Degé Kangyur volume 44, F.286.b

རྣམ་པར་ཤེས་པ་དེ་ནི་གཟུགས་མེད་པ། བསྟན་ཏུ་མེད་པ། སྣང་བ་མེད་པའོ། །​གང་རྣམ་པར་ཤེས་པའི་ཁམས་ཆགས་པ་མེད་པར་མ་གྱུར་པར་འཁོར་བར་མི་སྐྱེ་བ་དེ་ལྟ་བུའི་གནས་མེད་དོ། །​བསོད་ནམས་སུ་ཉེ་བར་འགྲོ་བ་དང་། མི་གཡོ་བར་ཉེ་བར་འགྲོ་བ་དང་། མྱ་ངན་ལས་འདའ་བར་ཉེར་བར་འགྲོ་བ་ཐམས་ཅད་ནི་དེ་ལྟར་འགྱུར་རོ། །​དྲང་སྲོང་ཆེན་པོ་དེ་དག་ནི་འདི་ལྟར་བལྟ་སྟེ། རྣམ་པར་ཤེས་པ་གང་དེ་ལྟར་སེམས་པ་དེ་ནི་རྣམ་པར་ཤེས་པའི་ཤས་ཆེ་བར་བལྟ་སྟེ། ལུས་ཀྱི་ཤས་ཆེ་བས་ནི་མི་ནུས་སོ། །​རྣམ་པར་ཤེས་པ་ནི་ཚོར་བར་བྱེད་པ། རྣམ་པར་ཤེས་པ་ནི་སེམས་པར་བྱེད་པ་སྟེ། དེའི་ཕྱིར་རྣམ་པར་ཤེས་པ་ཞེས་བྱའོ། །​དྲང་སྲོང་ཆེན་པོ་ཁྱོད་ཀྱིས་རྣམ་པར་ཤེས་པ་དེ་དེ་ལྟར་ཁོང་དུ་ཆུད་པར་བྱའོ། །​དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །​དགྲ་རྣམས་ཐམས་ཅད་ཤིན་ཏུ་བསྲུང་། །​ཉོན་མོངས་སོགས་པར་བྱེད་པའོ། །ཤེས་དང་མི་ཤེས་ཤེས་པ་པོ། །​ཤེས་རབ་དང་ནི་གཏི་མུག་ལྡན། །​ལྟ་དང་ང་རྒྱལ་མ་རིག་དང་། །​རྣམ་པར་ཤེས་པ་ཀུན་ལ་ཡོད། །​རྣམ་པར་ཤེས་པ་མེད་པར་ནི། །​གང་ཡང་འབྱུང་བར་མི་འགྱུར་རོ། །​རྣམ་པར་ཤེས་པ་མེད་པར་ནི། །​དེ་དག་འདུ་བར་མི་འགྱུར་ཏེ། །​ཅིག་ཅར་གྱུར་ན་འདུ་བར་འགྱུར། །​གཅིག་མིན་འཁོར་ལོ་ཤིང་རྟ་བཞིན། །​སྐྱེས་བུ་མཉམ་དུ་འདུ་བ་ནི། །​ཉིད་དང་གཞན་དང་གཉི་གས་མིན། །​གཅིག་གིས་མ་ཡིན་གཞན་གྱིས་མིན། །​གླང་གཉིས་ཇི་ལྟ་བཞིན་དུའོ། །​ཤིང་རྟ་སྣ་སྒྱུར་གཉིས་དང་ནི། །​འཁོར་ལོ་གཉིས་སུ་ལྡན་པ་དང་། །​ཐག་པ་དག་གིས་བཅིངས་བྱས་པ། །​ཤིང་རྟ་ཞེས་ནི་ཡོངས་སུ་གྲགས། །​དེ་ལྟར་ལུས་ཀྱི་ཤིང་རྟ་ཡང་། །​ཁམས་ཀྱི་འདུ་འཕྲོད་རྣམས་ལས་འབྱུང་། །​དེ་ལས་དབང་པོ་ལྡན་གྱུར་ཏེ། །​རྣམ་པར་ཤེས་པས་རབ་ཏུ་བསྟན། །​གནད་དང་མཚམས་སུ་སྦྱོར་བ་དང་། །​དེ་ལྟར་རྩ་དང་འཇིང་ཆུ་དང་། །སྐྲ་དང་རུས་པ་སོ་དང་མགོ །​སེན་མོ་ལྤགས་པས་མདོག་བྱས་དང་། །​རྒྱུ་མ་གློ་བ་མཁལ་མ་དང་། །​སྙིང་དང་མཆེར་བ་ཚིལ་བུ་དག །​ཐམས་ཅད་མཉམ་དུ་འདུས་པ་ལས། །​ལུས་ནི་ཤིན་ཏུ་གནས་པ་ཡིན། །​དེ་ལ་ཁམས་ནི་ལུས་ཆེན་ཏེ། །​སེམས་ལས་དངོས་པོ་ཀུན་འབྱུང་བས། །