སངས་རྒྱས་ཀྱི་ཆོས་མ་འདྲེས་པ་བཅྭོ་བརྒྱད་ལ་བཀོད་པར་གྱུར་པ་ཡོད་དམ། རྒྱུན་ཏུ་ཞུགས་པའི་འབྲས་བུ་ལ་བཀོད་པར་གྱུར་པ་ཡོད་དམ། ལན་ཅིག་ཕྱིར་འོང་བའི་འབྲས་བུ་ལ་བཀོད་པར་གྱུར་པ་ཡོད་དམ། ཕྱིར་མྱི་འོང་བའི་འབྲས་བུ་ལ་བཀོད་པར་གྱུར་པ་ཡོད་དམ། དགྲ་བཅོམ་པ་ཉིད་ལ་བཀོད་པར་གྱུར་པ་ཡོད་དམ། རང་བྱང་ཆུབ་ལ་བཀོད་པར་གྱུར་པ་ཡོད་དམ། ལམ་གྱི་རྣམ་པ་ཤེས་པ་ཉིད་ལ་བཀོད་པར་གྱུར་པ་ཡོད་དམ། རྣམ་པ་ཐམས་ཅད་མཁྱེན་པ་ཉིད་ལ་བཀོད་པར་གྱུར་པ་ཡོད་དམ། གསོལ་པ་བཅོམ་ལྡན་འདས་དེ་ནི་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཚད་མྱེད་གྲངས་མྱེད་པ་ཕ་རོལ་ཏུ་ཕྱིན་པ་དྲུག་ལ་དགོད་པར་སེམས་བསྐྱེད། སྟོང་པ་ཉིད་བཅྭོ་བརྒྱད་ལ་དགོད་པར་སེམས་བསྐྱེད། དྲན་པ་ཉེ་བར་གཞག་པ་བཞི་ལ་དགོད་པར་སེམས་བསྐྱེད། ཡང་དག་པར་སྤོང་བ་བཞི་ལ་དགོད་པར་སེམས་བསྐྱེད། རྫུ་འཕྲུལ་གྱི་རྐང་པ་བཞི་ལ་དགོད་པར་སེམས་བསྐྱེད། དབང་པོ་ལྔ་ལ་དགོད་པར་སེམས་བསྐྱེད། སྟོབས་ལྔ་ལ་དགོད་པར་སེམས་བསྐྱེད། བྱང་ཆུབ་ཀྱི་ཡན་ལག་བདུན་ལ་དགོད་པར་སེམས་བསྐྱེད། འཕགས་པའི་ལམ་ཡན་ལག་བརྒྱད་པ་ལ་དགོད་པར་སེམས་བསྐྱེད། འཕགས་པའི་བདེན་པ་བཞི་ལ་དགོད་པར་སེམས་བསྐྱེད། བསམ་གཏན་བཞི་ལ་དགོད་པར་སེམས་བསྐྱེད། ཚད་མྱེད་པ་བཞི་ལ་དགོད་པར་སེམས་བསྐྱེད། གཟུགས་མྱེད་པའི་སྙོམས་པར་འཇུག་པ་བཞི་ལ་དགོད་པར་སེམས་བསྐྱེད། རྣམ་པར་ཐར་པ་བརྒྱད་ལ་དགོད་པར་སེམས་བསྐྱེད། མཐར་ཀྱིས་གནས་པའི་སྙོམས་པར་འཇུག་པ་དགུ་ལ་དགོད་པར་སེམས་བསྐྱེད། རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མྱེད་པ་དང་། སྨོན་པ་མྱེད་པ་ལ་དགོད་པར་སེམས་བསྐྱེད། མངོན་པར་ཤེས་པ་ལྔ་ལ་དགོད་པར་སེམས་བསྐྱེད། ཏིང་ངེ་འཛིན་ཐམས་ཅད་ལ་དགོད་པར་སེམས་བསྐྱེད། གཟུངས་ཀྱི་སྒོ་ཐམས་ཅད་ལ་དགོད་པར་སེམས་བསྐྱེད།