།སྐྲ་ཐིགས་གཅིག་གིས་ཆུ་ཚད་གཟུང་དུ་རུང་། །འདིར་ནི་བསམ་པ་བགྲང་བས་རྟོགས་མ་ཡིན། །རྒྱལ་སྲས་རྣམས་ཀྱི་སྤྱོད་པ་འདི་འདྲ་སྟེ། །འདི་ན་སེམས་ཅན་ལ་ལས་ཞིང་རྣམས་ཀུན། །ཕྲ་རབ་རྡུལ་དུ་རླགས་ནས་མ་ལུས་འགྲང་། །གྲངས་མེད་འདི་སྙེད་ཅིག་ཅེས་གཅོད་བྱེད་པ། །དེ་ཀུན་འདིར་ནི་བྱང་ཆུབ་སེམས་དཔས་ཤེས། །འདས་དང་དེ་བཞིན་མ་བྱོན་སངས་རྒྱས་དང་། །གང་དག་ཕྱོགས་བཅུ་དག་ན་བཞུགས་པ་དང་། །རང་སངས་རྒྱས་དང་དེ་བཞིན་ཉན་ཐོས་ཀྱི། །ས་བོན་གྱུར་པ་བྱང་ཆུབ་སེམས་དེ་སྐྱེ། །ཐོག་མར་བྱང་ཆུབ་སེམས་ཤེས་གང་བརྗོད་པ། །དེ་ནི་ཇི་ལྟའི་ཚུལ་དུའང་གྲངས་མེད་དེ། །འཇིག་རྟེན་ཁམས་འདི་ཀུན་ཀྱང་ཁྱབ་གྱུར་ན། །དེ་ལས་གོང་དུ་བརྗོད་དུ་ཅི་ཞིག་ཡོད། །དེ་ནས་བྱང་ཆུབ་སེམས་དཔའ་ཀུན་དུ་བཟང་པོས་བྱང་ཆུབ་སེམས་དཔའ་ཆོས་ཀྱི་བློ་གྲོས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་དཀོན་མཆོག་ཏ་ལ་ལའི་གཟུངས་བཤད་པ་ལེགས་པར་སྨྲས་སོ། །རིགས་ཀྱི་བུ་སངས་རྒྱས་ཀྱི་ཡོན་ཏན་རྣམས་ནི་བསམ་གྱིས་མི་ཁྱབ་སྟེ། གང་དག་ཆོས་ཀྱི་རྣམ་གྲངས་འདིའི་མིང་ཐོས་པའི་སེམས་ཅན་དེ་དག་ཀྱང་ཐམས་ཅད་མཁྱེན་པ་ཉིད་དུ་ཉེ་བར་གྱུར་པ་ཡིན་ན། གང་དག་ཆོས་ཀྱི་རྣམ་གྲངས་འདི་འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། དེ་བཞིན་ཉིད་དུ་སྒྲུབ་པར་བྱེད་པ་ལྟ་སྨོས་ཀྱང་ཅི་དགོས་ཏེ། དེ་དག་ནི་ངེས་པར་སངས་རྒྱས་སུ་འགྱུར་རོ། །ཆོས་ཀྱི་བློ་གྲོས་ཀྱིས་སྨྲས་པ། ཀྱེ་རྒྱལ་བའི་སྲས་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། ཤེས་རབ་ཟབ་མོ་དང་ལྡན་པ་དེ་དག་ནི་དེ་བཞིན་གཤེགས་པས་དབང་བསྐུར་བ་ཡིན་པར་རིག་པར་བྱའོ། །བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གི་རྣ་ལམ་དུ་འདི་ལྟ་བུའི་ཆོས་འདི་དག་གྲག་པར་གྱུར་པའི་སྐྱེས་བུ་དམ་པ་དེ་དག་ཀྱང་སངས་རྒྱས་ཀྱི་ཆོས་རྣམས་ལ་ལུང་བསྟན་པར་རིག་པར་བྱ་བ་ཡིན་ན། ཆོས་ཀྱི་རྣམ་གྲངས་འདི་གང་དག་གིས་ལག་ཏུ་ཐོབ་པ་ལྟ་སྨོས་ཀྱང་ཅི་དགོས།