།ལྷ་ཡི་ཚོགས་རྣམས་གཟིགས་གྱུར་ཀྱང་། །ཤིན་ཏུ་ཐུགས་གཞུངས་དགྱེས་མི་མངའ། །འདི་ཡིས་མཚོན་དང་མདའ་རྣམས་ཀྱིས། །བདུད་ཀྱི་སྡེ་ལས་རྒྱལ་མ་ལགས། །བདེན་པ་བརྟུལ་ཞུགས་དཀའ་ཐུབ་ཀྱིས། །སྡང་བའི་གྱད་ལས་འདི་རྒྱལ་ལོ། །གདན་ལས་མ་བསྐྱོད་བཞིན་དུ་ནི། །དེ་ཡི་སྐུ་ལ་གནོད་མ་བྱུང་། །དེ་ཡི་སྐབས་སུ་བྱམས་མི་མངའ། །ཞེ་སྡང་གྱུར་པའང་མ་ལགས་སོ། །གང་དག་ཁྱོད་ལས་ཆོས་ཐོས་ནས། །སྒྲུབ་པ་བགྱིད་པར་འཚལ་བ་ཡི། །ལྷ་དང་མི་རྣམས་དེ་དག་ནི། །རྙེད་པ་ལེགས་པར་རྙེད་པ་ལགས། །རྒྱལ་བ་བསོད་ནམས་གཟི་མངའ་བ། །ཁྱོད་ལ་བསྟོད་པའི་བསོད་ནམས་ཀྱིས། །མི་ཡི་ཟླ་བ་ཁྱོད་འདྲ་བར། །ཀུན་ཀྱང་མྱུར་དུ་འགྱུར་བར་ཤོག །སྐྱེས་བུ་ཁྱུ་མཆོག་འདྲེན་པས་བྱང་ཆུབ་སངས་རྒྱས་ནས། །ཁྲག་ཁྲིག་ཞིང་རྣམས་བསྐྱོད་ཅིང་བདུད་ཀྱང་ཕམ་མཛད་དེ། །ཚངས་པའི་དབྱངས་དང་ཀ་ལ་པིང་ཀའི་སྒྲ་སྐད་ཀྱིས། །འདྲེན་པས་ཐོག་མར་ཚིགས་སུ་བཅད་པ་འདི་གསུངས་སོ། །བསོད་ནམས་རྣམ་སྨིན་བདེ་སྟེ་སྡུག་བསྔལ་ཐམས་ཅད་སེལ། །བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། །བདུད་བཅོམ་ནས་ནི་བྱང་ཆུབ་མྱུར་དུ་རེག་པར་འགྱུར། །མྱ་ངན་འདས་པ་ཞི་བ་བསིལ་བའི་དངོས་པོ་ཐོབ། །དེ་བས་བསོད་ནམས་བྱ་བས་ཆོག་པར་སུ་ཞིག་འཛིན། །བདུད་རྩི་ཆོས་མཉན་པས་ཀྱང་ཆོག་པར་སུ་ཞིག་འཛིན། །སྐྱེ་བོ་མེད་པའི་ནགས་གནས་ཆོག་པར་སུ་ཞིག་འཛིན། །སེམས་ཅན་དོན་བྱ་བས་ཀྱང་ཆོག་པར་སུ་ཞིག་འཛིན། །བྱང་ཆུབ་སེམས་དཔས་ལག་པ་བརྐྱང་སྟེ་ཚིག་བརྗོད་པ། །མཆོད་པ་བྱས་ཀྱིས་རང་རང་དག་གི་ཞིང་དུ་དེང་། །ཀུན་གྱིས་དེ་བཞིན་གཤེགས་པའི་ཞབས་ལ་ཕྱག་འཚལ་ནས། །སྣ་ཚོགས་བཀོད་པས་རང་རང་དག་གི་ཞིང་དུ་དོང་། །དཔུང་རྣམས་ཕན་ཚུན་ཆེན་པོ་བྱུང་བ་དེ་གཟིགས་ནས། །བདེ་བར་གཤེགས་པ་ཚུལ་དུ་ཤིས་པར་རྣམ་པར་རོལ། །དཔུང་བཅས་བདུད་ལས་རྒྱལ་ཏེ་བདུད་རྩི་རེག་ཤོག་ཅེས། །སེམས་ཅན་རྣམས་ཀྱིས་མཚུངས་མེད་སེམས་ཀྱིས་བྱང་ཆུབ་སྨོན། །དགེ་སློང་དག་དེ་བཞིན་གཤེགས་པ་བྱང་ཆུབ་ཀྱི་ཤིང་དྲུང་ན་སེང་གེའི་གདན་ལ་བཞུགས་ཏེ་མངོན་པར་རྫོགས་པར་སངས་རྒྱས་ནས། སྐད་ཅིག་དེ་ལ་སངས་རྒྱས་ཀྱི་རྣམ་པར་རོལ་པ་དཔག་ཏུ་མེད་པ་མཛད་དེ། དེ་དག་ནི་བསྐལ་པར་ཡང་བསྟན་པར་སླ་བ་མ་ཡིན་ནོ།