།དེ་ནས་བཅོམ་ལྡན་འདས་ཀྱིས། ཚེ་དང་ལྡན་པ་རབ་འབྱོར་ལ་བཀའ་སྩལ་བ། རབ་འབྱོར་ཁྱོད་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ། ཤེས་རབ་ཀྱི་ཕ་རོལ་དུ་ཕྱིན་པ་སྟོན་ཅིང་མོས་པ་སྐྱེད་པ་ལེགས་སོ་ལེགས་སོ། །རབ་འབྱོར་ལེགས་སོ་ལེགས་སོ། །རབ་འབྱོར་གྱིས་གསོལ་བ། བཅོམ་ལྡན་འདས་བདག་གིས་ནི་བཀའ་དྲིན་དྲན་པར་བགྱིས་ཏེ། བཀའ་དྲིན་མི་དྲན་པར་མི་བགྱིའོ། །དེ་ཅིའི་སླད་དུ་ཞེ་ན། དེ་ནི་འདི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་བཞུགས་པའི་ཚེ། དེ་དག་གི་ཉན་ཐོས་དེ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྔོན་བྱང་ཆུབ་སེམས་དཔར་གྱུར་བའི་ཚེ། ཕ་རོལ་དུ་ཕྱིན་པ་དྲུག་ལ་གདམས་པ་དང་། རྗེས་སུ་བསྟན་པར་བགྱིས་ཏེ། དགྱེས་པ་དང་ཡང་དག་པར་བསྐུལ་བ་དང་ལེགས་པར་གཟེང་བསྟོད་པ་དང་། རབ་ཏུ་དགྱེས་པ་དང་གཞག་པ་དང་། ཤིན་དུ་བརྟན་པར་བགྱིས་པས། སྔོན་བྱང་ཆུབ་སེམས་དཔར་གྱུར་པའི་ཚེ། ཕ་རོལ་དུ་ཕྱིན་པ་དྲུག་ལ་བསླབ་པ་མཛད་དེ། བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །བཅོམ་ལྡན་འདས་དེ་བཞིན་དུ་བདག་གིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཕ་རོལ་དུ་ཕྱིན་པ་དྲུག་ལ་གདམས་པར་བགྱིའོ། །རྗེས་སུ་བསྟན་པར་བགྱིའོ། །དགའ་བར་བགྱིའོ། ཡང་དག་པར་བསྐུལ་བར་བགྱིའོ། ལེགས་པར་གཟེང་བསྟོད་པར་བགྱིའོ། །རབ་ཏུ་དགའ་བར་བགྱིའོ། །དགོད་པར་བགྱིའོ། །ཤིན་དུ་བརྟན་པར་བགྱིའོ། །བདག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་དུ་ཕྱིན་པ་དྲུག་ལ་དེ་ལྟར་གདམས་པ་དང་། རྗེས་སུ་བསྟན་པ་དང་དགའ་བར་བགྱིས་པ་དང་། ཡང་དག་པར་བསྐུལ་བ་དང་ལེགས་པར་གཟེང་བསྟོད་པ་དང་རབ་ཏུ་དགའ་བར་བགྱིས་པ་དང་བཀོད་པ་དང་ཤིན་དུ་བརྟན་པ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་རོ། །དེ་ནས་ཚེ་དང་ལྡན་པ་རབ་འབྱོར་གྱིས། ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ།