Degé Kangyur volume 101, F.72.a

།རྒྱལ་བའི་བསྟན་ལ་ཐེ་ཚོམ་མེད། །​མཚན་རྣམས་འདི་དག་འཛིན་བྱེད་པ། །​འཇིག་རྟེན་མགོན་པོ་རྣམས་ལས་ནི། །​ཟབ་མོའི་ཆོས་ནི་ཐོས་འགྱུར་ཏེ། །​ཐོས་ནས་ཐམས་ཅད་འཛིན་པར་འགྱུར། །​དེ་ནས་ཕ་རོལ་ཕྱིན་ས་དང་། །​མི་འཇིགས་པ་དང་སྟོབས་རྣམས་དང་། །​མཚན་དང་དཔེ་བྱད་བཟང་པོ་རྣམས། །​མ་ལུས་པར་ནི་རྫོགས་པར་འགྱུར། །​སངས་རྒྱས་དེ་དག་རྣམས་ཀྱི་ནི། །​གང་གི་ཞིང་དུ་འདོད་གྱུར་པ། །​དེར་ནི་བླ་མེད་ཡང་དག་རྫོགས། །​བྱང་ཆུབ་རྟོགས་ནས་འཚང་རྒྱར་འགྱུར། །​སྐྱེས་པའམ་ནི་བུད་མེད་གང་། །​མཚན་རྣམས་འདི་དག་འཛིན་པ་ཡི། །​ཡོན་ཏན་འདི་དང་གཞན་དག་ཀྱང་། །​སངས་རྒྱས་བསྐལ་པར་རྒྱུན་དུ་གསུང་། །​བག་ཡོད་ལྡན་པར་གྱུར་ནས་ནི། །​ཡོན་ཏན་ཕུན་སུམ་འདི་ཐོས་ནས། །​རྫོགས་པའི་སངས་རྒྱས་གྲགས་ལྡན་པ། །​དེ་དག་མཚན་རྣམས་འཛིན་པར་འགྱུར། །​སངས་རྒྱས་འདི་དག་དཔལ་སྙིང་པོ། །​སྤྲིན་གྱི་རྒྱལ་པོ་མི་ཡི་མཆོག །​འཇིག་རྟེན་མགོན་པོ་འདི་དག་གི། །​མཚན་ནི་བསྐལ་པར་གང་ཉན་དང་། །​གང་དག་འདི་རྣམས་མཚན་ཉན་ཅིང་། །​ཐོས་ནས་གུས་པར་བྱེད་འགྱུར་བ། །དེ་དང་དེ་དག་ཤེས་རབ་ཆེ། །​རྐང་གཉིས་རྣམས་ཀྱི་མཆོག་ཏུ་འགྱུར། །​དྲང་སྲོང་ཆེན་པོ་དེ་དག་གི། །​འདི་འདྲའི་མཚན་དག་ཐོས་གྱུར་ནས། །​བག་ཡོད་ལྡན་ཞིང་མཁས་གྱུར་ལ། །​ཤེས་རབ་ལྡན་པ་སུ་མི་འཛིན། །​བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། བྱང་ཆུབ་སེམས་དཔའ་དེ་དག་དང་། དགེ་སློང་དེ་དག་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །​འཕགས་པ་སངས་རྒྱས་བཅུ་གཉིས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།​། །​།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།།