དེ་བཞིན་གཤེགས་པའི་སྟོབས་རྣམས་དང་། མི་འཇིགས་པ་རྣམས་དང་། སོ་སོ་ཡང་དག་པར་རིག་པ་རྣམས་དང་། སྙིང་རྗེ་ཆེན་པོ་དང་སངས་རྒྱས་ཀྱི་ཆོས་མ་འདྲེས་པ་བཅྭོ་བརྒྱད་ཡོངས་སུ་རྫོགས་པར་བྱེད་དོ། །རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་ཡོངས་སུ་རྫོགས་པར་བྱེད་དོ། །ཕྱོགས་བཅུའི་སངས་རྒྱས་བཅོམ་ལྡན་འདས་གང་ཇི་སྙེད་ཅིག་བཞུགས་ཤིང་འཚོ་སྐྱོང་བ་དེ་དག་ཀྱང་། རིགས་ཀྱི་བུ་དང་རིགས་ཀྱི་བུ་མོ་དེ་དག་གིས་ཤེས་རབ་ཀྱི་ཕ་རོལ་དུ་ཕྱིན་པ་འདི་འདྲི་བ་དང་། ཀློག་པ་དང་ལུང་འབོག་པ་དང་། ཁ་ཏོན་བྱ་བ་དང་། བསྟན་པ་དང་། ཚུལ་བཞིན་དུ་ཡིད་ལ་བྱ་བའི་ཕྱིར་དགོངས་པ་མཛད་དོ། །ཕྱོགས་བཅུའི་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པ་གང་ཇི་སྙེད་པ་དེ་དག་ཀྱང་རིགས་ཀྱི་བུ་དང་རིགས་ཀྱི་བུ་མོ་ཤེས་རབ་ཀྱི་ཕ་རོལ་དུ་ཕྱིན་པ་འདི་འདྲི་ཞིང་ཀློག་པ་དང་། ལུང་འབོག་པ་དང་ཁ་ཏོན་བྱེད་པ་དང་སྟོན་པ་དང་། ཚུལ་བཞིན་དུ་ཡིད་ལ་བྱེད་པ་དེ་དག་གི་དོན་དུ་བརྩོན་པར་བྱེད་ཅིང་། ཡོངས་སུ་འཛིན་པར་བྱེད་དོ།། །།ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་ཉི་ཤུ་ལྔ་པ། བམ་པོ་བཞི་བཅུ་ལྔ་པ། རབ་འབྱོར་འདི་ལྟ་སྟེ། དཔེར་ན། བུད་མེད་ལ་ལ་ཞིག་ལ། བུ་ལྔ་འམ། བཅུ་འམ། ཉི་ཤུ་འམ། སུམ་ཅུ་འམ། བཞི་བཅུ་འམ། ལྔ་བཅུ་འམ། བརྒྱ་འམ། སྟོང་ཞིག་ཡོད་ན། དེ་དག་ནི་མ་དེ་ཅི་ནས་ཀྱང་མི་ན་བར་བྱ་བའི་ཕྱིར་བརྩོན་པར་བྱེད་ཅིང་བདག་ཅག་གི་མ་འདི་ཇི་ལྟར་ན་ནད་མེད་པར་འགྱུར། བདག་ཅག་གི་མ་འདི་ལ་ཇི་ལྟར་ན་བར་ཆད་དུ་མི་འགྱུར། བདག་ཅག་གི་མ་འདི་ཇི་ལྟར་ན་ཡུན་རིང་དུ་འཚོ་བར་འགྱུར། བདག་ཅག་གི་མ་འདི་རིང་དུ་འཚོ་བར་བྱེད་ན་ཇི་ལྟར་བྱ། བདག་ཅག་གི་མ་འདི་ལུས་ལ་མི་བདེ་བའི་ཉམས་མེད་པར་བྱ་ན་ཇི་ལྟར་བྱ། འདི་ནི་བདག་ཅག་སྐྱེད་སྐྱེད་པ་སྟེ། སྲོག་གི་སྦྱིན་བདག་གོ། །ཞེས་དེ་དག་མ་དེ་ལ་རིམ་གྲོ་ལེགས་པར་བྱ་བས་རིམ་གྲོ་བྱེད་དོ། །དེ་དག་ནི་འདིའི་སྲོག་གི་བར་ཆད་དུ་འགྱུར་དུ་འོང་ངོ་། །ལུས་ཉམ་ཆུང་བར་འགྱུར་དུ་འོང་ངོ་། །ལུས་ལ་ཤ་སྦྲང་དང་། སྦྲང་བུ་དང་། སྦྲུལ་གྱིས་གཙེ་བའི་མི་བདེ་བས་བབ་དུ་འོང་ངོ་།