།སློབ་ཚེ་འཇིགས་པ་མེད་ཅིང་ཞུམ་པ་མེད་པར་འགྱུར། དེ་ནས་དེ་བཞིན་གཤེགས་པ་འཇིག་རྟེན་གསུམ་གྱི་བླ་མ་དེས། རིམ་གྲོ་པ་དེ་ལ་ཚིགས་སུ་བཅད་དེ་གསུངས་པ། ཇི་ལྟར་སྨྲས་པ་དེ་བཞིན་རྒྱུ་མེད་འཛུམ་མི་མཛད། །སྲས་ཀྱི་བསམ་པ་མཁྱེན་ནས་འཇིག་རྟེན་དོན་གྱི་ཕྱིར། །སེམས་ཅན་འཇིག་རྟེན་དོན་དུ་འདྲེན་པ་འཛུམ་པ་མཛད། །བྲམ་ཟེ་ཟླ་བའི་སྨིན་མ་དཔའ་བོ་མཁས་པ་འདི། །ང་ལ་མཆོད་པ་བྱས་ཤིང་བསྟན་ལ་དད་པ་རྙེད། །བསྐལ་པ་བྱེ་བ་དྲུག་ཅུར་ལོག་པར་མི་འགྲོ་ཞིང་། །དེ་ནས་མི་རུ་འོངས་ནས་འཇིག་རྟེན་སངས་རྒྱས་འགྱུར། །མཚན་ནི་འཇིག་རྟེན་གསལ་མཛད་སེམས་ཅན་ཐུགས་བརྩེ་ལྡན། །དེ་ཡི་སྐུ་ཚེ་ལོ་ནི་བྱེ་བ་བརྒྱད་ཅུར་འགྱུར། །ཉན་ཐོས་འཁོར་ནི་བྱེ་བ་བདུན་ཅུ་དག་ཏུ་འགྱུར། །ལོ་ནི་བྱེ་བ་དགུ་བཅུར་རྐང་གཉིས་མཆོག་གནས་ཏེ། །ཉན་ཐོས་འདུས་པ་བརྒྱད་ཅུ་དེ་ཡི་རྣམ་པ་ནི། །དམིགས་མེད་གྲགས་པ་ཆེན་པོ་འདུས་པ་འབྱུང་བར་འགྱུར། །བློ་མཆོག་ལྡན་པ་མྱ་ངན་འདས་པའི་དམ་ཆོས་ལོ། །ཁྲི་ཕྲག་བརྒྱད་ཅུར་གནས་ཏེ་ལྷ་མི་དག་གིས་སྤྱོད། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྲམ་ཟེ་ཟླ་བའི་སྨིན་མ་ཞེས་བྱ་བ་ཤིང་སཱ་ལ་ཆེན་པོ་ལྟ་བུར་གྱུར་པ་དེ་གཞན་ཡིན་པར་སེམས་ན། དེ་ལྟར་མི་བལྟ་སྟེ་ང་དེའི་ཚེ་དེའི་དུས་ན་བྲམ་ཟེ་ཟླ་བའི་སྨིན་མ་ཞེས་བྱ་བ་ཤིང་སཱ་ལ་ཆེན་པོ་ལྟ་བུར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་བློ་ལ་དད་པ་མང་དུ་བྱ། བསྟན་བཅོས་ཐམས་ཅད་ལ་མཁས་པར་ཡང་བྱ་མངོན་པར་བརྩོན་པར་ཡང་བྱའོ། །མཽད་གལ་གྱི་བུ་ངས་ཁམས་སྣ་ཚོགས་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ནི་ཇི་ལྟར་ཁམས་སྣ་ཚོགས་ཤེས་པ་ཡང་དག་པར་བསྡུས་པས་སེམས་ཅན་རྣམས་ཀྱི་ཁམས་སྣ་ཚོགས་དག་གི་ཁམས་ཀྱི་གཉེན་པོ་དེས་པས་ཇི་ལྟར་ཆོས་བསྟན་པར་བྱ་སྙམ་ནས་དགེ་བའི་རྩ་བ་དཔག་ཏུ་མེད་པ་དག་མངོན་པར་འདུས་བྱས་ཏེ། མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་རྒྱལ་པོ་དགེ་བའི་མིག་ཅེས་བྱ་བ་ནས། རང་གི་ཆོས་ཀྱིས་ཤིན་ཏུ་རྒྱལ་སྲིད་ཀྱི་ནང་ན་གནས་པའི་བར་ཞིག་བྱུང་ངོ་། །དེའི་ཚེ་ན་དེ་བཞིན་གཤེགས་པ་ཐོགས་པ་མེད་པའི་སྤྱན་རིག་པ་དང་ཞབས་སུ་ལྡན་པ་ཞེས་བྱ་བ་ནས། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་།