Degé Kangyur volume 101, F.68.a

བརྗོད་བྱས་ན་སྔོན་གྱི་ལས་ཀྱི་སྒྲིབ་པ་ཐམས་ཅད་བྱང་བར་འགྱུར་རོ། །​ཇི་སྟེ་ཕ་རོལ་ནད་ལས་ཐར་བར་བྱེད་འདོད་ན་ཅི་ནུས་སུ་གཏོར་མ་གཏོང་ཞིང་པོག་གམ། ཨ་ག་རུའི་བདུག་པས་བདུགས་ལ་བཟའ་ཐམས་ཅད་ལ་ཁྲུས་བྱའོ། །​མཛེ་དང་སྐྲངས་ནད་དང་མཆིན་སྐྲན་ལ་ཤུ་དག་འཇམ་པོ་བཏགས་ལ་སྦྲང་རྩི་དང་བསྲེས་ཏེ། སངས་རྒྱས་བཅོམ་ལྡན་འདས་ཀྱི་སྤྱན་སྔར་ལན་སྟོང་རྩ་བརྒྱད་བསྔགས་ལ་བསྐུས་ན་མཛེ་ནད་ཐམས་ཅད་སོས་པར་འགྱུར་རོ། །​ཞག་བཞི་པ་ལ་སངས་རྒྱས་བཅོམ་ལྡན་འདས་ཀྱི་སྤྱན་སྔར་སྣ་མའི་མེ་ཏོག་གི་ཕྲེང་བ་ལ་ལན་སྟོང་རྩ་བརྒྱད་བསྔགས་ཏེ་མིའི་མགོ་ལ་བཅིངས་ན་ཞག་བཞི་པའི་རིམས་སོས་པར་འགྱུར་རོ། །​མཚན་བཏབ་པའི་རྣ་བར་བཟླས་བརྗོད་བྱས་ན་བརྗེད་བྱེད་ལས་ཐར་བར་འགྱུར་རོ། །​ལུས་སྲུལ་པོས་ཟིན་པ་རྣམས་ལ་སངས་རྒྱས་ལ་ཕུལ་བའི་མེ་ཏོག་གིས་བདུག་གོ། །​དེ་ལ་སོགས་པའི་ལས་རྣམས་བྱེད་དེ་ལས་ཐམས་ཅད་བ་ཞེས་བྱའོ། །​དེ་ནས་དེ་བཞིན་གཤེགས་པ་འོད་སྲུང་སྟེང་གི་ནམ་མཁའ་ལ་བཞུགས་ཏེ། སེམས་ཅན་ཐམས་ཅད་ལ་ཕན་པའི་དོན་དང་། ནད་ཐམས་ཅད་རབ་ཏུ་ཞི་བར་བྱ་བ་དང་། འབྱུང་པོ་ཐམས་ཅད་བཟློག་པའི་ཕྱིར་གསང་སྔགས་ཀྱི་གཞི་འདི་དག་བཀའ་སྩལ་ཏོ། །​ན་མོ་བུད་དྷཱ་ཡ། ན་མོ་དྷརྨཱ་ཡ། ན་མཿསཾ་གྷཱ་ཡ། ཨོྃ་ཧ་ར་ཧ་ར། ཧ་ར་ཧ་ར། ཧ་ཧ་ཧ། ན་མཿཀཱ་ཤྱ་པཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུད་དྷཱ་ཡ། སིདྡྷྱན་ཏུ་མནྟྲ་པཱ་ད་སྭཱ་ཧཱ། དེ་ནས་དེ་བཞིན་གཤེགས་པ་འོད་སྲུང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །​ནམ་མཁའ་སྙིང་པོ་སྙིང་པོ་འདི་ནི་སངས་རྒྱས་བཅོམ་ལྡན་འདས་གང་གཱའི་ཀླུང་སུམ་ཅུ་རྩ་གཉིས་ཀྱི་བྱེ་མ་སྙེད་དག་གིས་གསུངས་པ་སྟེ། ནམ་མཁའི་སྙིང་པོ་ཁྱོད་ཀྱིས་ཀྱང་སྙིང་པོ་འདི་ཟུང་ཤིག །​ཀུན་ཆུབ་པར་གྱིས་ཤིག །​གང་ལ་ལ་ཞིག་འཛིན་ཏམ། ཀློག་གམ། ཀུན་ཆུབ་པར་བྱེད་དམ། ཉིན་མོའམ། མཚན་མོ་ལན་གསུམ་གསུམ་བཟླས་བརྗོད་བྱས་ན་མདོར་ན་རྨི་ལམ་ན་ཡང་དེ་བཞིན་གཤེགས་པ་མཐོང་བར་འགྱུར་རོ། །​དེའི་ལས་ཀྱི་སྒྲིབ་པ་ཐམས་ཅད་ཀྱང་བྱང་བར་འགྱུར་ཏེ།



The English translation of this folio by 84000 Translating the words of the Buddha can be found at:
https://read.84000.co/translation/toh852.html?part=UT22084-068-004-252#UT22084-068-004-252