Degé Kangyur volume 101, F.64.a

སྔོན་གྱི་ལས་ཀྱི་རྣམ་པར་སྨིན་པ་ནི་གང་ལ་ཡང་མ་གཏོགས་སོ། །​བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་དང་ཐམས་ཅད་དང་ལྡན་པའི་འཁོར་དེ་དག་དང་ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །​འཕགས་པ་ཚེ་དང་ཡེ་ཤེས་དཔག་ཏུ་མེད་པའི་སྙིང་པོ་ཞེས་བྱ་བའི་གཟུངས་རྫོགས་སོ།​། །​།རྒྱ་གར་གྱི་མཁན་པོ་པུ་ཎྱ་སམྦྷ་ཝ་དང་། ལོ་ཙྪ་བ་པ་ཚ་བ་ཉི་མ་གྲགས་ཀྱིས་བསྒྱུར་བའོ།​། །​།༄༅། །​རྒྱ་གར་སྐད་དུ། ཨཱརྱཱ་པ་རི་མི་ཏ་གུ་ཎཱ་ནུ་ཤཱནྶ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ཡོན་ཏན་བསྔགས་པ་དཔག་ཏུ་མེད་པ་ཞེས་བྱ་བའི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །​ན་མོ་རཏྣ་ཏྲ་ཡཱ་ཡ། ན་མོ་བྷ་ག་བ་ཏེ། ཨ་མི་ཏ་བྷ་ཡ། ཏ་ཐཱ་ག་ཏཱ་ཡ། ཨརྷ་ཏེ། སཾ་མྱཀྶཾ་བུད་དྷཱ་ཡ། ཏདྱ་ཐཱ། ཨོྃ་ཨ་མི་ཏེ། ཨ་མི་ཏོཏྦྷ་བེ། ཨ་མི་ཏ་སཾ་བྷ་བེ་ཨ་མི་ཏ་བི་ཀྲཱནྟེ། ཨ་མི་ཏ་ག་མི་ནི། ག་ག་ན་ཀཱིརྟི་ཀ་རེ། སརྦ་ཀླེ་ཤཀྵ་ཡཾ་ཀ་རི་སྭཱ་ཧཱ། གཟུངས་འདིའི་ཆོ་ག་ནི་འདི་ཡིན་ཏེ། ལན་ཅིག་བརྗོད་པས་བསྐལ་པ་འབུམ་དུ་བསགས་པའི་ལས་ཀྱི་སྒྲིབ་པ་འབྱང་བར་འགྱུར་རོ། །​ཉིན་རེ་བཞིན་དུ་དུས་གསུམ་དུ་བཟླས་བརྗོད་བྱས་ན་སྡིག་པ་ཐམས་ཅད་འབྱང་བར་འགྱུར་རོ། །​སངས་རྒྱས་སྟོང་གིས་བསྐྱེད་པའི་དགེ་བའི་རྩ་བ་འཐོབ་པར་འགྱུར་རོ། །​ལན་ཉི་ཤུ་རྩ་གཅིག་བཟླས་བརྗོད་བྱས་ན་རྩ་བའི་ལྟུང་བ་བཞི་པོ་འབྱང་བར་འགྱུར་རོ། །​ལན་འབུམ་བཟླས་བརྗོད་བྱས་ན་འཕགས་པ་བྱམས་པ་མཐོང་བར་འགྱུར་རོ། །​ལན་ཉིས་འབུམ་བཟླས་བརྗོད་བྱས་ན། འཕགས་པ་སྤྱན་རས་གཟིགས་དབང་ཕྱུག་མཐོང་བར་འགྱུར་རོ། །​ལན་སུམ་འབུམ་བཟླས་བརྗོད་བྱས་ན་དེ་བཞིན་གཤེགས་པ་འོད་དཔག་མེད་མཐོང་བར་འགྱུར་རོ། །​ཕན་ཡོན་གཞན་ཡང་དཔག་ཏུ་མེད་པ་ཡོད་ན་ཡང་མདོར་བསྡུས་ཏེ་བསྟན་པ་ཡིན་ནོ། །​འཕགས་པ་ཡོན་ཏན་བསྔགས་པ་དཔག་ཏུ་མེད་པ་ཞེས་བྱ་བའི་གཟུངས་རྫོགས་སོ།​། །​།



The English translation of this folio by 84000 - Translating the words of the Buddha can be found at:
https://read.84000.co/translation/toh851.html?part=UT22084-091-077-40#UT22084-091-077-40