Degé Kangyur volume 101, F.26.b

ནུར་གྱུར་པ་ལ་འདི་སྐད་ཅེས་སྨྲས་སོ། །​དེ་བཞིན་ཉིད་བསྟན་པ་དང་། སྐྱེ་བ་མེད་པའི་དེ་བཞིན་ཉིད་དང་། འབྱུང་བ་མེད་པའི་དེ་བཞིན་ཉིད་དང་། མཚན་ཉིད་མེད་པའི་དེ་བཞིན་ཉིད་དང་། ནམ་མཁའི་དེ་བཞིན་ཉིད་དང་། དངོས་པོ་མེད་པའི་དེ་བཞིན་ཉིད་དང་། ངོ་བོ་ཉིད་ཀྱི་དེ་བཞིན་ཉིད་དང་། དངོས་པོ་མེད་པའི་ངོ་བོ་ཉིད་ཀྱི་དེ་བཞིན་ཉིད་དུ་གཟུངས་འདི་གཟུང་བར་བྱ་སྟེ། རིགས་ཀྱི་བུ་དཀོན་མཆོག་ཏ་ལ་ལའི་གཟུངས་འདི་གཟུང་བ་དང་། ཀུན་ཏུ་གཟུང་བ་དང་། བསྒོམ་པ་དང་། རྣམ་པར་དཔྱད་པ་དང་། གདགས་པ་དང་། རབ་ཏུ་གཞག་པ་དང་། རྣམ་པར་དགྲོལ་བ་དང་། རྣམ་པར་དབྱེ་བ་དང་གསལ་བར་བྱ་བ་ནི་འདི་འདྲ་སྟེ། རིགས་ཀྱི་བུ་འདི་ནི་དཀོན་མཆོག་ཏ་ལ་ལའི་གཟུངས་བསྒོམ་པ་དང་། རྣམ་པར་བརྟག་པའི་དོན་ཏོ། །​དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །​འཇམ་དཔལ་ཁྱོད་ཆོས་ཀྱི་རྣམ་གྲངས་འདི་ལ་ཡང་དག་པར་ཞུགས་ནས་ཡུན་ཇི་སྲིད་ཅིག་ལོན། འཇམ་དཔལ་གྱིས་སྨྲས་པ། ཤ་ར་དྭ་ཏིའི་བུ་འདོད་ཆགས་དང་། ཞེ་སྡང་དང་། གཏི་མུག་རྣམས་ཡུན་ཇི་སྲིད་ཅིག་ནས་ཞུགས་པ་སྲིད་དོ། །​ཤ་ར་དྭ་ཏིའི་བུས་སྨྲས་པ། རིགས་ཀྱི་བུ་འདོད་ཆགས་དང་། ཞེ་སྡང་དང་། གཏི་མུག་རྣམས་ཡུན་ཇི་སྲིད་ཅིག་ནས་ཞུགས། འཇམ་དཔལ་གྱིས་སྨྲས་པ། ཤ་ར་དྭ་ཏིའི་བུ་སའི་ཁམས་ཡུན་ཇི་སྲིད་ཅིག་ནས་ཞུགས་པ་སྲིད་དོ། །​ཤ་ར་དྭ་ཏིའི་བུས་སྨྲས་པ། རིགས་ཀྱི་བུ་སའི་ཁམས་ཡུན་ཇི་སྲིད་ཅིག་ནས་ཞུགས། འཇམ་དཔལ་གྱིས་སྨྲས་པ། ཤ་ར་དྭ་ཏིའི་བུ་རིག་པ་དང་། མ་རིག་པ་ཡུན་ཇི་སྲིད་ཅིག་ནས་ཞུགས་པ་སྲིད་དོ། །​ཤ་ར་དྭ་ཏིའི་བུས་སྨྲས་པ། རིགས་ཀྱི་བུ་རིག་པ་དང་། མ་རིག་པ་ཡུན་ཅི་སྲིད་ཅིག་ནས་ཞུགས། འཇམ་དཔལ་གྱིས་སྨྲས་པ། ཤ་ར་དྭ་ཏིའི་བུ་ནམ་མཁའི་ཁམས་ཡུན་ཇི་སྲིད་ཅིག་ནས་ཞུགས་པ་སྲིད་དོ། །​ཤ་ར་དྭ་ཏིའི་བུས་སྨྲས་པ། འཇམ་དཔལ་ནམ་མཁའི་ཁམས་ཡུན་ཇི་སྲིད་ཅིག་ནས་



The English translation of this folio by 84000 Translating the words of the Buddha can be found at:
https://read.84000.co/translation/toh847.html?part=UT22084-057-004-2657#UT22084-057-004-2657