།གང་དག་རྒྱལ་པོ་དེས་བསྟན་ཅིང་བསྒོ་བ་མི་སྲུང་ཞིང་མི་དགེ་བའི་ལས་ལ་སྦྱོར་བ་དེ་དག་མི་དགེ་བའི་ལས་བྱེད་པས་ཚེ་འདི་ལ་རྒྱལ་པོ་དེ་ལས་སྡུག་བསྔལ་རྗེས་སུ་འཐོབ་པར་འགྱུར། དེ་འདི་ནས་ཤི་བའི་དུས་བྱས་ནས་ཀྱང་ལོག་པར་ལྟུང་བར་འགྲོ་བར་འགྱུར་རོ། །དྲང་སྲོང་ཆེན་པོ་དེ་བཞིན་དུ་གང་དག་གིས་ང་ལ་གཟུགས་ཀྱི་སྐུར་མཐོང་ལ་བསླབ་པ་རྣམས་རྗེས་སུ་མི་སྲུང་བ་དེ་དག་གིས་ཅི་འཐོབ་པར་འགྱུར་ཞེ་ན། དེ་དག་གིས་ལོག་པར་ལྟ་བ་བསྐྱེད་ནས་ལྷས་བྱིན་བཞིན་དུ་སེམས་ཅན་དམྱལ་བར་འགྲོ་བར་འགྱུར་རོ། །གང་དག་ང་ཡོངས་སུ་མྱ་ངན་ལས་འདས་པ་ན་བསླབ་པ་རྣམས་སྲུང་བ་དང་། མཆོད་པ་ཡང་བྱེད་པར་འགྱུར་བ་དེ་དག་ནི་ངས་མཆོག་དམ་པར་ཤེས་སོ། །དྲང་སྲོང་ཆེན་པོ་ད་ལྟར་ང་མཆོག་ཏུ་ཕྱིན་ཏེ་སེམས་ཅན་ཐམས་ཅད་ལས་ཁྱད་པར་དུ་འཕགས་ཤིང་ཐམས་ཅད་མཁྱེན་པའི་ཡེ་ཤེས་ཐོབ་པས་མ་ངེས་པའི་སེམས་ཅན་རྣམས་ལ་མིང་བསྒྲགས་པས་ཀྱང་བསླབ་པ་ཕུན་སུམ་ཚོགས་པར་བྱའོ། །དྲང་སྲོང་ཆེན་པོ་གང་ལ་ལ་ཞིག་ང་ཡོངས་སུ་མྱ་ངན་ལས་འདས་ཏེ་འདས་པའི་འོག་ཏུ་མཆོད་པ་བྱེད་པ་དེ་འདུག་པ་ལ་མཆོད་པ་བཞིན་དུ་འགྱུར་རོ། །དྲང་སྲོང་ཆེན་པོ་སེམས་ཅན་དེ་དག་བསོད་ནམས་ལྷག་པར་བྱ་བ་གང་བྱེད་པ་ཐམས་ཅད་ནི་བསོད་ནམས་ཆེན་པོའི་འཕེན་པ་བྱང་ཆུབ་ཏུ་འགྱུར་བ་བྱས་པ་ཡིན་ནོ། །དྲང་སྲོང་ཆེན་པོ་འདི་ལྟ་སྟེ་དཔེར་ན་ཆུ་ངོགས་ཀྱི་འདམ་བུ་སྟུག་པོའི་ནང་དུ་མེ་བཏང་ན་ཆར་པའི་རྒྱུན་འབབ་པའི་ཆུས་དེ་ཞི་བར་འགྱུར་རོ། །དྲང་སྲོང་ཆེན་པོ་དེ་བཞིན་དུ་སྦྱིན་བདག་སྦྱིན་པའི་བསོད་ནམས་ཀྱི་ཚོགས་ཆེན་པོ་སྡུད་པར་འགྱུར་རོ། །སྦྱིན་པའི་ཚོགས་དེ་ཡང་སྦྱིན་པ་པོ་དེ་ཉིད་ཀྱི་རྒྱུད་ལ་དད་པའི་ཆར་པ་བབ་ན་སྦྱིན་པ་པོ་ཉིད་ཀྱི་རྒྱུད་ལ་སོགས་པར་འགྱུར་མོད་ཀྱི། སྦྱིན་པ་བྱིན་པ་དེ་ཡང་ཕུང་པོར་གནས་པའམ། སྤུངས་པར་གནས་པ་འམ། ཕྱོགས་ན་གནས་པར་མི་འགྱུར་རོ། །གང་ཡང་འདི་ལྟར་སྦྱིན་པ་བྱིན་པ་དེའི་བྱིན་པ་དེ་ནི་སྦྱིན་པ་པོ་དེ་ལ་གྲིབ་མ་བཞིན་དུ་རྗེས་སུ་འབྲང་བར་འགྱུར་ཏེ། དེས་ན་སྦྱིན་པ་པོ་དེས་བསོད་ནམས་ཀྱི་རྣམ་པར་སྨིན་པ་དེ་མཐོང་ཡང་བསོད་ནམས་དེ་ཁོང་དུ་མི་ཆུད་དོ། །དྲང་སྲོང་ཆེན་པོ་འདི་ལྟ་སྟེ་དཔེར་ན་རྒུན་འབྲུ་དང་། བུ་རམ་ཤིང་མ་བཙིར་བ་དེ་ལ་ཁུ་བ་མི་དམིགས་ཀྱི་བཙིར་ནས་དམིགས་ཏེ། རྒུན་འབྲུ་དང་། བུ་རམ་ཤིང་དེའི་ཁུ་བ་དེ་ཡང་ཕུང་པོར་གནས་པའམ། སྤུངས་པར་གནས་པའམ། ཕྱོགས་ན་གནས་པར་མི་སྣང་ངོ་། །ཁུ་བ་དེ་ནི་རྒུན་འབྲུ་རེ་རེ་དང་། བུ་རམ་ཤིང་གི་དུམ་བུ་རེ་རེའི་ནང་དུ་འདུས་པ་ཡང་མ་ཡིན་ནོ། །དྲང་སྲོང་ཆེན་པོ་དེ་བཞིན་དུ་སྦྱིན་པ་བྱིན་པ་དེ་ཡང་སྦྱིན་པ་པོའི་ལག་པའི་རྩེ་མོ་དང་།