Degé Kangyur volume 46, F.252.b

ཡོངས་སུ་སྨིན་པར་བྱེད་པའི་ཆོས་ཉི་ཤུ་ཐོབ་པར་འགྱུར་རོ། །​ཉི་ཤུ་གང་ཞེ་ན། འདི་ལྟ་སྟེ། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། འཁོར་བ་ན་ཡོངས་སུ་མི་སྐྱོ་བ་དང་། དགེ་བའི་བཤེས་གཉེན་གྱིས་ཡོངས་སུ་ཟིན་པ་དང་། སངས་རྒྱས་འབྱུང་བ་མཉེས་པར་བྱེད་པ་དང་། ཕ་རོལ་ཏུ་ཕྱིན་པ་རྣམས་ཉན་པ་དང་། བྱང་ཆུབ་སེམས་དཔའི་འཁོར་དང་སྐལ་བ་མཉམ་པ་དང་། གཟུངས་རབ་ཏུ་ཐོབ་པ་དང་། སྤོབས་པ་ཕུན་སུམ་ཚོགས་པ་དང་། མངོན་པར་ཤེས་པ་ཤེས་པ་དང་། ཆོས་མ་ཐོས་པ་ཉན་པ་དང་། ཚེ་རབས་ཚེ་རབས་སུ་བྱང་ཆུབ་ཀྱི་སེམས་མངོན་དུ་འགྱུར་བ་དང་། རྟག་ཏུ་རྒྱུན་མི་འཆད་པར་རབ་ཏུ་འབྱུང་བ་རྙེད་པ་དང་། དལ་བ་ཕུན་སུམ་ཚོགས་པ་དང་། ཇི་ལྟར་ཐོས་པའི་ཆོས་རྣམས་སྒྲུབ་པ་དང་། ཐབས་དང་ཤེས་རབ་ཀྱིས་ཤེས་པས་སེམས་ཅན་སྡུད་ཅིང་ཡོངས་སུ་འཛིན་པ་དང་། དམ་པའི་ཆོས་ཡོངས་སུ་འཛིན་པ་དང་། གཡོ་མེད་ཅིང་སྒྱུ་མེད་པ་དང་། ཕངས་པའི་དངོས་པོ་ཐམས་ཅད་ཡོངས་སུ་གཏོང་བ་དང་། སེམས་ཅན་ཐམས་ཅད་ལ་ཁོང་ཁྲོ་བ་མེད་པ་སྟེ། བྱང་ཆུབ་ཡོངས་སུ་སྨིན་པར་བྱེད་པའི་ཆོས་ཉི་ཤུ་པོ་འདི་དག་ཐོབ་པར་འགྱུར་རོ། །​དེ་ནས་ལྷའི་བུ་མཚམས་བཟངས་ཀྱིས་བདུད་སྡིག་ཅན་ལ་འདི་སྐད་ཅེས་སྨྲས་སོ། །​སྡིག་ཅན་ཁྱོད་ལ་བཅོམ་ལྡན་འདས་ཀྱིས་ལེགས་སོ་ཞེས་བྱ་བ་གནང་བ་ནི་སྡིག་ཅན་ཁྱོད་ཀྱིས་རྙེད་པ་ལེགས་པར་རྙེད་དོ། །​བདུད་ཀྱིས་སྨྲས་པ། ལྷའི་བུ་འདི་ལ་ཁོ་བོས་རྙེད་པ་ཅི་ཞིག་ལེགས་པར་རྙེད། དེ་ཅིའི་ཕྱིར་ཞེ་ན། ལྷའི་བུ་འདི་ལྟ་སྟེ་དཔེར་ན། མི་གང་འབྱུང་པོ་བབས་པ་བསྟན་པ་དེ་ནི་མི་དེའི་འགྱུར་བ་མ་ཡིན་གྱི། དེ་ནི་འབྱུང་པོ་དེའི་འགྱུར་བར་བལྟའོ། །​ལྷའི་བུ་དེ་བཞིན་དུ་ཁོ་བོ་ཡང་འཇམ་དཔལ་གྱིས་བྱིན་གྱིས་བརླབས་ནས་སྟོན་གྱི། འདི་ཁོ་བོའི་སྐྱེས་བུའི་རྩལ་དུ་ནི་མི་བལྟའོ། །​ལྷའི་བུས་སྨྲས་པ། སྡིག་ཅན་ཁྱོད་སངས་རྒྱས་ཀྱི་གཟུགས་ཀྱི་མཚན་དང་ལྡན་ཞིང་སངས་རྒྱས་ཀྱི་སེང་གེའི་ཁྲི་ལ་འདུག་སྟེ། སངས་རྒྱས་ཀྱི་སྤོབས་པ་དང་ལྡན་ཞིང་ཆོས་སྟོན་པས་དགའ་བར་མ་གྱུར་ཏམ། བདུད་ཀྱིས་སྨྲས་པ། ཁྱོད་ཀྱིས་ནི་ཁོ་བོ་བརྒྱན་པར་མཐོང་བ་ལྟ་ན་ཁོ་བོས་ནི་བཅིང་བ་དམ་པོས་བདག་བཅིངས་པར་ཤེས་སོ། །​ལྷའི་བུས་སྨྲས་པ། སྡིག་ཅན་



The English translation of this folio by 84000 Translating the words of the Buddha can be found at:
https://read.84000.co/translation/toh97.html?part=UT22084-046-003-350#UT22084-046-003-350