དངུལ་སྟོང་གིས་རྣམ་པར་བརྒྱན་ཅིང་ཤིན་ཏུ་རྣམ་པར་ཕྱེ་བས་སྤྲས་པ། གསེར་གྱི་ཉ་དང་། ཆུ་སྲིན་གྱི་རྒྱལ་མཚན་དང་། རྟ་བབས་དང་། བ་དན་གྱིས་མཛེས་པར་བྱས་པ། རོལ་མོའི་དབྱངས་སྒྲ་དང་། སིལ་སྙན་སྣ་ཚོགས་ཀྱི་སྒྲ་སྙན་པ་འབྱུང་བ་དང་། གནས་སྣ་ཚོགས་ཀྱིས་བསྐོར་བ། ཤིང་འདབ་ཆགས་པས་བརྒྱན་པའི་ནགས་ཚལ་གྱི་ནང་ན་འདུག་པ། ཙན་དན་སྦྲུལ་གྱི་སྙིང་པོའི་ཆུས་ཆག་ཆག་བཏབ་པས་འདམ་དུ་གྱུར་པ། ལྷའི་ནོར་བུའི་སྒྲོན་མའི་ཕྲེང་བས་བརྒྱན་ཅིང་མཛེས་པར་བྱས་པ། བུད་མེད་འབར་བ་སྣ་ཚོགས་རྣམ་པར་རྩེ་བས་མཛེས་པར་བྱས་པ། དཔུང་རྒྱན་དང་། གདུ་བུ་དང་། སོར་གདུབ་དང་། སེ་མོ་དོ་དང་། དོ་ཤལ་སྣ་ཚོགས་ཀྱིས་བརྒྱན་ཅིང་མཛེས་པར་བྱས་པའི་སུམ་ཅུ་རྩ་གསུམ་རིས་ཀྱི་ལྷ་རྣམས་མཐོང་ངོ་། །དྲང་སྲོང་ཆེན་པོ་སུམ་ཅུ་རྩ་གསུམ་གྱི་ལྷའི་རིས་དེ་ན་ལྷའི་བུ་དེ་དག་མཆོག་གི་སྐྱེད་མོས་ཚལ་དུ་སོང་སྟེ་རྩེ་དགའ་ལ་དགའ་མགུར་སྤྱོད་ཅིང་འདོད་པས་རྒྱགས་མྱོས་ནས་དེ་དག་སྐྱེད་མོས་ཚལ་དང་། ནགས་ཚལ་གྱི་བར་དུ་འགྲོ་ཞིང་དགའ་བ་སྐྱེད་དོ། །སེམས་ཅན་དེའི་རྣམ་པར་ཤེས་པ་དེ་བསོད་ནམས་སུ་ཉེ་བར་འགྲོ་བ་ཡིན་པས་སེམས་ཅན་དེས་ལྷ་དང་ལྷ་མོ་ཁྲི་གཅིག་གི་སྟེང་ན་འདུག་པ་མཐོང་ནས་རབ་ཏུ་དགའ་བའི་ཡིད་ཀྱིས་མྱུར་བ་མྱུར་བར་ནོར་བུ་སྐུད་པ་ལ་བརྒྱུས་པ་འཆུགས་པ་བཞིན་དུ་སོང་སྟེ་སྐྱེའོ། །སེམས་ཅན་དེ་འཇུག་པའི་ཚེ་ལྷ་མོ་དེའི་ལག་མཐིལ་གཉིས་ནས་མེ་ཏོག་འབྱུང་ངོ་། །སེམས་ཅན་དེས་མེ་ཏོག་དེ་མཐོང་ནས་འཇུག་སྟེ་ལྷ་མོ་དེ་ལྷ་ལ་དགའ་བ་དང་བདེ་བའི་ཡིད་ཀྱིས་ལྟ་ཞིང་ལག་པ་གཉིས་ཀྱིས་མེ་ཏོག་དེ་མཉེས་ནས་དེའི་ལག་པ་ཕྲད་པའི་རྐྱེན་གྱིས་ལྷའི་ནང་དུ་སྐྱེ་བར་འགྱུར་རོ། །དེ་སྐྱེས་པའི་ཚེ་ལྷ་མོ་དེ་ལྷ་ལ་ལྟ་ཞིང་གཞོན་ནུ་སྐྱེས་ཀྱིས་ཁྱོད་དགའ་བ་སྐྱེད་ཅིག་ཅེས་ཟེར་ཏེ་ཕ་མ་དེ་གཉིས་ཡིད་དགའོ། །གཞོན་ནུ་དེ་ཞག་བདུན་འདས་ནས་རྣ་ཆ་སྣ་ཚོགས་འགུལ་བ་འཕྱང་བ་མངོན་པར་འགྲུབ་བོ། །དེ་ཞག་བདུན་འདས་ནས་འདི་ལྟ་བུ་དྲན་པར་འགྱུར་ཏེ། བདག་ཆེ་གེ་མོ་ཞིག་ནས་འདིར་འོངས་ཏེ་འདི་གཉིས་ནི་བདག་གི་ཕ་མ་ཡིན་ནོ། །བདག་གིས་དགེ་བའི་ལས་ནི་འདི་བྱས་སོ་སྙམ་དུ་དེ་ལྟར་སེམས་ཤིང་ཉེ་བར་རྟོག་པ་ན་དགའ་བ་ཆེན་པོ་སྐྱེའོ།