ཐགས་ཟངས་རིས་ཀྱི་འཕྲུལ་དང་། རབ་བཅོམ་གྱི་འཕྲུལ་དང་། རུས་པའི་འཕྲུལ་དང་། བདེ་མཆོག་གི་འཕྲུལ་དང་། གཞོན་ནུ་རྩེ་བ་དང་། རིག་སྔགས་འཆང་རྩེ་བ་དང་། ཕྱི་རོལ་གྱི་ཚོགས་ཀྱི་རྫུ་འཕྲུལ་གྱི་རྩེ་བ་དང་། དེ་ལས་གཞན་པའི་རྩེ་བའི་བསྟན་བཅོས་དཔག་ཏུ་མེད་པ་དག་ལ་འཇིགས་པ་མེད་དོ། །བྲམ་ཟེ་ཟླ་བའི་སྨིན་མ་ཤིང་སཱ་ལ་ཆེན་པོ་ལྟ་བུ་དེ་དེ་བཞིན་གཤེགས་པ་འཇིག་རྟེན་གསུམ་གྱི་བླ་མ་ཞེས་བྱ་བ་ནས། རིག་པ་དང་ཞབས་སུ་ལྡན་པ་སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་ཏུ་བྱུང་སྟེ། དེས་མི་མཁྱེན་པའམ། མ་གཟིགས་པའམ། ཐུགས་སུ་མ་ཆུད་པའམ། མངོན་སུམ་དུ་མ་མཛད་པ་ཅི་ཡང་མེད་དོ་ཞེས་ཐོས་སོ། །དེ་ལྟ་ན་བདག་གི་སྔགས་ཀྱི་ལུང་དག་ལས་གང་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པའི་སྐྱེས་བུ་ཆེན་པོ་ནི་རྣམ་པ་གཉིས་སུ་འགྱུར་ཏེ། གཞན་དུ་ནི་མ་ཡིན་ནོ། །གལ་ཏེ་ཁྱིམ་ན་གནས་ན་འཁོར་ལོས་སྒྱུར་བའི་རྒྱལ་པོར་འགྱུར་ཏེ། གླིང་བཞིའི་དབང་ཕྱུག་རྣམ་པར་རྒྱལ་ཞིང་ཆོས་ཀྱི་རྒྱལ་པོ་ཆོས་དང་ལྡན་པ་རིན་པོ་ཆེ་སྣ་བདུན་དང་ལྡན་ཏེ། དེའི་རིན་པོ་ཆེ་སྣ་བདུན་ནི་འདི་དག་ཡིན་ནོ། །འདི་ལྟ་སྟེ་འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་སྟེ་འདི་བདུན་ནོ། །ཡང་བུ་སྟོང་ཚང་བར་ཡོད་དེ། དཔའ་ཞིང་རྟུལ་ཕོད་པ་ཡན་ལག་མཆོག་གི་གཟུགས་དང་ལྡན་པ་ཕ་རོལ་གྱི་སྡེ་རབ་ཏུ་འཇོམ་པ་ཡིན་ཏེ། དེ་སའི་དཀྱིལ་འཁོར་འདི་ཆད་པ་མེད་པ་དང་། མཚོན་གྱིས་བདའ་བ་མེད་པར་རང་གི་ཆོས་འབའ་ཞིག་གིས་ཤིན་ཏུ་གནས་སོ། །གལ་ཏེ་སྐྲ་དང་ཁ་སྤུ་བྲེགས་གོས་ངུར་སྨྲིག་གྱོན་ཏེ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནས་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །གང་བཅོམ་ལྡན་འདས་དེ་བཞིན་གཤེགས་པ་འཇིག་རྟེན་གསུམ་གྱི་བླ་མ་དེ། གལ་ཏེ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་འདི་དང་ལྡན་ནམ་འོན་ཏེ་མི་ལྡན་པ་བདག་གིས་བརྟག་གོ། །གལ་ཏེ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པར་མཐོང་ན། དེ་བཞིན་གཤེགས་པ་ཞེས་བྱ་བར་ཤེས་སོ་སྙམ་མོ།