ཚོར་བ་ཚོར་བས་སྟོང་སྟེ། ཚོར་བའི་སྟོང་པ་ཉིད་གང་ལགས་པ་དེ་ཡང་ཚོར་བ་མ་ལགས། ཚོར་བ་ལས་གུད་ན་ཡང་སྟོང་པ་ཉིད་མ་མཆིས་ཏེ། ཚོར་བ་ཉིད་ཀྱང་སྟོང་པ་ཉིད་སྟོང་པ་ཉིད་ཀྱང་ཚོར་བའོ། །སྲེད་པ་སྲེད་པས་སྟོང་སྟེ། སྲེད་པའི་སྟོང་པ་ཉིད་གང་ལགས་པ་དེ་ཡང་སྲེད་པ་མ་ལགས། སྲེད་པ་ལས་གུད་ན་ཡང་སྟོང་པ་ཉིད་མ་མཆིས་ཏེ། སྲེད་པ་ཉིད་ཀྱང་སྟོང་པ་ཉིད་སྟོང་པ་ཉིད་ཀྱང་སྲེད་པའོ། །ལེན་པ་ལེན་པས་སྟོང་སྟེ། ལེན་པའི་སྟོང་པ་ཉིད་གང་ལགས་པ་དེ་ཡང་ལེན་པ་མ་ལགས། ལེན་པ་ལས་གུད་ན་ཡང་སྟོང་པ་ཉིད་མ་མཆིས་ཏེ། ལེན་པ་ཉིད་ཀྱང་སྟོང་པ་ཉིད་སྟོང་པ་ཉིད་ཀྱང་ལེན་པའོ། །སྲིད་པ་སྲིད་པས་སྟོང་སྟེ། སྲིད་པའི་སྟོང་པ་ཉིད་གང་ལགས་པ་དེ་ཡང་སྲིད་པ་མ་ལགས། སྲིད་པ་ལས་གུད་ན་ཡང་སྟོང་པ་ཉིད་མ་མཆིས་ཏེ། སྲིད་པ་ཉིད་ཀྱང་སྟོང་པ་ཉིད་སྟོང་པ་ཉིད་ཀྱང་སྲིད་པའོ། །སྐྱེ་བ་སྐྱེ་བས་སྟོང་སྟེ། སྐྱེ་བའི་སྟོང་པ་ཉིད་གང་ལགས་པ་དེ་ཡང་སྐྱེ་བ་མ་ལགས། སྐྱེ་བ་ལས་གུད་ན་ཡང་སྟོང་པ་ཉིད་མ་མཆིས་ཏེ། སྐྱེ་བ་ཉིད་ཀྱང་སྟོང་པ་ཉིད་སྟོང་པ་ཉིད་ཀྱང་སྐྱེ་བའོ། །རྒ་ཤི་རྒ་ཤིས་སྟོང་སྟེ། རྒ་ཤིའི་སྟོང་པ་ཉིད་གང་ལགས་པ་དེ་ཡང་རྒ་ཤི་མ་ལགས། རྒ་ཤི་ལས་གུད་ན་ཡང་སྟོང་པ་ཉིད་མ་མཆིས་ཏེ། རྒ་ཤི་ཉིད་ཀྱང་སྟོང་པ་ཉིད་སྟོང་པ་ཉིད་ཀྱང་རྒ་ཤིའོ། །བཅོམ་ལྡན་འདས་རྣམ་གྲངས་དེས་ན། བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཚེ། མ་རིག་པ་ལ་གནས་པར་མྱི་བགྱིའོ། །འདུ་བྱེད་ལ་གནས་པར་མྱི་བགྱིའོ། །རྣམ་པར་ཤེས་པ་ལ་གནས་པར་མྱི་བགྱིའོ། །མྱིང་དང་གཟུགས་ལ་གནས་པར་མྱི་བགྱིའོ། །སྐྱེ་མཆེད་དྲུག་ལ་གནས་པར་མྱི་བགྱིའོ། །རེག་པ་ལ་གནས་པར་མྱི་བགྱིའོ། །ཚོར་བ་ལ་གནས་པར་མྱི་བགྱིའོ། །སྲེད་པ་ལ་གནས་པར་མྱི་བགྱིའོ། །ལེན་པ་ལ་གནས་པར་མྱི་བགྱིའོ། །