།དེ་ནས་གནས་གཙང་མའི་ལྷ་དག་དེ་བཞིན་གཤེགས་པ་ནྱ་གྲོ་དྷའི་རྒྱལ་པོ་ལྟར་མཉན་ནས། རྫུ་འཕྲུལ་གྱི་སྟོབས་ཀྱིས་འབད་པས་རྒྱལ་པོ་ཡིད་གཉིས་ལས་ཡང་དག་པར་འདས་པ་ལ་མཆོད་པ་བྱེད་དོ། །དེ་ནས་རྒྱལ་པོ་ཡིད་གཉིས་ལས་ཡང་དག་པར་འདས་པ་རྒྱལ་པོའི་ལམ་གྱི་འབྱོར་པ་དེ་དག་མཐོང་ནས་བློན་པོ་དག་ལ་སྨྲས་པ། གྲོང་གི་གཙོ་བོ་དག་མིའི་གཟུགས་ལས་འདས་པའི་སྐྱེས་བུ་ལྷའི་གཟུགས་དང་ལྡན་པ་ང་ལ་མཆོད་པ་བྱེད་པ་འདི་དག་ག་ལས་འོངས་གང་བདག་ལ་མཆོད་པ་བྱེད་པའི་རྒྱུ་འདི་དག་ནི། དེ་དག་བདག་གི་དྲུང་ན་མེད་དོ། །དེ་ནས་གཉེན་རྙིང་བ་སྣག་གི་གཉེན་མཚམས་ལྷ་དེས་རྒྱལ་པོ་ཡིད་གཉིས་ལས་ཡང་དག་པར་འདས་པ་དེ་ལ་ཚིགས་སུ་བཅད་དེ་སྨྲས་པ། ལྷ་འདི་དག་ནི་འཇིག་རྟེན་གྱི། །མགོན་པོ་དེ་ཡི་རིམ་གྲོ་པ། །དེ་བཞིན་གཤེགས་པའི་བཀའ་ཡིས་སུ། །མཆོད་པ་དམ་པ་བྱེད་པ་ཡིན། །རྒྱལ་པོ་ཕོ་བྲང་ནས་བྱུང་བ། །སངས་རྒྱས་ཀྱིས་ནི་ལྷ་གཟིགས་སོ། །ཁྱོད་ནི་འོང་བར་ཤེས་ནས་སུ། །ལྷ་རྣམས་ཀྱིས་ནི་རབ་ཏུ་བརྒྱུགས། །བཞུད་ལ་བྱང་ཆུབ་སེམས་དཔའ་ཡི། །མཆོད་པ་དག་ནི་དམ་པ་མཛོད། །འཇིག་རྟེན་མགོན་པོ་སྐྱོབ་པ་ཡིས། །ཁྱོད་ལ་དེ་ནི་ཐུགས་བརྩེའི་ཕྱིར། །དེ་ཡིས་ལྷ་ནི་དེ་དག་བཏང་། །མཆོད་པ་དག་ནི་དམ་པ་བྱེད། །སངས་རྒྱས་མཐོང་བར་འདོད་པ་ཡི། །རྒྱལ་པོའི་ལམ་ནི་རྒྱན་གྱིས་བརྒྱན། །རྒྱལ་པོ་ཆེན་པོ་མངོན་བྱུང་ཤིག །གང་ཟག་མཆོག་ལ་བྱང་ཆུབ་སེམས། །ཉན་ཐོས་རྣམས་ཀྱིས་མདུན་བདར་ཅིང་། །མཆོད་པ་བྱེད་པ་མ་མཐོང་ངམ། །དེ་ནས་རྒྱལ་པོ་ཡིད་གཉིས་ལས་ཡང་དག་པར་འདས་པས་ལྷ་དེའི་ཚིག་ཐོས་ནས་ཤིང་རྟ་ལས་བབས་ཏེ། གོས་ཕྲག་པ་གཅིག་ཏུ་གཟར། རྒྱན་བཀྲོལ། ནོར་བུའི་མཆིལ་ལྷམ་ཕུད་ནས། །བཅོམ་ལྡན་འདས་ཕྱོགས་ག་ལ་བཞུགས་པའི་ཕྱོགས་དེར་ཐལ་མོ་སྦྱར་བ་བཏུད་ནས། དེ་བཞིན་གཤེགས་པ་ནྱ་གྲོ་དྷའི་རྒྱལ་པོ་ལ་ཕྱག་འཚལ་ལོ། །ཕྱག་འཚལ་ལོ། །ཕྱག་འཚལ་ལོ་ཞེས་ཆེད་དུ་རྗོད་པ་འདི་ལན་གསུམ་དུ་བརྗོད་དོ། །དེ་བཞིན་གཤེགས་པ་ནྱ་གྲོ་དྷའི་རྒྱལ་པོ་འཁོར་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བདར་བས། རྒྱལ་པོ་ཡིད་གཉིས་ལས་ཡང་དག་པར་འདས་པ་ཕྱག་འཚལ་བར་བྱེད་པ་གཟིགས་སོ།