།དྲང་སྲོང་ཆེན་པོ་དེ་བཞིན་དུ་རྣམ་པར་ཤེས་པའི་རྒྱལ་པོས་ལུས་ཀྱི་གྲོང་ཁྱེར་བོར་ནས་ལུས་གཞན་ཡོངས་སུ་འཛིན་པར་བྱེད་དེ། དེ་ལྟར་ན་རྣམ་པར་ཤེས་པ་འདི་རྒྱལ་པོ་ལྟར་བལྟའོ། །དེ་ནས་བཅོམ་ལྡན་འདས་ལ་དྲང་སྲོང་ཆེན་པོ་རྒྱས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པར་ཤེས་པས་བསོད་ནམས་སུ་ཉེ་བར་མཆི་བའམ། བསོད་ནམས་མ་ལགས་པར་ཉེ་བར་མཆི་བའམ། མི་གཡོ་བར་ཉེ་བར་མཆི་བའི་ལུས་ཇི་ལྟར་རབ་ཏུ་འཚལ། རྣམ་པར་ཤེས་པ་འདི་ཉིད་ཀྱིས་བདག་གི་ལུས་འདི་ཡོངས་སུ་བཏང་ངམ་མ་བཏང་སྙམ་དུ་ཇི་ལྟར་རབ་ཏུ་འཚལ། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་འདི་ལྟ་སྟེ། དཔེར་ན་སྐྱེས་བུ་རྒྱ་མཚོ་ཆེན་པོ་རྒལ་བར་འདོད་པས་གཟིངས་ཆེན་པོའི་སྟེང་དུ་འདུག་ནས་ཆུའི་ནང་དུ་ཞུགས་པ་དང་། རྒྱ་མཚོ་ཆེན་པོའི་ཆུ་རླབས་བརྒྱུད་མར་འབྱུང་བས་དཀྲུགས་པ། མཐོ་དམའ་ཅན། ཀུ་མ་བྷི་ར་མ་རུངས་པ་དང་། འཛིན་ཁྲི་དང་། ཆུ་སྲིན་བྱིས་པ་གསོད་དང་། སྦྲུལ་ཡོད་པའི་ཆུ་དེའི་ཚུ་རོལ་གྱི་འགྲམ་ནས་རླུང་གིས་ཕུལ་ནས་འབད་མི་དགོས་ཤིང་གནོད་པ་མེད་ལ་བདེ་བར་གནས་ཏེ་ཕ་རོལ་གྱི་འགྲམ་དུ་ཕྱིན་པར་གྱུར་ཏོ། །ཆུ་བོའི་ཀླུང་རབ་ཏུ་འཇིགས་པ་དེ་ལས་ཐར་པས་གཟིངས་དེ་ལ་དགའ་བ་བསྐྱེད་ནས་གཟིངས་འདིས་བདག་མཚོ་ཆེན་པོ་འདི་ལས་རྒལ་ཏོ། །སྙམ་བསམས་ནས་གཟིངས་དེ་ལ་ལན་གསུམ་བསྐོར་བ་བྱས་ཏེ་གཟིངས་དེ་ལ་རབ་ཏུ་མཆོད་པ་བྱས་སོ། །དྲང་སྲོང་ཆེན་པོ་དེ་བཞིན་དུ་གང་བསོད་ནམས་བྱས་པའི་སེམས་ཅན་འདི་ནས་ཤི་འཕོས་པ་དེའི་རྣམ་པར་ཤེས་པ་དེ་འདི་སྙམ་དུ་སེམས་ཏེ། ལུས་འདིས་བདག་བདེ་འགྲོ་ལྷ་དང་མིར་སྐྱེ་བ་ཡོངས་སུ་བཟུང་བ་དང་ལྡན་པས་བདག་དོན་ཡོད་པར་མིའི་ལུས་ཐོབ་པར་གྱུར་ཏེ། ལུས་འདིས་བདག་ངན་སོང་དུ་འགྲོ་བའི་རྒྱ་མཚོ་ལས་རྒལ་ཏེ། འདིས་ལྷར་སྐྱེ་བའི་གནས་ཡོངས་སུ་བཟུང་ངོ་ཞེས་འདི་ལྟར་ལུས་དེ་ལ་དགའ་བ་བསྐྱེད་ནས་བདག་གིས་འདི་ལ་མཆོད་པ་ལེགས་པར་བྱའོ་སྙམ་མོ། །ཕྱིས་ལུས་དེ་གཟིངས་བཞིན་དུ་བོར་ནས་འཇིག་རྟེན་ཕ་རོལ་ཏུ་འགྲོའོ། །གང་རང་གི་ལུས་ཀྱིས་བསོད་ནམས་མ་བྱས་པ་དེའི་རྣམ་པར་ཤེས་པ་དེ་ནི་ཇི་ལྟར་སྐྱེས་བུ་གཟིངས་རུལ་བས་མཚོ་ཆེན་པོ་དེའི་ནང་དུ་འབྱིང་ཞིང་ཞིག་སྟེ་མ་རུང་བར་གྱུར་ནས་སྐྱེས་བུ་དེ་ཡང་ཉམ་ཐག་སྟེ། གཟིངས་ཞིག་པ་དེས་འཇིགས་བཞིན་དུ་འགྲམ་དུ་ཕྱིན་ནས་ཀྱང་སེང་གེ་དང་སྟག་ཡོད་པའི་འཇིགས་སར་ཕྱིན་པར་གྱུར་ནས་དེ་འདི་སྐད་ཅེས་ཟེར་རོ།