འོན་ཀྱང་གལ་ཏེ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན་དེ་དག་ལ་ཡང་རྗེས་སུ་ཡི་རང་ངོ་། །ཁྱད་པར་དུ་འཕགས་པའི་ཆོས་རྣམས་ལས་ཁྱད་པར་དུ་འཕགས་པའི་ཆོས་རྣམས་འཐོབ་པར་འགྱུར་བས། དེ་དག་གིས་དགེ་བའི་ཕྱོགས་ལ་བདག་ནི་བར་ཆད་མི་བྱེད་དོ། །ཀཽ་ཤི་ཀ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི། ཤེས་རབ་ཀྱི་ཕ་རོལ་ཏུ་ཕྱིན་པ་གང་ཞེ་ན། ཀཽ་ཤི་ཀ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་སེམས་བསྐྱེད་པས། དེ་མི་དམིགས་པའི་ཚུལ་གྱིས་གཟུགས་ནི་མི་རྟག་པར་ཡིད་ལ་བྱའོ། །གཟུགས་ནི་སྡུག་བསྔལ་བ་དང་བདག་མེད་པ་དང་ཞི་བ་དང་དབེན་པ་དང་ནད་དང་ཤུ་བ་དང་ཟུག་རྔུ་དང་སྡིག་པ་དང་ན་བ་དང་དགྲ་དང་འཇིག་པའི་ཆོས་ཅན་དང་། མི་བརྟན་པ་དང་འཇིག་པ་དང་འཇིགས་པ་དང་འགོ་བའི་ནད་དང་། སྟོང་པ་ཉིད་དང་བདག་གི་མེད་པ་དང་ཡིད་བརྟན་དུ་མི་རུང་བ་དང་། གནོད་པར་ཡིད་ལ་བྱའོ་རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་སེམས་བསྐྱེད་པས། དེ་མི་དམིགས་པའི་ཚུལ་གྱིས་ཚོར་བ་དང་། འདུ་ཤེས་དང་འདུ་བྱེད་དང་རྣམ་པར་ཤེས་པ་ནི་མི་རྟག་པར་ཡིད་ལ་བྱའོ། །རྣམ་པར་ཤེས་པ་ནི་སྡུག་བསྔལ་བ་དང་། བདག་མེད་པ་དང་ཞི་བ་དང་དབེན་པ་དང་ནད་དང་ཤུ་བ་དང་ཟུག་རྔུ་དང་སྡིག་པ་དང་ན་བ་དང་དགྲ་དང་འཇིག་པའི་ཆོས་ཅན་དང་། མི་བརྟན་པ་དང་འཇིག་པ་དང་འཇིགས་པ་དང་འགོ་བའི་ནད་དང་། སྟོང་པ་ཉིད་དང་བདག་གི་མེད་པ་དང་ཡིད་བརྟན་དུ་མི་རུང་བ་དང་། གནོད་པར་ཡིད་ལ་བྱའོ། །རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་སེམས་བསྐྱེད་པས། དེ་མི་དམིགས་པའི་ཚུལ་གྱིས་མིག་ནི་མི་རྟག་པར་ཡིད་ལ་བྱའོ། །མིག་ནི་སྡུག་བསྔལ་བ་དང་བདག་མེད་པ་དང་། ཞི་བ་དང་དབེན་པ་དང་ནད་དང་ཤུ་བ་དང་ཟུག་རྔུ་དང་སྡིག་པ་དང་ན་བ་དང་དགྲ་དང་འཇིག་པའི་ཆོས་ཅན་དང་།