།ཁ་བཞིན་ཟླ་འདྲ་མཆེ་བ་མཉམ་ལ་རྣོ། །སོར་མོ་ཐགས་བཟང་མཛེས་ལ་ལོང་བུ་ནུབ། །ལྟེ་བ་ཟབ་ཅིང་མཛེས་ལ་ནུ་མཇིང་ལེགས། །བ་སྤུ་རེ་རེ་སྐྲ་ཡང་གནག་ལ་སྟུག །ལྟོ་བ་མི་འོ་གཉེར་མ་གསུམ་དང་ལྡན། །མདོག་ཀྱང་བཟང་ཞིང་མངའ་བྱད་དང་ཡང་ལྡན། །གང་ལ་ཡིད་དགའ་ལྟ་བ་བརྟན་པར་འགྱུར། །ལྟ་བས་ཀྱང་ནི་ངོམས་པར་མི་འགྱུར་དང་། །ལྷ་གཞན་དག་ལ་མི་ཕྱོགས་དབབ་པའི་སྣོད། །ཚེས་གྲངས་བཟང་ལ་ཉིན་ཞག་གཅིག་ཏུ་ནི། །སྨྱུང་བ་བྱས་པས་བདུག་སྤོས་ཕྲེང་བ་དང་། །ཙནྡན་མེ་ཏོག་མར་མེ་རྣམས་ཀྱིས་མཆོད། །བཟའ་དང་འབྲས་ཆན་ལ་སོགས་གཏོར་མ་མང་། །ལྷ་དང་ལྷ་མིན་གནོད་སྦྱིན་རྣམས་ལ་སྦྱིན། །དབབ་པའི་སྣོད་རྣམས་ཁྲུས་བྱས་གོས་དཀར་བསྐོན། །ཤར་ཕྱོགས་ཁ་བལྟས་རྒྱན་ནི་རྣམ་པར་སྤངས། །བྱུག་སྤོས་མེ་ཏོག་ལ་སོགས་དེ་ལ་སྦྱིན། །བདུག་པས་བདུག་ཅིང་གསང་སྔགས་བཟླས་བརྗོད་བྱ། །ཧཱུྃ་གི་གསང་སྔགས་ཐོག་མར་བཟླས་ནས་སུ། །གྲིཧྞ་ཨ་བེ་ཤ་ཞེས་བརྗོད་པར་བྱ། །མིག་ནི་གདང་ས་ཤིང་འཛུམས་པར་མི་བྱེད་ན། །རྫོགས་པར་གྱུར་པར་ཤེས་པར་བྱས་ནས་སུ། །འཇིགས་པ་མེད་པར་དེ་ཚེ་དྲི་བྱ་བ། །མཆོད་ཡོན་དང་ནི་བདུག་པ་ཕུལ་ནས་སུ། །རིག་པ་མཆོག་གི་གསང་སྔགས་དྲན་བྱས་ནས། །ཕྱག་འཚལ་ནས་ནི་ལྷ་ཕྱོགས་གང་ཡིན་དྲི། །དུས་གསུམ་དག་གི་བདག་གི་དགོས་པ་གང་། །དེ་ནི་ལེགས་པར་དགོངས་ལ་བཀའ་སྩོལ་ཅིག ། བདེ་དང་སྡུག་བསྔལ་དངོས་གྲུབ་ཐོབ་མི་ཐོབ། །ཤེས་ནས་དེ་ཡང་དེ་བཞིན་བཟུང་ནས་སུ། །དེ་མ་ཐག་ཏུ་སླར་ཡང་གཏང་བར་བྱ། །མི་གདུག་སྔགས་བཟླས་ཆོ་ག་འདི་རྣམས་ཀྱིས། །དབབ་པའི་སྣོད་ལ་མི་ཡིས་ཕེབས་གྱུར་གྱི། །གང་ཞིག་བླུན་པས་གཞན་དུ་བརྩམས་ན་ནི། །དེ་ནི་མི་རྣམས་ཀུན་གྱིས་དཔྱས་པར་འགྱུར། །ཞི་ཞིང་གཞུངས་ལ་རྒྱ་ཆེ་ད་ཀྱུས་ཀྱང་རིང་། །བརྟན་ཞིང་གཟི་ཆེན་མདངས་ལྡན་དམར་བར་སྣང་། །འཛུམས་ཞིང་འབྱེད་མེད་ལྷ་ཡི་མིག་དང་འདྲ། །དབབ་པའི་སྣོད་ལ་ལྷ་བབས་དེ་ལྟར་འགྱུར། །མིག་ནི་རབ་ཏུ་དམར་ཞིང་ཟླུམ་པོར་འདུག །བགྲད་ཅིང་རབ་ཏུ་མི་སྡུག་འཇིགས་འཇིགས་ལྟ། །འཛུམས་པ་མེད་ཅིང་འཇིགས་མེད་བལྟ་བ་ན། །སྲིན་པོ་ལྟོ་འཕྱེ་གནོད་སྦྱིན་བབས་པའི་མིག