིའི་འཇིག་རྟེན་དག་ན་འདྲ་མ་མཆིས། །རྒྱལ་བ་འགྲོ་བའི་བསམ་པ་མཁྱེན་ཅིང་ལྷག་པར་མོས་པ་རབ་ཏུ་མཁྱེན། །རྒྱལ་བ་འདྲེན་པ་མོས་པ་སྣ་ཚོགས་དང་ནི་དེ་འགོག་རབ་ཏུ་མཁྱེན། །ཇི་ལྟར་ལྷག་པར་མོས་པ་སྣ་ཚོགས་འགོག་པར་འགྱུར་བ་དེ་དག་གསུངས། །ཇི་ལྟར་རྣམ་འདྲེན་ཁྱོད་སྲས་སེམས་ཅན་ཀུན་གྱི་མོས་པ་སྣ་ཚོགས་དག །ཡང་དག་འགོག་འགྱུར་མངོན་པར་འཚལ་བ་དེ་དག་བདེ་གཤེགས་བདག་ལ་གསུངས། །རྒྱལ་བ་ཐམས་ཅད་གཟིགས་པ་ལྷ་དང་མི་ཡི་བསམ་པ་ཀུན་ལ་མཁས། །འཇིག་རྟེན་ཐམས་ཅད་ལ་ནི་ཕན་ཕྱིར་སྤྱན་མཛེས་དེས་ནི་ལུང་བསྟན་པ། །གང་ཚེ་འགོག་པར་འགྱུར་བ་ཡོངས་སུ་མཁྱེན་ནས་འགྲོ་བའི་དོན་ཆེན་མཛད། །དེ་བཞིན་གཤེགས་པས་འགྲོ་བའི་མོས་པ་སྣ་ཚོགས་ལུས་པ་མེད་པར་མཁྱེན། །ཇི་ལྟར་གཞོལ་བའི་རིས་ནི་འབབ་པའི་ཆུ་དག་འབབ་པར་འགྱུར་བ་ལྟར། །ཡུལ་ནི་གང་དང་གང་ལ་མི་ཡིས་ཕྱིར་བསྟེན་དེ་ལ་དེ་མོས་སོ། །དེ་ནི་བདེ་གཤེགས་བསྟན་པ་ཐོབ་ཅིང་དགེ་བའི་བཤེས་གཉེན་སངས་རྒྱས་ལ། །རིམ་པར་སྟེན་བྱེད་ཡུལ་ལ་མངོན་པར་ཆགས་པ་དོན་མེད་ཡོངས་སུ་ཤེས། །དེ་ནི་འཆིང་བ་ཤེས་ཤིང་ཡུལ་གྱི་སྐྱོན་ཡང་ཤེས་ནས་ཡོངས་སུ་སྤོང་། །ཡུལ་གྱི་སྐྱོན་དག་ཡོངས་སུ་མཐོང་བ་འགག་པར་བྱེད་ཅིང་ཕྱིར་མི་སྐྱེ། །གང་དག་ཡུལ་འདི་མཐོང་ནས་ཡང་དང་ཡང་དུ་གོམས་པ་འགོག་མི་བྱེད། །དེ་དག་ཡུལ་གྱི་རོ་མཆོག་དག་གིས་ཟིལ་ནོན་སྡུག་བསྔལ་སྐྱེད་པར་བྱེད། །དེ་ལྟ་བས་ན་མཁས་པའི་མི་དག་འགྲོ་ལ་ཕན་བསམས་བྱང་ཆུབ་མཆོག །མངོན་པར་འདོད་པ་དེས་ནི་བསྒྲིམས་ཏེ་ཡུལ་དག་ཡོངས་སུ་ཤེས་པར་བྱ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་ཆུ་ལྷ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་ཆུ་ལྷ་ཞེས་བྱ་བར་གྱུར་ཏོ། །ངས་དེར་ཡུལ་དེ་དག་ཡོངས་སུ་ཤེས་པས་དེ་ཕྱིན་ཆད་ང་ནམས་ཀྱང་སྐྱོན་མ་བྱུང་ངོ་།