།མི་མཆོག་གསུངས་ཤིག་ཐེ་ཚོམ་སོལ། །དེ་ནས་དེ་བཞིན་གཤེགས་པ་སྐར་འོད་ཀྱིས་རྒྱལ་པོ་ཤིན་ཏུ་གནས་པ་དེ་དང་། སྲོག་ཆགས་ཁྲི་ཕྲག་དྲུག་ཅུ་པོ་དེ་དག་དང་ལྷན་ཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །མཽད་གལ་གྱི་བུ་ཁྱོད་དེའི་ཚེ་དེའི་དུས་ན་གཞོན་ནུ་སྙིང་རྗེ་ཅན་ཞེས་བྱ་བར་གྱུར་པ་དེ་གཞན་ཡིན་པར་ཐེ་ཙོམ་འམ། ཡིད་གཉིས་ཟ་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་རྒྱལ་བུ་གཞོན་ནུ་སྙིང་རྗེ་ཅན་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་བསྟན་བཅོས་ཐམས་ཅད་ལ་མཁས་པར་བྱའོ། །མཽད་གལ་གྱི་བུ་བྱང་ཆུབ་སེམས་དཔའ་བསྟན་བཅོས་ཐམས་ཅད་ལ་མཁས་པ་ནི་ཐམས་ཅད་མཁྱེན་པ་ཉིད་ལ་ཞུགས་པར་འགྱུར་རོ། །མཽད་གལ་གྱི་བུ་དེ་ཅིའི་ཕྱིར་ཞེ་ན། ཐམས་ཅད་མཁྱེན་པའི་ཡེ་ཤེས་ཀྱི་རྩོམ་པ་འདི་ནི་འདི་ལྟ་སྟེ། བསྟན་བཅོས་ཐམས་ཅད་ལ་མཁས་པའོ། །མཽད་གལ་གྱི་བུ་བྱང་ཆུབ་སེམས་དཔའ་བསྟན་བཅོས་ཐམས་ཅད་ལ་མཁས་པ་ནི་བསྟན་བཅོས་བྱེད་པ་ཐམས་ཅད་ཀྱི་ངོ་བོ་ཉིད་ཀྱི་རྗེས་སུ་འགྲོ་བར་འགྱུར་ཏེ། །ངོ་བོ་ཉིད་འདིས་བསྟན་བཅོས་དེ་སྟོན་ཏོ་དེ་ལ་དེ་བཞིན་གཤེགས་པ་ཁམས་དུ་མ་མཁྱེན་པ་འགོག་པར་འགྱུར་བའི་ལམ་མཁྱེན་པ་ནི་ཐམས་ཅད་མཁྱེན་པ་ཉིད་དུ་རིག་པར་བྱ་སྟེ། དེ་ཅིའི་ཕྱིར་ཞེ་ན། ལས་ལས་ཉོན་མོངས་པ་རྗེས་སུ་དཔག་སྟེ། ཉོན་མོངས་པ་འདིས་ལས་འདི་མངོན་པར་འདུས་བྱས། ཉོན་མོངས་པ་ལས་སེམས་རྗེས་སུ་དཔག་སྟེ། ཉོན་མོངས་པ་རབ་ཏུ་སྤྱོད་པས་ཆགས་པའམ། སྡང་བའམ་རྨོངས་པའི་སེམས་རྗེས་སུ་དཔག་གོ། །སེམས་ལས་གང་ཟག་འབྱུང་བར་རྗེས་སུ་དཔག་སྟེ། དེ་བཞིན་གཤེགས་པས་སེམས་ཅན་དེ་དག་གི་འགྲོ་བ་འདོགས་པར་མཛད་དོ། །གང་ཟག་འདིས་ལས་འདི་མངོན་པར་འདུས་བྱས་པས། དེ་སེམས་ཅན་དམྱལ་བར་འགྲོའོ། །གང་ཟག་འདིས་ལས་འདི་མངོན་པར་འདུས་བྱས་པས། དེ་དུད་འགྲོའི་སྐྱེ་གནས་སུ་འགྲོའོ། །གང་ཟག་འདིས་ལས་འདི་མངོན་པར་འདུས་བྱས་པས། དེ་གཤིན་རྗེའི་འཇིག་རྟེན་དུ་འགྲོའོ། །གང་ཟག་འདིས་ལས་འདི་མངོན་པར་འདུས་བྱས་པས་དེ་ལྷ་མ་ཡིན་གྱི་རིས་སུ་འགྲོའོ། །གང་ཟག་འདིས་ལས་འདི་མངོན་པར་འདུས་བྱས་པས་དེ་མིར་འགྲོའོ། །གང་ཟག་འདིས་ལས་འདི་མངོན་པར་འདུས་བྱས་པས་དེ་མཐོ་རིས་སུ་འགྲོའོ། །གང་ཟག་འདིས་ལས་འདི་མངོན་པར་འདུས་བྱས་པས་དེ་མྱ་ངན་ལས་འདས་པར་འགྲོའོ།