དེས་འདི་སྙམ་དུ་བསམས་ཏེ། སྲིད་པ་མེད་ན་སྐྱེ་བ་མེད་པར་འགྱུར་ཏེ། སྲིད་པ་འགགས་པས་སྐྱེ་བ་འགག་གོ་སྙམ་མོ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་མེད་པས་ཞེས་བྱ་བ་ནས་རྒྱས་པར་སྦྱར་ཏེ། འདུ་བྱེད་མེད་པར་འགྱུར། གང་འགགས་པས་འདུ་བྱེད་འགག་སྙམ་པའི་བར་དུའོ། །དེས་འདི་སྙམ་དུ་བསམས་ཏེ། མ་རིག་པ་མེད་པས་འདུ་བྱེད་མེད་པར་འགྱུར་ཏེ། མ་རིག་པ་འགགས་པས་འདུ་བྱེད་འགག་གོ། །འདུ་བྱེད་འགགས་པས་རྣམ་པར་ཤེས་པ་འགག་གོ་ཞེས་བྱ་བ་ནས། སྐྱེ་བ་འགགས་པས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འགག་པར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་འདི་འགག་པར་འགྱུར་རོ་སྙམ་པའི་བར་དུའོ། །དགེ་སློང་དག་དེ་ལྟར་སྔོན་མ་ཐོས་པའི་ཆོས་རྣམས་ལ་ཚུལ་བཞིན་ཡིད་ལ་བྱེད་ཅིང་མང་དུ་བྱེད་པས་བྱང་ཆུབ་སེམས་དཔའི་ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ་། །དགེ་སློང་དག་ངས་དེའི་ཚེ་འདི་ནི་ཟག་པ་སྡུག་བསྔལ་ལོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །འདི་ནི་ཟག་པའི་ཀུན་འབྱུང་བའོ། །འདི་ནི་ཟག་པ་འགོག་པའོ། །འདི་ནི་ཟག་པ་འགོག་པར་འགྲོ་བའི་ལམ་མོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །འདི་ནི་འདོད་པའི་ཟག་པའོ། །འདི་ནི་སྲེད་པའི་ཟག་པའོ། །འདི་ནི་མ་རིག་པའི་ཟག་པའོ། །འདི་ནི་ལྟ་བའི་ཟག་པའོ། །འདིར་ཟག་པ་མ་ལུས་པར་འགག་གོ། །འདིར་ཟག་པ་མ་ལུས་པར་མི་སྣང་བར་འགྱུར་ཞིང་ནུབ་པར་འགྱུར་རོ། །འདི་ནི་མ་རིག་པའོ། །འདི་ནི་མ་རིག་པའི་ཀུན་འབྱུང་བའོ། །འདི་ནི་མ་རིག་པ་འགོག་པའོ། །འདི་ནི་མ་རིག་པ་འགོག་པར་འགྲོ་བའི་ལམ་མོ་ཞེས་ཡང་དག་པར་ཇི་ལྟ་བ་བཞིན་དུ་ཤེས་སོ། །འདིར་མ་རིག་པ་མ་ལུས་པར་མི་སྣང་བར་འགྱུར་ཏེ་ནུབ་པར་འགྱུར་རོ་ཞེས་བྱ་བར་དེ་བཞིན་དུ་སྦྱར་རོ། །འདི་དག་ནི་འདུ་བྱེད་རྣམས་སོ། །འདི་ནི་འདུ་བྱེད་ཀྱི་ཀུན་འབྱུང་བའོ། །འདི་ནི་འདུ་བྱེད་འགོག་པའོ། །འདི་ནི་འདུ་བྱེད་འགོག་པར་འགྲོ་བའི་ལམ་མོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ།